Megastar Chiranjeevi| అక్కినేని నాగేశ్వరరావు(Akkineni Nageswara Rao)శతజయంతి సంవత్సరం సందర్భంగా ఏఎన్ఆర్ అవార్డ్స్(ANR Awards) వేడుక హైదరాబాద్‌లో సోమవారం రాత్రి ఘనంగా జరిగిన సంగతి తెలిసిందే. ఈ వేడులకు అక్కినేని కుటుంబంతో పాటు హీరోలు రామ్‌చరణ్‌, నాని, ప్రముఖులు రాఘవేంద్రరావు, అశ్వినీదత్, వెంకటేశ్, విజయేంద్ర ప్రసాద్, మురళీ మోహన్, రాజేంద్ర ప్రసాద్, త్రివిక్రమ్, అల్లు అరవింద్, ప్రకాశ్‌ రాజ్, బ్రహ్మానందం, ఎం.ఎం.కీరవాణి, నందమూరి రామకృష్ణ, నాగ్‌ అశ్విన్, రమా రాజమౌళి, శ్రీవల్లి, బోయపాటి శ్రీను, తదితరులు పాల్గొన్నారు.
కాగా ఈ వేడుకలో మెగాస్టార్ చిరంజీవి(Megastar Chiranjeevi) ఏఎన్ఆర్ నేషనల్ అవార్డు(ANR National Award) అందుకున్నారు. ఈ సందర్భంగా చిరంజీవి ఎక్స్ వేదికగా ఎమోషనల్ ట్వీట్ చేశారు. ‘అక్కినేని నాగేశ్వరరావు శతజయంతి సంవత్సరంలో నా చిరకాల గురువు అమితాబ్ బచ్చన్(Amitabh Bachchan) చేతుల మీదుగా ప్రతిష్ఠాత్మకమైన ‘ఏఎన్ఆర్ జాతీయ అవార్డు’ అందుకోవడం అదృష్టంగా, ఆనందంగా ఉంది. అక్కినేని కుటుంబంలోని ప్రతి సభ్యుడికి, అక్కినేని ఇంటర్నేషనల్ ఫౌండేషన్ సభ్యులకు కృతజ్ఞతలు. నా ప్రియమైన సోదరుడు, మిత్రులు టి.సుబ్బరామిరెడ్డి(T. Subbarami Reddy)కి, నాగార్జున(Nagarjuna)కు ధన్యవాదాలు. నా సినీ ప్రయాణానికి, నా ప్రతి మైలురాళ్లకు సహకరించిన ప్రతి ఒక్కరికీ ఎప్పటికీ రుణపడి ఉంటాను’ అంటూ రాసుకొచ్చారు.
ఈ అవార్డు వచ్చిన సందర్భంగా స్టేజీ మీద చిరంజీవి మాట్లాడుతూ ఏఎన్నార్ అవార్డును అందుకోవడం నిజంగా చాలా సంతోషంగా ఉందని తెలిపారు. తనకు పద్మభూషణ్, పద్మ విభూషణ్, గిన్నిస్‌ బుక్‌లో స్థానం.. ఇలాంటివి ఎన్ని వచ్చినా.. ఏఎన్ఆర్ జాతీయ అవార్డు విషయంలో తన భావోద్వేగం వేరుగా ఉందన్నారు. రచ్చ గెలిచి.. ఇంట గెలిచిన అనుభూతి కలిగింది అని చెప్పుకొచ్చారు. ఇక చిరంజీవి సినిమాల విషయానికొస్తే.. ప్రస్తుతం ఆయన యువ దర్శకుడు వశిష్ఠ దర్శకత్వంలో విశ్వంభర (Vishwambhara)చిత్రంలో నటిస్తున్నారు. వచ్చే ఏడాది వేసవిలో ఈ సినిమా విడుదల కానుంది.
