MohanBabu| మంచు కుటుంబ వివాదం నేపథ్యంలో శంషాబాద్ ప్రాంతంలోని జల్‌పల్లిలోని మోహన్ బాబు నివాసానికి కవరేజ్ కోసం మీడియా ప్రతినిధులు వెళ్లారు. దీంతో మోహన్ బాబుతో పాటు ఆయన బౌన్సర్లు మీడియా ప్రతినిధులపై దురుసుగా ప్రవర్తించిన సంగతి తెలిసిందే. ఈ క్రమంలోనే మోహన్ బాబు ఓ ఛానల్‌ ప్రతినిధి చేతిలో నుంచి మైకు లాక్కుని ముఖంపై బలంగా కొట్టారు. అనంతరం బౌన్సర్లు నెట్టేయడంతో మరో ఛానల్‌ కెమెరామన్‌ కింద పడ్డాడు. మోహన్ బాబు చేసిన దాడిలో సదరు జర్నలిస్టు తలకు తీవ్ర గాయాలయ్యాయి.
దవడ పైభాగంలో ఉండే జైగోమాటిక్ బోన్(Zygomatic Bone) మూడు చోట్ల విరిగినట్లుగా స్కానింగ్‌లో తేలిందని వైద్యులు తెలిపారు. దీంతో రంజిత్‌కు వెంటనే ప్లాస్టిక్ సర్జరీ చేయాలని సూచించినట్లుగా తెలుస్తోంది. మరోవైపు ఈ దాడిని నిరసిస్తూ జర్నలిస్టు సంఘాలు తీవ్ర ఆగ్రహం వ్యక్తం చేస్తున్నాయి. మోహన్‌బాబుపై కేసు నమోదు చేయాలని డిమాండ్‌ చేశాయి. ఈ నేపథ్యంలో ఆయనపై సెక్షన్ 118 బి ఎం ఎస్ కింద రాచకొండ పోలీసులు హత్యాతయ్నం కేసు నమోదుచేశారు.
