‘మ్యాడ్’ సిరీస్‌తో తెలుగు ప్రేక్షకులను కడుపుబ్బా నవ్వించిన సంగీత్ శోభన్(Sangeeth Shobhan) సోలో హీరోగా కొత్త సినిమాకు కమిట్ అయ్యాడు. మెగా డాటర్ నిహారిక(Niharika) ఈ సినిమాకు నిర్మాతగా వ్యవహిరంచనున్నారు. ఈ మేరకు అధికారిక ప్రకటన విడుదల చేశారు. ఈ సినిమాకు మానస శర్మ కథ అందించడంతో పాటు దర్శకత్వం వహిస్తున్నారు. ఇక ఈ చిత్రానికి మహేశ్‌ ఉప్పల కో రైటర్‌గా స్క్రీన్ ప్లే, డైలాగ్స్ అందించారు. మన్యం రమేశ్‌ ఎగ్జిక్యూటివ్ ప్రొడ్యూసర్‌గా వ్యవహరిస్తున్నారు.
నిహారిక రూపొందించిన వెబ్ ప్రాజెక్ట్స్‌లో సంగీత్ శోభన్, డైరెక్టర్ మానస శర్మ భాగమయ్యారు. జీ5 ఓటీటీ సంస్థతో కలిసి పింక్ ఎలిఫెంట్ పిక్చర్స్ రూపొందించిన ‘ఒక చిన్న ఫ్యామిలీ స్టోరీ’వెబ్ సిరీస్‌కి మానస శర్మ రచయితగా పనిచేశారు. అలాగే సోనీ లివ్ ఓటీటీ రూపొందించిన ‘బెంచ్ లైఫ్’కి దర్శకురాలిగా పనిచేశారు. కాగా నిహారిక గ‌తేడాది ‘కమిటీ కుర్రోళ్లు’ సినిమాతో నిర్మాతగా మారిన సంగతి తెలిసిందే. తన తొలి సినిమాతో సూపర్ హిట్ అందుకున్నారు. కొత్త డైరెక్టర్, కొత్త నటీనటులతో చిన్న సినిమాగా వచ్చిన ఈ చిత్రం రూ. 50 కోట్ల వసూళ్లు సాధించింది.
