Upasana| కడప పెద్ద దర్గా ఉరుసు ఉత్సవాల సందర్భంగా అక్కడ నిర్వహించిన 80వ నేషనల్‌ ముషాయిరా గజల్‌ ఈవెంట్‌కు ముఖ్య అతిథిగా గ్లోబల్ స్టార్ రామ్‌చరణ్‌ (Ram Charan) హాజరైన సంగతి తెలిసిందే. అయితే అయ్యప్పస్వామి మాలలో ఉన్న చరణ్.. దర్గాను సందర్శించడంపై పలువురు విమర్శలు చేశారు. ఈ విమర్శలపై ఆయన సతీమణి ఉపాసన(Upasana) కౌంటర్ ఇచ్చారు.
‘‘దేవుడిపై విశ్వాసం అందరినీ ఏకం చేస్తుంది. చిన్నాభిన్నం చేయదు. భారతీయులుగా మేము అన్ని మత విశ్వాసాలను గౌరవిస్తాం. ఐక్యతలోనే మా బలం ఉంది. రామ్‌చరణ్‌ తన మతాన్ని అనుసరిస్తూనే ఇతర మతాలనూ ఎప్పుడూ గౌరవిస్తుంటారు’’ అంటూ సోషల్ మీడియాలో పోస్టు పెట్టారు. ఈ పోస్టుకు ‘వన్‌ నేషన్‌.. వన్‌ స్పిరిట్‌’ అంటూ హ్యాష్‌ట్యాగ్‌ జత చేశారు.
ఇక చరణ్ సినిమాల విషయానికి వస్తే.. ప్రస్తుతం దిగ్గజ దర్శకుడు శంకర్ దర్శకత్వంలో ‘గేమ్‌ ఛేంజర్‌’ సినిమాలో నటించారు. బాలీవుడ్ నటి కియారా అద్వానీ హీరోయిన్‌గా నటించిన ఈ చిత్రం జనవరి 10న విడుదల కానుంది. ఇప్పటికే ఈ సినిమా నుంచి విడుదలైన పోస్టర్లు, పాటలు, టీజర్ సినిమాపై ఆసక్తి పెంచాయి. మరోవైపు ఈ సినిమాతో పాటు ‘ఉప్పెన’ దర్శకుడు బుచ్చిబాబు దర్శకత్వంలోనూ నటించనున్నారు.
