Unstoppable With NBK| నందమూరి బాలకృష్ణ (Balakrishna) వ్యాఖ్యాతగా ఆహాలో సెలబ్రిటీ టాక్‌ షో ‘అన్‌స్టాపబుల్‌’ (Unstoppable With NBK) స్ట్రీమింగ్ అవుతోన్న సంగతి తెలిసిందే. నాలుగో సీజన్‌లో ఇప్పటికే ఏపీ సీఎం చంద్రబాబు(Chandrababu), దుల్కర్ సల్మాన్‌, సూర్య గెస్టులుగా వచ్చి సందడి చేశారు. తాజాగా ఐకాన్ స్టార్ అల్లు అర్జున్ (Allu Arjun) పాల్గొన్నారు. త్వరలో విడుదల కానున్న ‘పుష్ప2’ (Pushpa The Rule) ప్రమోషన్స్‌లో భాగంగా ఈ కార్యక్రమానికి బన్నీ హాజరయ్యారు. ఇందుకు సంబంధించిన ప్రోమోను విడుదల చేశారు నిర్వాహకులు.
ఈ ప్రోమోలో సినిమా విశేషాలతో పాటు జాతీయ అవార్డు రావడం వంటి అంశాలపై బాలయ్యతో మాట్లాడారు. తెలుగులో ఒక్క నటుడికి కూడా జాతీయ ఉత్తమ నటుడి రాకపోవడం బాధించిందని.. ఎలాగైనా ఈ అవార్డు సాధించాలనుకున్నానని వివరించారు. అలాగే చిరంజీవి, మహేష్‌బాబు, ఇతర నటులతో ఉన్న అనుబంధాన్ని గుర్తుచేసుకున్నారు. ఇక అమ్మాయిలకు అన్యాయం జరిగితే తనకు కోపం వస్తుందని పేర్కొన్నారు. ఇక బాలయ్య తనకు ఎప్పుడూ పార్టీ ఇస్తావ్ అని అడగ్గా.. మీ మెన్షన్‌లో హౌస్‌ పార్టీ పెట్టుకుందామని బన్నీ రిప్లై ఇచ్చారు. మొత్తంగా బాలయ్య, బన్నీ మధ్య సరదా సంభాషణ ఆకట్టుకుంటుంది. కాగా నవంబర్ 15న ఈ ఎపిసోడ్ పార్ట్-1 ఆహాలో స్ట్రీమింగ్ కానుంది.