13-Year-Old Girl Dies by Suicide in Hyderabad: చదువుల ఒత్తిడిలో ఓ పసిప్రాణం అర్థాంతరంగా తనువు చాలించింది. హైదరాబాద్‌లోని కేపీహెచ్‌బీ కాలనీలో చోటుచేసుకున్న ఈ విషాద ఘటన ప్రతి ఒక్కరినీ కలచివేస్తోంది. మంజీరా ట్రినిటీ హోమ్స్ అపార్ట్‌మెంట్‌లో నివాసం ఉంటున్న 13 ఏళ్ల బాలిక, ఆకుల వెంకట లాస్య ప్రియ, గురువారం రాత్రి 17వ అంతస్తు నుంచి దూకి ఆత్మహత్యకు పాల్పడింది.
చిన్న చిన్న విషయాలకే విద్యార్థులు ఇంతటి కఠిన నిర్ణయాలు తీసుకోవడం, తమ జీవితాలను ముగించుకోవడం ఆందోళన కలిగించే విషయం. రెండు రోజుల క్రితమే ఆదిలాబాద్‌లోని రిమ్స్‌లో ఓ మెడికల్ విద్యార్థి సైతం ఇదే విధంగా తన ప్రాణాలను తీసుకున్నాడు. ఈ ఘటన మరువక ముందే లాస్య ప్రియ ఆత్మహత్య అందరినీ కదిలించింది.
ఇదీ జరిగింది..
లాస్య ప్రియ ఇటీవల జరిగిన పేరెంట్-టీచర్ మీటింగ్‌కు తన తల్లిదండ్రులతో కలిసి హాజరైంది. ఆ సమావేశంలో, టీచర్లు లాస్య ప్రియ సరిగ్గా చదవడం లేదని, పరీక్షల్లో మార్కులు తక్కువ వస్తున్నాయని ఆమె తల్లిదండ్రులతో చెప్పారు. ఈ విషయంపై తల్లిదండ్రులు ఆమెను మందలించారు. దీంతో లాస్య ప్రియ తీవ్ర మనస్తాపానికి గురైంది. అదే ఆమెను తీవ్రమైన మానసిక ఒత్తిడిలోకి నెట్టేసి ఉంటాయని పోలీసులు భావిస్తున్నారు. ఆ మనోవేదనే చివరికి ఆమె ఆత్మహత్యకు దారి తీసిందని తెలుస్తోంది.
ఈ ఘటన మరోసారి విద్యార్థులపై పెరుగుతున్న చదువుల ఒత్తిడిని కళ్ళకు కట్టింది. మార్కుల వెనుక పరుగులు తీస్తూ, పిల్లల మానసిక ఆరోగ్యాన్ని మనం విస్మరిస్తున్నామా అనే ప్రశ్నను ఈ దుర్ఘటన లేవనెత్తుతోంది. ముఖ్యంగా టీనేజ్ దశలో ఉన్న పిల్లలతో ఎంతో జాగ్రత్తగా, ప్రేమగా వ్యవహరించాలని, వారిపై ఒత్తిడి పెంచవద్దని మనస్తత్వ నిపుణులు పదేపదే సూచిస్తున్నారు. వారి మార్కులు ఎంత ముఖ్యమో, వారి చిరునవ్వు, ఆత్మవిశ్వాసం కూడా అంతే ముఖ్యమని ఈ విషాద ఘటన గుర్తుచేస్తుంది.
