Daughter Kills Parents in Vikarabad : అల్లారుముద్దుగా పెంచారు.. అడిగిందల్లా కాదనకుండా కొనిచ్చారు.. తమ కడుపు మాడ్చుకుని మరీ బిడ్డను ప్రయోజకురాలిని చేశారు. చేతికి అందిన కూతురు, వృద్ధాప్యంలో తమకు చేదోడువాదోడుగా ఉంటుందని ఆశపడ్డారు. కానీ, ఆ బిడ్డకు తల్లిదండ్రుల ప్రేమానురాగాల కంటే.. పరిచయమైన కొన్నాళ్ల ప్రేమ వ్యామోహమే ఎక్కువైంది. కన్నవారిని దైవంగా భావించాల్సిన కూతురు.. యముడిగా మారింది. ప్రాణాలు కాపాడాల్సిన ‘నర్సు’ వృత్తినే ఆయుధంగా మలుచుకుంది. నొప్పులు తగ్గుతాయని నమ్మబలికి.. కన్నవారికి కడతేర్చింది. వికారాబాద్ జిల్లాలో జరిగిన ఈ హృదయ విదారక ఘటన విన్నవారి గుండెలు బరువెక్కుతున్నాయి.
ప్రేమ చిచ్చు రగిలించిన కార్చిచ్చు : పోలీసులు మరియు స్థానికుల సమాచారం ప్రకారం.. వికారాబాద్ జిల్లా బంట్వారం మండలం యాచారం గ్రామానికి చెందిన దశరథ్, లక్ష్మీ దంపతులు వ్యవసాయం చేసుకుంటూ జీవనం సాగిస్తున్నారు. వీరికి ముగ్గురు కుమార్తెలు, ఒక కుమారుడు. అందరిలో చిన్నదైన సురేఖను చదివించి సంగారెడ్డిలోని ఓ ప్రైవేట్ ఆస్పత్రిలో నర్సుగా చేర్పించారు. ఈ క్రమంలో సురేఖ ఓ యువకుడితో ప్రేమలో పడింది. విషయం ఇంటికి తెలియడంతో తల్లిదండ్రులు మందలించారు. వేరే కారణాల రీత్యా ఆ పెళ్లికి నిరాకరించారు. అబ్బాయితో మాట్లాడొద్దని హెచ్చరించారు. దీన్ని అవమానంగా, ఆటంకంగా భావించిన సురేఖ.. కన్నవారిపైనే కక్ష పెంచుకుంది. వారిని అడ్డు తొలగించుకుంటేనే తన ప్రేమ గెలుస్తుందని రాక్షసంగా ఆలోచించింది.
నమ్మించి గొంతు కోసిందిలా : తల్లిదండ్రుల అమాయకత్వాన్ని, అనారోగ్యాన్ని సురేఖ తనకు అనుకూలంగా మార్చుకుంది. తాను పనిచేస్తున్న ఆస్పత్రి నుంచి అత్యంత ప్రమాదకరమైన మత్తు మందు (Lethal Injection) బాటిల్స్ను ఇంటికి తెచ్చింది.
అమ్మకు మత్తు: అమ్మకు ఒంట్లో బాగోలేదని, ఈ ఇంజక్షన్ తీసుకుంటే తగ్గిపోతుందని నమ్మించింది. కూతురు నర్సు కదా అని ఆ తల్లి గుడ్డిగా నమ్మింది. అధిక మోతాదులో మత్తు మందు ఇవ్వడంతో తల్లి లక్ష్మీ క్షణాల్లోనే కుప్పకూలి ప్రాణాలు విడిచింది.
నాన్నకు అబద్ధం: ఇంటికి వచ్చిన తండ్రి దశరథ్ భార్య గురించి ఆరా తీయగా.. “అమ్మ నిద్రపోతోంది” అని అబద్ధం చెప్పింది. తండ్రికి కీళ్ల నొప్పులు ఉన్నాయని గ్రహించి, అవి తగ్గాలంటే ఇంజక్షన్ తప్పదని నమ్మబలికింది. కూతురి చేతిలో ఇంజక్షన్ తీసుకున్న ఆ తండ్రి కూడా కొద్దిసేపటికే శాశ్వత నిద్రలోకి జారుకున్నాడు.
అంత్యక్రియల ముందు వీడిన మిస్టరీ : ఇద్దరినీ హత్య చేసిన తర్వాత, తెల్లవారుజామున తన అన్న అశోక్కు ఫోన్ చేసి “అమ్మానాన్నలు చనిపోయారు” అంటూ బోరున ఏడుస్తూ కపట నాటకమాడింది. అప్పుల బాధతో తల్లిదండ్రులు ఆత్మహత్య చేసుకుని ఉంటారని గ్రామస్తులు, బంధువులు భావించారు. కానీ సమాచారం అందుకున్న వికారాబాద్ పోలీసులు ఘటనా స్థలానికి చేరుకుని పరిశీలించగా.. అక్కడ వాడి పారేసిన సిరంజీలు, ఇంజక్షన్ సీసాలు కనిపించాయి. అనుమానం వచ్చిన పోలీసులు మృతదేహాలను పరిశీలించి, సురేఖను అదుపులోకి తీసుకున్నారు.
పోలీసుల విచారణలో విస్తుపోయే నిజాలు : తొలుత పొంతనలేని సమాధానాలు చెప్పిన సురేఖ, పోలీసులు తమదైన శైలిలో విచారించడంతో నేరాన్ని అంగీకరించింది. కేవలం తన ప్రియుడిని పెళ్లి చేసుకునేందుకే ఈ ఘాతుకానికి పాల్పడినట్లు ఒప్పుకుంది.
డీఎస్పీ శ్రీనివాస్ రెడ్డి వెల్లడించిన వివరాలు: “మృతుల కుమారుడు నక్కలి అశోక్ ఫిర్యాదు మేరకు కేసు నమోదు చేశాం. ఘటనా స్థలంలో దొరికిన రెండు ఇంజక్షన్లు కేసును మలుపు తిప్పాయి. నిందితురాలు సురేఖ నర్సుగా పనిచేస్తుండటంతో, తల్లిదండ్రులకు విషం ఇచ్చి చంపినట్లు తేలింది. నిందితురాలిని అరెస్టు చేసి రిమాండ్కు తరలించాం.” క్షణికావేశంలో తీసుకున్న నిర్ణయం, విచక్షణ కోల్పోయిన ప్రేమ.. నిండుగా ఉండాల్సిన కుటుంబాన్ని చిదిమేసింది. కన్నపేగునే కాలరాసిన సురేఖ ఉదంతం.. సమాజంలో మారుతున్న విపరీత పోకడలకు అద్దం పడుతోంది.