వరుస దొంగతనాలకు పాల్పడుతున్న నలుగురు అంతర్రాష్ట్ర దొంగలను ఎస్ఆర్ నగర్ పోలీసులు అరెస్టు చేశారు. పోలీసులు తెలిపిన వివరాల ప్రకారం.. ఎస్సార్ నగర్ పోలీస్ స్టేషన్ పరిధిలోని బాపునగర్ లోని ఓ హాస్టల్ లో నివాసం ఉంటున్న మణిశేఖర్ అతని రూమ్ మెట్ బ్రహ్మారెడ్డిలు గత నెల 29వ తారీకున తమ హాస్టల్ లో తమ ఆఫీస్ ల్యాప్టాప్ లను పక్కన ఉంచుకొని నిద్రిస్తున్నారు. కాగా ఉదయం సుమారు 5 గంటల ప్రాంతాన లేచి చూడగా తమ ల్యాప్టాప్ లు కనిపించకుండా పోయాయి. వెంటనే వారు పోలీస్ స్టేషన్ లో కంప్లైంట్ చేయగా కేసు నమోదు చేసుకున్న పోలీసులు దర్యాప్తు జరిపారు.
సీసీటీవీ ఫుటేజీల ఆధారంగా తమిళనాడు రాష్ట్రం అంభూర్ జిల్లాకు చెందిన దీనా(21), సౌందరాజన్(21), సారథి(20), నటరాజన్(20) లను అరెస్టు చేసి వారి వద్ద నుంచి 14 ల్యాప్టాప్ లను స్వాధీనం చేసుకున్నారు.
ఈ క్రమంలో వారిని విచారించగా సులభంగా డబ్బు సంపాదించాలని ఉద్దేశంతో హైదరాబాద్ నగరానికి వచ్చినట్లు తెలిపారు. ఈ నేపథ్యంలో ఎస్సార్ నగర్ పోలీస్ స్టేషన్ల పరిధిలోని పలు హాస్టల్లో 15 ల్యాప్టాప్ లను దొంగిలించి ఒక ల్యాప్టాప్ ను దారిన వెళ్లే ఒక వ్యక్తికి తక్కువ ధరకు విక్రయించినట్లు తెలిపారు.