Lucknow Revenge Murder Case: కన్నతల్లికి అవమానిస్తే ఏ కొడుకైనా ఊరుకుంటాడా? గుండెల్లో అగ్నిపర్వతం బద్దలవుతుంది. కానీ ఆ అవమానానికి ప్రతీకారంగా పదేళ్లపాటు పగతో రగిలిపోయి, చివరికి హత్య చేసేంత కక్ష పెంచుకుంటాడని ఎవరూ ఊహించరు. ఉత్తరప్రదేశ్‌లోని లక్నోలో జరిగిన ఈ దారుణ ఘటన ఇప్పుడు దేశవ్యాప్తంగా కలకలం రేపుతోంది. తల్లిని కొట్టాడన్న ఒక్క కారణంతో, దశాబ్దం పాటు నిందితుడి కోసం వేటాడి, అత్యంత కిరాతకంగా అంతమొందించాడు ఓ తనయుడు. అసలు పదేళ్ల క్రితం ఏం జరిగింది? ఆ ఒక్క సంఘటన హత్యకు ఎలా దారితీసింది..? నిందితులను పోలీసులు ఎలా పట్టుకున్నారు..?
పగ.. ప్రణాళిక.. పతనం:
పోలీసుల కథనం ప్రకారం, ఈ హత్య వెనుక పదేళ్ల నాటి పగ దాగి ఉంది. లక్నోకు చెందిన సోను కశ్యప్ అనే యువకుడి తల్లికి, కొబ్బరికాయల వ్యాపారి అయిన మనోజ్‌కు మధ్య సుమారు పదేళ్ల క్రితం ఓ చిన్నపాటి వివాదం చోటుచేసుకుంది. ఆ గొడవలో మనోజ్, సోను తల్లిపై చేయి చేసుకున్నాడు. ఆ సమయంలో బాలుడైన సోను కళ్ల ముందే ఈ ఘటన జరిగింది. తల్లికి జరిగిన ఆ పరాభవాన్ని జీర్ణించుకోలేకపోయాడు. అప్పటినుంచి మనోజ్‌పై తీవ్రమైన పగ పెంచుకున్నాడు. ఘటన జరిగిన వెంటనే మనోజ్ ఆ ప్రాంతం నుంచి పారిపోయి, వేరే చోట జీవించడం ప్రారంభించాడు.
పదేళ్ల వేట.. పక్కా స్కెచ్:
కానీ సోను మాత్రం మనోజ్‌ను మర్చిపోలేదు. పగతో రగిలిపోతూ, పదేళ్లపాటు అతని కోసం వివిధ ప్రాంతాలను జల్లెడ పట్టాడు. చివరికి మూడు నెలల క్రితం, లక్నోలోని మున్షిపులియా ప్రాంతంలో మనోజ్ నివసిస్తున్నట్లు గుర్తించాడు. ఇక అతడిని అంతమొందించాలని పక్కా స్కెచ్ వేశాడు. ఈ దారుణానికి తన స్నేహితులైన రంజిత్, ఆదిల్, సలామ్‌, రెహ్మత్ అలీల సహాయం కోరాడు. హత్యకు ముందు వారందరికీ ఫుల్‌గా మద్యం పార్టీ ఇచ్చి, వారిని తన ప్రణాళికలో భాగస్వాములను చేశాడు.
దారుణ హత్య.. ఆపై పార్టీ:
అనుకున్న ప్రకారం, మనోజ్ ఒంటరిగా ఉన్న సమయం చూసి, సోను తన స్నేహితులతో కలిసి ఇనుప రాడ్లతో దాడికి పాల్పడ్డాడు. వారి దాడిలో తీవ్రంగా గాయపడిన మనోజ్‌ను ఆసుపత్రికి తరలించగా, అక్కడ చికిత్స పొందుతూ ప్రాణాలు విడిచాడు. తమ పగ తీరిందన్న ఆనందంలో, హత్య చేసిన అనంతరం నిందితులంతా కలిసి పార్టీ చేసుకున్నారు.
ALSO READ: https://teluguprabha.net/crime-news/pune-man-films-wife-bathing-blackmails-her-for-car-emi/
ఒక్క ఫొటోతో దొరికిపోయారు:
హంతకులు ఎంత తెలివిగా ప్లాన్ చేసినా ఎక్కడో ఒకచోట దొరికిపోతారనడానికి ఈ కేసే నిదర్శనం. హత్య తర్వాత పార్టీ చేసుకుంటున్న ఫొటోలను నిందితులు గర్వంగా సోషల్ మీడియాలో పంచుకున్నారు. మరోవైపు, దర్యాప్తు చేపట్టిన పోలీసులు, హత్య జరిగిన ప్రదేశంలోని సీసీటీవీ ఫుటేజీని పరిశీలించారు. ఆ ఫుటేజీలో ఉన్న నిందితుల్లో ఒకరు వేసుకున్న దుస్తులు, సోషల్ మీడియాలో పార్టీ ఫొటోలో ఉన్న దుస్తులతో సరిపోలడంతో పోలీసుల అనుమానం బలపడింది. ఆ ఒక్క ఆధారం పట్టుకుని, పోలీసులు నిందితులందరినీ అరెస్ట్ చేశారు. ప్రస్తుతం వారంతా పోలీసుల అదుపులో ఉన్నారు. తల్లిపై ప్రేమ, పదేళ్ల పగ చివరికి ఓ యువకుడిని, అతని స్నేహితులను కటకటాల పాలు చేసింది.
