Noida Man Kills Wife, Brother-In-Law And Hangs Self: దేశ రాజధాని ప్రాంతం (NCR) నోయిడాలో దారుణం చోటుచేసుకుంది. ఒక వ్యక్తి తన భార్యను, ఆరేళ్ల బావమరిదిని దారుణంగా హత్య చేసి, ఆ తర్వాత తానూ ఆత్మహత్య చేసుకున్న సంఘటన కలకలం రేపింది. కుటుంబ సభ్యుల కథనం ప్రకారం, మృతుడు మానసిక అస్వస్థతతో బాధపడుతున్నాడని తెలుస్తోంది.
ఈ విషాద ఘటన నోయిడా ఎక్స్‌టెన్షన్‌లోని రోజా జలాల్‌పూర్ గ్రామంలో సోమవారం జరిగింది. బిస్రఖ్ పోలీసులు తెలిపిన వివరాల ప్రకారం… ఉత్తరప్రదేశ్‌లోని పీలీభీత్ జిల్లాకు చెందిన పప్పు లాల్ (22) అనే వ్యక్తి పది రోజుల క్రితం తన అత్తమామల ఇంటికి వచ్చాడు.
సుత్తితో కొట్టి దారుణ హత్య
సోమవారం సాయంత్రం 4:30 గంటల ప్రాంతంలో పప్పు లాల్ తన భార్య జస్వంతి (21) మరియు ఆరేళ్ల బావమరిది తేజ్ ప్రకాష్ (6) పై సుత్తి (హ్యామర్)తో దాడి చేశాడు. ఈ దాడిలో తీవ్ర గాయాలైన భార్య, బావమరిది అక్కడికక్కడే మరణించారు. ఈ దాడి జరిగిన వెంటనే, పప్పు లాల్ తన గదిలోకి వెళ్లి సీలింగ్ ఫ్యాన్ హుక్‌కు ఉరి వేసుకుని ఆత్మహత్య చేసుకున్నాడు.
“దాడి తర్వాత లాల్ తన గదిలోని సీలింగ్ ఫ్యాన్ హుక్‌కు ఉరి వేసుకుని చనిపోయాడు” అని డిప్యూటీ కమిషనర్ ఆఫ్ పోలీస్ (సెంట్రల్ నోయిడా) శక్తి మోహన్ అవస్థీ ధృవీకరించారు.
పనిలో ఉన్న అత్తమామలు
నిందితుడి మామ, నారాయణ్ లాల్, పీలీభీత్‌లోని గజ్రౌలా ప్రాంతం నుండి వచ్చి రోజా జలాల్‌పూర్ గ్రామంలో కూలీగా పనిచేస్తూ కుటుంబంతో నివసిస్తున్నాడు. ఈ ఘటన జరిగిన సమయంలో నారాయణ్ లాల్, అతని భార్య పని నిమిత్తం బయటకు వెళ్లారు. ఇంట్లో పప్పు లాల్, జస్వంతి, తేజ్ ప్రకాష్ మాత్రమే ఉన్నారు.
ఈ దారుణానికి గల కారణాలపై పోలీసులు ఆరా తీయగా… పప్పు లాల్ మానసికంగా నిలకడగా లేకపోవడం వల్లే ఈ సంఘటన జరిగి ఉండవచ్చని కుటుంబ సభ్యులు పోలీసులకు తెలిపారు. సీనియర్ పోలీస్ అధికారులు మరియు ఫోరెన్సిక్ బృందం సంఘటనా స్థలాన్ని పరిశీలించి, వివరాలు సేకరించారు. ఈ ఘటనపై తదుపరి న్యాయ ప్రక్రియ కొనసాగుతోంది. ఒకే కుటుంబంలో మూడు మరణాలు సంభవించడంతో ఆ గ్రామంలో విషాదఛాయలు అలుముకున్నాయి.
