Man kills wife over suspicion : ఊరు మారినా బుద్ధి మారలేదు.. అనుమానమనే భూతం విచక్షణను మింగేసింది. కట్టుకున్న భార్యపై కక్ష పెంచుకున్నాడు.. పండుగకు ఇంటికొచ్చిన కన్నకూతురిపై కూడా కరుణ చూపలేదు. క్షణికావేశంలో ఓ భర్త రాక్షసుడిగా మారి, పండంటి కాపురాన్ని చిదిమేశాడు. నిద్రిస్తున్న భార్యను గొంతు కోసి చంపి, కుమార్తెను కూడా కడతేర్చాలని చూసిన ఈ కిరాతక ఘటన సిద్దిపేట జిల్లాలో చోటుచేసుకుంది. అసలు ఇంతటి దారుణానికి దారితీసిన ఆ అనుమానమేంటి?

సిద్దిపేట జిల్లా, ధూల్మిట్ట మండలం, బెక్కల్‌కు చెందిన ఎల్లయ్య, తన మరదలు శ్రీలతను వివాహం చేసుకున్నాడు. వారికి 16 ఏళ్ల కుమార్తె హర్షిత, 14 ఏళ్ల కుమారుడు అజయ్ ఉన్నారు. ఉపాధి కోసం హైదరాబాద్‌కు, అక్కడి నుంచి మళ్లీ సిద్దిపేటకు మకాం మార్చినా, అతని బుద్ధి మాత్రం మారలేదు.

పండుగ రోజున పగ : సంక్రాంతి పండుగ రోజున, ఆ కుటుంబంలో ఆనందానికి బదులుగా విషాదం నిండింది. పెళ్లయినప్పటి నుంచి భార్య శ్రీలతపై అనుమానంతో వేధిస్తున్న ఎల్లయ్య, సోమవారం రాత్రి ఆమె నిద్రిస్తున్న సమయంలో గొంతు కోసి కిరాతకంగా హత్య చేశాడు.

అంతటితో ఆగకుండా, పక్క గదిలో పడుకున్న కుమార్తె హర్షితపై కత్తితో దాడి చేశాడు. ఆమె చనిపోలేదని, రోకలి బండతో తలపై మోదాడు. పురుగుల మందుతో హత్యా యత్నం: అప్పటికీ చనిపోలేదని నిర్ధారించుకుని, బలవంతంగా ఆమెతో పురుగుల మందు తాగించాడు. ఈ అలికిడికి నిద్రలేచిన కుమారుడు అజయ్, గట్టిగా కేకలు వేస్తూ బయటకు పారిపోయి, స్థానికులను అప్రమత్తం చేశాడు.

“నిద్రలో ఉన్నప్పుడే ఈ దాడి జరిగి ఉండవచ్చు. అందుకే వారు ప్రతిఘటించలేకపోయారు. భార్యపై అనుమానమే ఈ ఘాతుకానికి ప్రధాన కారణం.”
– రవీంద్ర రెడ్డి, ఏసీపీ, సిద్దిపేట

ఆత్మహత్యా యత్నం.. కొనసాగుతున్న చికిత్స : కుమారుడు బయటకు పారిపోవడంతో, ఎల్లయ్య కూడా కత్తితో గొంతు కోసుకుని ఆత్మహత్యాయత్నం చేశాడు. స్థానికులు, బంధువులు వచ్చి, తీవ్ర గాయాలతో ఉన్న హర్షితను, ఎల్లయ్యను హుటాహుటిన ఆసుపత్రికి తరలించారు. కుమార్తె హర్షిత పరిస్థితి విషమంగా ఉన్నట్లు వైద్యులు తెలిపారు. నిందితుడు ఎల్లయ్యకు ప్రభుత్వాసుపత్రిలో చికిత్స అందిస్తున్నారు. అతనిపై హత్య, హత్యా యత్నం కింద పోలీసులు కేసు నమోదు చేశారు. ఉపాధి కోసం సోడాబండి నడుపుతూ, కూలి పనులకు వెళ్తూ కుటుంబాన్ని పోషిస్తున్న శ్రీలతపై, భర్తకు అనుమానం పెరిగిందని, గతంలో పెద్ద మనుషుల పంచాయితీ పెట్టినా అతనిలో మార్పు రాలేదని బంధువులు కన్నీరుమున్నీరయ్యారు.