Medak crime: మెదక్ జిల్లాలో కేవలం 22 రూపాయల చిల్లర బాకీ కోసం జరిగిన ఓ దారుణ హత్య ఉదంతం కలకలం రేపింది. ఈ కేసు వివరాలను తూప్రాన్ డీఎస్పీ నరేందర్గౌడ్ శనివారం మీడియా సమావేశంలో వెల్లడించారు.
స్నేహితుడిని రాయితో కొట్టి చంపిన కిరాతకుడు: రూ. 22 బాకీ కోసం ప్రాణం తీశాడు. ఉత్తరప్రదేశ్కు చెందిన సిరాజ్ (30), మహేశ్కుమార్ధర్మ ఇద్దరూ మెదక్ జిల్లా అనంతసాగర్ శివారులోని సప్తగిరి కెమికల్ పరిశ్రమలో కార్మికులుగా పని చేస్తున్నారు. వీరు ఒకే గదిలో నివసిస్తూ స్నేహితులుగా ఉండేవారు. అయితే సిరాజ్ తనకు బాకీ ఉన్న కేవలం రూ. 22 విషయమై వీరిద్దరి మధ్య గత కొంతకాలంగా వివాదం నడుస్తోంది.
హత్య జరిగిన తీరు: జనవరి 15న పండుగ సందర్భాన్ని పురస్కరించుకుని వీరిద్దరూ కలిసి మద్యం సేవించేందుకు గ్రామ శివారులోకి వెళ్లారు. అక్కడ మద్యం మత్తులో ఉండగా మళ్లీ బాకీ ప్రస్తావన రావడంతో గొడవ మొదలైంది. ఆగ్రహంతో ఊగిపోయిన మహేశ్కుమార్, సిరాజ్ తలను చెట్టుకు బలంగా బాదాడు. ఆపై అతడి తలపై రాయితో బలంగా కొట్టాడు. తీవ్ర రక్తస్రావం కావడంతో సిరాజ్ అక్కడికక్కడే ప్రాణాలు కోల్పోయాడు. హత్య అనంతరం నిందితుడు మహేశ్కుమార్ ఘటనా స్థలం నుండి పరారయ్యాడు.
నిందితుడి అరెస్ట్: ఘటనపై కేసు నమోదు చేసుకున్న తూప్రాన్ సీఐ రంగాకృష్ణ, చేగుంట ఎస్ఐ చైతన్యకుమార్రెడ్డి దర్యాప్తును వేగవంతం చేశారు. సాంకేతిక ఆధారాల సాయంతో నిందితుడి కదలికలను గుర్తించారు. మాసాయిపేట శివారులో మహేశ్కుమార్ను అదుపులోకి తీసుకున్నారు. పోలీసుల విచారణలో నిందితుడు తన నేరాన్ని అంగీకరించాడు. నిందితుడిని రిమాండ్కు తరలిస్తున్నట్లు డీఎస్పీ తెలిపారు.