రెండ్రోజుల క్రితం ఏపీలోని వైజాగ్ లో ఓ మహిళ మృతదేహం డ్రమ్ములో లభ్యమవడం కలకలం రేపింది. మధురవాడలోని వికలాంగుల కాలనీలో చోటుచేసుకున్న ఈ ఘటన రాష్ట్రవ్యాప్తంగా సంచలనం సృష్టించింది. మహిళను ఎవరు చంపి ఉంటారు, అత్యాచారం జరిగిందా ఇలా రకరకాల అనుమానాలు చర్చనీయాంశమయ్యాయి. మిస్టరీగా మారిన ఈ హత్య కేసును పోలీసులు సవాల్ గా తీసుకున్నారు. స్థానిక సీసీటీవీ ఫుటేజీలు, ఆ ఇంటి యజమాని చెప్పిన వివరాలను బట్టి హత్యకేసును ఒక్కరోజులోనే చేధించారు.
మృతురాలు శ్రీకాకుళంకు చెందిన ధనలక్ష్మిగా గుర్తించారు. రిషి అనే వ్యక్తి ఆమెను హత్య చేసినట్టు తేల్చారు. శ్రీకాకుళం బస్టాండ్ లో రిషి, ధనలక్ష్మి మధ్య పరిచయం ఏర్పడింది. ఆమెను రిషి మధురవాడలో తాను అద్దెకు ఉండే ఇంటికి తీసుకెళ్లాడు. అక్కడున్న వారు అడిగితే తన భార్య అని చెప్పాడు. కొన్నాళ్ల తర్వాత రిషిని ధనలక్ష్మి డబ్బులు డిమాండ్ చేసింది. అందుకు అతను నిరాకరించడంతో.. ఆ విషయమై ఇద్దరి మధ్య గొడవ అయింది. ఈ గొడవ పెద్దదైతే తన గురించి చుట్టుపక్కల వారంతా తప్పుగా అనుకుంటారని భావించిన రిషి.. ఆమె మెడకు చున్నీ బిగించి హత్యచేశాడు.
ఆ తర్వాత ముక్కలు ముక్కలుగా నరికి.. ఆమె మృతదేహాన్ని ఓ ప్లాస్టిక్ డ్రమ్ములో ఉంచి, ఆ ఇంటికి తాళం వేసి వెళ్లిపోయాడు. ఇంటి యజమాని అద్దె అడుగగా.. తన భార్య పుట్టింటికి వెళ్లిందని, ఆమె వచ్చాక ఇంటి అద్దె చెల్లిస్తానని చెప్పాడు. అలా ఏడాది గడిచిపోయింది. ఎంతకూ అద్దె చెల్లించకపోవడంతో.. ఇంటిని ఖాళీ చేయించేందుకు యజమాని అక్కడకు వెళ్లగా.. దుర్వాసన వచ్చింది. లోపలున్న ప్లాస్టిక్ డ్రమ్ములో చూడగా.. కుళ్లిన స్థితిలో ఉన్న మృతదేహం కనిపించింది. వెంటనే పోలీసులకు సమాచారమివ్వగా.. పోలీసులు మృతదేహాన్ని పోస్టుమార్టమ్ కు తరలించి, కేసును చేధించారు. నిందితుడైన రిషిని అరెస్ట్ చేశారు.
