చట్టాలకు, శిక్షలకు ఎవరూ భయపడటం లేదు. ఏ నేరమైనా మన దేశంలో మరణ శిక్ష అయితే విధించరు కదా అన్న ధీమాతో విచక్షణా రహితంగా ప్రవర్తిస్తున్నారు. దేశంలో జరుగుతున్న నేరాల్లో సగానికి పైగా అత్యాచార ఘటనలే ఉంటున్నాయి. ఆ తర్వాత హత్యలు ఎక్కువగా జరుగుతున్నాయి. మైనర్లు, యువతులు, మహిళలపై అఘాయిత్యాలకు పాల్పడేవారిని శిక్షించేందుకు ఎన్ని చట్టాలున్నా కామాంధులు మాత్రం రెచ్చిపోతూనే ఉన్నారు.
ఓ మహిళను గదిలో బంధించి.. నలుగురు వ్యక్తులు మూడ్రోజుల పాటు సామూహిక అత్యాచారానికి పాల్పడిన ఘటన విజయవాడలోని సనత్ నగర్లో జరిగింది. గత రాత్రి (డిసెంబర్ 19) మహిళ ఆస్పత్రిలో చేరడంతో ఈ విషయం వెలుగుచూసింది. పోలీసులు తెలిపిన వివరాల ప్రకారం.. నగరంలోని బెంజి సర్కిల్ వద్ద కూలిపనులు చేసుకునే ఓ మహిళను.. అదే ప్రాంతంలో సులభ్ కాంప్లెక్స్ లో పనిచేసే ఓ వ్యక్తి మాయమాటలు చెప్పి.. డిసెంబర్ 17న కానూరు సనత్ నగర్లోని ఓ గదిలోకి తీసుకెళ్లాడు. గదిలో ఆమెను బంధించి.. తన స్నేహితులైన మరో ముగ్గురికి సమాచారమిచ్చాడు.
మూడ్రోజుల పాటు ఆ నలుగురు బాధిత మహిళపై అత్యాచారానికి పాల్పడ్డారు. డిసెంబర్ 19 రాత్రి మహిళ తీవ్ర అస్వస్థతో స్థానికంగా ఉన్న ఓ ఆస్పత్రికి వెళ్లింది. మహిళను పరీక్షించిన వైద్యులు.. పెనమలూరు పోలీసులకు సమాచారమిచ్చారు. పోలీసులు బాధిత మహిళ నుండి వివరాలు సేకరించి.. నిందితులను అరెస్ట్ చేశారు. నిందితుల్లో ఒకరు శ్రీను, మరొకరు నాగరాజుగా తెలిసింది. వారిపై కేసు నమోదు చేసి, విచారణ చేస్తున్నారు.