Women Body Part Twitching:మన శరీరం అనుకోకుండా కొన్ని సందర్భాల్లో అదురుతుంది. అది కన్ను కావొచ్చు, పెదవి కావొచ్చు, చెయ్యి లేదా పాదం కావొచ్చు. ఈ అనుభవం చాలా మందికి జరిగే ఉంటుంది. కానీ దానికి కారణం ఏమిటో అనే ప్రశ్న మాత్రం చాలా మందికి తెలియదు. ప్రాచీన కాలంలో ఈ అదురులను ఒక ప్రత్యేకమైన శాస్త్రంతో అనుసంధానించారు. దాన్ని అంగస్ఫురణ శాస్త్రం అని పిలుస్తారు. ఈ శాస్త్రం ప్రకారం శరీర భాగం ఎప్పుడు, ఎలా అదురుతుందో దానిని బట్టి రాబోయే కాలంలో శుభమా అశుభమా అనేది తెలుస్తుందని నమ్మకం.
స్త్రీల విషయంలో
ముఖ్యంగా స్త్రీల విషయంలో ఈ అదురులు విభిన్న అర్థాలను సూచిస్తాయని జ్యోతిష్య గ్రంథాలు చెబుతున్నాయి. కొన్ని అదురులు మంచి పరిణామాలను ముందుగానే తెలియజేస్తే, కొన్ని సమస్యలు రాబోతున్నాయని హెచ్చరిస్తాయి. అందుకే వీటిని పట్టించుకోవాలని పెద్దలు చెప్పేవారు. ఇప్పుడు స్త్రీలకు సంబంధించిన ప్రధానమైన శరీర భాగాల అదురుల గురించి తెలుసుకుందాం.
కుడి కన్ను అదురుతుంటే..
స్త్రీలకు కుడి కన్ను అదురుతుంటే అది సాధారణంగా ప్రతికూల సూచనగా భావిస్తారు. ఈ అదురు ఇంట్లో వాగ్వాదాలు పెరిగే అవకాశం ఉందని, అనుకోని బాధాకరమైన వార్తలు వచ్చే అవకాశముందని తెలియజేస్తుంది. అందువల్ల ఈ సమయంలో కుటుంబంలో శాంతి కాపాడుకోవడం అవసరం అని నమ్మకం ఉంది.
పెదవి లేదా నోటి భాగం
పెదవి లేదా నోటి భాగం అదరడం కూడా ఒక ముఖ్యమైన సంకేతంగా చెప్పబడింది. ముఖ్యంగా కింది పెదవి అదురితే అది అశుభ ఫలితాన్ని సూచిస్తుందని అంటారు. మాటలతో తగాదాలు రావడం, మనస్పర్థలు పెరగడం లేదా అనుకోని అపశృతి జరగడం వంటివి జరగవచ్చని నమ్ముతారు. ఈ అదురు ఇతరులతో సంబంధాలలో దెబ్బతినే పరిస్థితి తలెత్తుతుందని కూడా భావిస్తారు.
అరచేయి అదురుతుంటే
చేతి భాగం, ముఖ్యంగా అరచేయి అదురుతుంటే అది ఆర్థిక పరిస్థితిపై ప్రతికూల ప్రభావం చూపుతుందని చెబుతారు. ఈ అదురు కారణంగా ఖర్చులు ఆకస్మికంగా పెరగడం లేదా ధనం నష్టపోవడం జరగవచ్చని సూచన. ఊహించని విధంగా డబ్బు చేజారిపోవడం వల్ల ఆర్థిక సమస్యలు తలెత్తే అవకాశముందని చెబుతారు. అందువల్ల ఈ సమయంలో డబ్బు వ్యవహారాల్లో జాగ్రత్తగా ఉండాలని సూచన.
పాదం అదరడం
పాదం అదరడం సాధారణంగా ప్రయాణ సంకేతంగా భావిస్తారు. కానీ అది సులభమైన ప్రయాణం కాకుండా కొన్ని ఇబ్బందులు ఎదుర్కోవలసి వస్తుందని నమ్ముతారు. ముఖ్యంగా మడమ భాగం అదురుతుంటే అది గొడవలు లేదా పెద్ద వాదనలు జరిగే సూచనగా చెప్పబడింది. అందువల్ల ఈ సమయంలో అవసరమైన జాగ్రత్తలు తీసుకోవాలని సూచిస్తారు.
కుడి కనుబొమ్మ
కుడి కనుబొమ్మ అదరడం కూడా స్త్రీలకు శుభకరంగా పరిగణించబడదు. ఇది కుటుంబ సభ్యులతో విభేదాలు, బంధువులతో తగాదాలు వచ్చే అవకాశాన్ని సూచిస్తుందని చెబుతారు. ఈ సమయంలో మనసును నియంత్రించుకుని అనవసరమైన వాదనలకు దూరంగా ఉండడం ద్వారా సమస్యలను తగ్గించుకోవచ్చని పండితులు సూచిస్తారు.
