Gold Loss-Vastu:భారతీయుల జీవితంలో బంగారం అనేది కేవలం ఆభరణం మాత్రమే కాదు, ఆచారం, విశ్వాసం, ప్రతిష్ట వంటి అంశాలతో ముడిపడి ఉంటుంది. పెట్టుబడిగా ఉపయోగించే ఈ లోహానికి హిందూ సంప్రదాయాల్లో ప్రత్యేకమైన స్థానం ఉంది. లక్ష్మీదేవి కరుణకు సంకేతంగా బంగారాన్ని భావించడం వల్లే చాలా మంది దీనిని పవిత్రమైనదిగా పరిగణిస్తారు.
బంగారం దొరికితే..
అయితే మనకు తరచుగా వినిపించే ఒక ప్రశ్న ఏమిటంటే, మార్గంలో నడుస్తూ వెళ్తూ బంగారం దొరికితే దాన్ని మనం ఉంచుకోవచ్చా? లేకపోతే వదిలేయాలా? ఇది శుభ సూచనమా లేక దురదృష్ట సంకేతమా? అనే సందేహాలకు జ్యోతిష్య శాస్త్రంలో కొన్ని స్పష్టమైన వివరణలు ఉన్నాయి.
బంగారం పోయినప్పుడు..
జ్యోతిష్య గ్రంథాల ప్రకారం ఎవరికైనా బంగారం పోయినప్పుడు అది వారి జాతకంలో కొన్ని ప్రతికూల గ్రహ ప్రభావాల కారణంగా జరిగిందని చెబుతారు. ముఖ్యంగా కేతువు, రాహువు, శని వంటి గ్రహాల అనుకూలత లేకపోతే బంగారం కోల్పోయే పరిస్థితి వస్తుంది అని నమ్మకం ఉంది. బంగారం పోయిన సందర్భంలో ఆ వ్యక్తికి వ్యాధులు, ఆర్థిక కష్టాలు, సమస్యలు కలగవచ్చని జ్యోతిష్యం చెబుతోంది. ఈ సంఘటన దురదృష్టానికి సంకేతమని కూడా భావిస్తారు.
ప్రతికూల ప్రభావం…
ఇక మరోవైపు రహదారిలో లేదా ప్రయాణంలో బంగారం దొరికితే చాలామంది దాన్ని అదృష్టం అనుకుంటారు. కానీ జ్యోతిష్య కోణంలో చూస్తే అది కూడా శుభం కాదని చెబుతారు. బంగారం లభించడం వలన బృహస్పతి, సూర్యుడు అనే రెండు ప్రధాన గ్రహాల ప్రతికూల ప్రభావం పెరుగుతుందని నమ్మకం. ఇది దురదృష్టానికి సూచనగా పరిగణిస్తారు.
కీర్తి తగ్గిపోవడం, ఆత్మవిశ్వాసం దెబ్బతినడం..
రోడ్డు మీద బంగారం దొరకడం వల్ల కీర్తి తగ్గిపోవడం, ఆత్మవిశ్వాసం దెబ్బతినడం, గౌరవం కోల్పోవడం జరుగుతుందని అంటారు. అంతేకాకుండా శారీరక ఆరోగ్యంపైనా ప్రతికూల ప్రభావం చూపుతుందని జ్యోతిష్య విశ్లేషణ చెబుతోంది.
అప్పుడు ఒకవేళ ఎవరికైనా బంగారం దొరికితే దాన్ని ఏమి చేయాలి అనే ప్రశ్న వస్తుంది. శాస్త్రాలు చెబుతున్నది ఏమిటంటే దొరికిన బంగారాన్ని మన వద్ద ఉంచుకోవడం మంచిది కాదని. దాన్ని వదిలించుకోవడం అవసరం అని నమ్ముతారు. ముఖ్యంగా గురువారం రోజు ఆ బంగారాన్ని బ్రాహ్మణుడికి ఇస్తే గ్రహ దోషాలు తగ్గుతాయని చెబుతారు.
ఈ విధంగా బంగారం దొరకడం గాని పోవడం గాని రెండూ శుభఫలితాలను ఇవ్వవని జ్యోతిష్య శాస్త్రంలో చెప్పారు. కీర్తి, ఆరోగ్యం, ఆర్థిక స్థితి అనే మూడు ప్రధాన అంశాలపైనా ప్రతికూల ప్రభావం చూపుతాయని విశ్వాసం ఉంది. అందుకే దొరికిన బంగారాన్ని మన వద్ద ఉంచుకోకుండా వదిలించుకోవాలని జ్యోతిష్య శాస్త్రం సూచిస్తోంది.
