Kalabhairava Jayanti- Karthika Masam:హిందూ క్యాలెండర్‌లో అత్యంత పవిత్రమైన నెలగా పరిగణించే కార్తీక మాసం అనేక ఆధ్యాత్మిక ఆచారాలు, వ్రతాలు, పూజలతో కళకళలలాడుతుంటుంది. ఈ మాసంలో ప్రతి రోజుకీ ప్రత్యేకత ఉంటుంది. దీపారాధనలు, దానాలు, ఉపవాసాలు చేయడం అత్యంత శుభప్రదంగా భావిస్తారు. ఈ సందర్భంలో నవంబర్ 12న జరుపుకునే కాలభైరవ జయంతి కూడా ప్రత్యేకమైన ఆధ్యాత్మిక వేడుకగా పండితులు వివరిస్తున్నారు. భక్తులు ఈ రోజున శివుని ఉగ్రరూపమైన కాలభైరవుడిని ఆరాధిస్తారు.
కాలభైరవాష్టమిగా…
భక్తి సంప్రదాయాల ప్రకారం, కార్తీక మాసంలోని అష్టమి తిథినే కాలభైరవాష్టమిగా పిలుస్తారు. ఈ రోజు భైరవుని పూజిస్తే వెయ్యిరెట్లు అధిక ఫలితాలు లభిస్తాయని పండితులు చెబుతుంటారు. భైరవ జయంతి సందర్భంగా ఆలయాలు, ఆశ్రమాలు భక్తులతో కిటకిటలాడుతాయి. ఈ రోజు శివుని అభిషేకం చేయడం, దీపారాధన, ఉపవాసం చేయడం భక్తుల ప్రధాన కర్తవ్యంగా భావిస్తారు.
కాలభైరవుడి పుట్టుక కథ
పురాణాల్లో భైరవుడు శివుడి కోపం నుంచి పుట్టిన వాడుగా చెబుతుంటారు. ఒక కథ ప్రకారం, దక్షుడు తన కుమార్తె సతీదేవిని తన యజ్ఞానికి ఆహ్వానించకపోవడంతో, ఆమె స్వయంగా అక్కడికి వెళ్ళి తండ్రి చేసిన అవమానాన్ని తట్టుకోలేక ఆత్మత్యాగం చేసింది. ఆ విషయం తెలిసిన శివుడు రౌద్రరూపంలో అక్కడికి చేరుకుని కోపంతో తన వెంట్రుకను భూమిపై విసరగా, ఆ వెంట్రుక నుండి కాలభైరవుడు ఆవిర్భవించాడని చెబుతారు. ఆయన దక్షుడిని శిక్షించి యజ్ఞాన్ని ఆపాడు. అనంతరం శివుడు తన కోపం చల్లార్చి దక్షుడికి క్షమాపణ ఇచ్చి అతనికి మేకతలను ప్రసాదించాడు. ఈ సంఘటన తరువాత నుంచే కార్తీక మాసం అష్టమి రోజున భైరవాష్టమి పండుగను జరుపుకునే సంప్రదాయం ఏర్పడిందని ప్రజలు నమ్ముతారు.
కాలభైరవ పూజా విధానం
కాలభైరవ జయంతి రోజున భక్తులు ఉదయాన్నే స్నానం చేసి శివాలయాలను సందర్శిస్తారు. కొందరు ఇళ్లలోనే శివలింగాన్ని అభిషేకం చేసి పూజలు నిర్వహిస్తారు. కాశీలో ఉన్న భైరవనాథ స్వామి ఆలయంలో భక్తులు భైరవుడికి మద్యాన్ని నైవేద్యంగా సమర్పిస్తారు. ఈ ఆచారం శతాబ్దాలుగా కొనసాగుతోంది.
శునకాలకు ఆహారం పెట్టడం..
అదే విధంగా, ఈ రోజున శునకాలకు ఆహారం పెట్టడం అత్యంత శుభప్రదంగా భావిస్తారు. భైరవుడు తన వాహనంగా కుక్కను ఎంచుకున్నందున భక్తులు కుక్కలకు చపాతీలు, పాలు పెట్టడం ద్వారా దైవానుగ్రహం పొందుతారని విశ్వసిస్తారు. అలాగే, ఈ రోజున ఉపవాసం చేయడం, సాయంత్రం దీపారాధన చేయడం, భైరవ మంత్రాలు జపించడం భక్తుల ఆధ్యాత్మిక శ్రద్ధలో భాగంగా ఉంటుంది.
పూజ వల్ల లభించే ఫలితాలు
పండితుల అభిప్రాయం ప్రకారం, కాలభైరవ జయంతి రోజున చేసే పూజలు శత్రు భయాలు, నెగటివ్ శక్తులు, దుష్టశక్తుల ప్రభావం నుండి రక్షణను అందిస్తాయని నమ్మకం ఉంది. ఈ రోజున శివుడికి అభిషేకం చేసి, కాలభైరవుని స్మరణ చేస్తే జీవితంలో ధైర్యం, స్థిరత్వం, ఆత్మవిశ్వాసం పెరుగుతుందని చెబుతారు. భైరవుడి ఆశీర్వాదం లభించినవారికి కార్యాల్లో విజయాలు, కుటుంబ శాంతి, ఆర్థిక పురోగతి వస్తుందని నమ్మకం ఉంది.
కాలభైరవ జయంతి ఆచారాలు
ఉత్తర భారత రాష్ట్రాల్లో కాలభైరవ జయంతి అత్యంత భక్తిపూర్వకంగా జరుపుకుంటారు. ముఖ్యంగా కాశీ, వారాణసి, ఉజ్జయిని వంటి పవిత్రక్షేత్రాల్లో భక్తులు రాత్రంతా జాగరణ చేసి భైరవుడికి పూజలు అర్పిస్తారు. ఆలయాల్లో ప్రత్యేక అభిషేకాలు, దీపోత్సవాలు నిర్వహిస్తారు. పేదలకు అన్నదానం చేయడం, వస్త్రదానం చేయడం ఈ రోజున ఎంతో శ్రేయస్కరమైన కార్యమని పండితులు సూచిస్తున్నారు. కొందరు భక్తులు ఈ రోజున శివాలయాల వద్ద వంద దీపాలు వెలిగించి భైరవుని కృప కోరుతారు.
భైరవుని ఆరాధన వెనుక భావం
భైరవుడు సమయం, మరణం, రక్షణకు ప్రతీకగా పరిగణిస్తారు. ఆయన భక్తులపై దయ చూపి వారికి భయం, దుష్టప్రభావాల నుండి రక్షణ కల్పిస్తాడని విశ్వసిస్తారు. జీవితంలో కష్టాలు, అడ్డంకులు ఎదుర్కొంటున్నవారు భైరవుని ఆరాధిస్తే వారి మార్గం సులభమవుతుందని భక్తులు నమ్ముతారు. కాలభైరవ జయంతి రోజున చేసే భక్తిపూర్వక పూజలు మనసు ప్రశాంతంగా ఉంచి, ఆధ్యాత్మిక చైతన్యాన్ని పెంచుతాయి.
