Navaratri Rituals: శారదీయ నవరాత్రి హిందూ సంప్రదాయంలో అత్యంత పవిత్రమైన పండుగగా భావిస్తారు. ప్రతి సంవత్సరం ఈ పండుగ శరదృతువులో ప్రారంభమై తొమ్మిది రోజుల పాటు భక్తిశ్రద్ధలతో కొనసాగుతుంది. ఈ కాలాన్ని దుర్గాదేవికి అంకితం చేసిన ప్రత్యేక సమయంగా పరిగణిస్తారు. భక్తులు ఇళ్లలో, దేవాలయాల్లో మరియు వివిధ పవిత్ర ప్రదేశాలలో దీపాలను వెలిగిస్తూ పూజలు చేస్తారు. నవరాత్రిలో దీపం వెలిగించడం కేవలం ఆచారం మాత్రమే కాకుండా ఆధ్యాత్మికంగా కూడా గొప్ప ప్రాధాన్యత కలిగినది. ఇది చీకట్లను తొలగించి మనసుకు ప్రశాంతతను, ఇంటికి శుభశక్తులను తెస్తుందని నమ్మకం ఉంది.
పూజా గదిలో దీపం…
నవరాత్రి సందర్భంగా తొలిస్థానంలో ఇంటి పూజా గదిలో దీపం వెలిగించడం అత్యంత ముఖ్యమైంది. పండుగ మొదటి రోజున వెలిగించిన దీపం నిరంతరం వెలుగుతూ తొమ్మిది రోజుల పండుగంతా కొనసాగాలి. దీనిని అఖండ జ్యోతి అని పిలుస్తారు. ఇది ఇంటిలో ప్రతికూల శక్తులను తొలగించి, సానుకూల వాతావరణాన్ని కలిగిస్తుందని భావిస్తారు. ఎవరైనా అఖండ జ్యోతి కొనసాగించలేకపోతే, ఉదయం, సాయంత్రం పూట తప్పకుండా నెయ్యి లేదా నూనెతో దీపం వెలిగించడం అవసరం.
ప్రధాన ద్వారం వద్ద కూడా…
ఇంట్లో పూజా స్థలంతో పాటు ప్రధాన ద్వారం వద్ద కూడా దీపాన్ని వెలిగించడం శుభప్రదంగా భావిస్తారు. ప్రధాన ద్వారం వద్ద దీపం వెలిగించడం వలన దేవతలు ఇంటిలోకి ప్రవేశిస్తారని భక్తులు నమ్ముతారు. దీని వలన ప్రతికూల ప్రభావాలు తొలగి, ఇంటిలో సంతోషం, శాంతి నెలకొంటుందని చెబుతారు. అందువల్ల చాలామంది ఇంటి ద్వారం రెండు వైపులా దీపాలను వెలిగించి పూజలు చేస్తారు.
తులసి మొక్క దగ్గర దీపం..
నవరాత్రి రోజుల్లో తులసి మొక్క దగ్గర దీపం వెలిగించడం కూడా ప్రత్యేకమైన ఆచారంగా ఉంది. హిందూ సంప్రదాయంలో తులసి పవిత్రమైన మొక్కగా పరిగణిస్తారు. సాయంత్రం సమయంలో తులసి వద్ద దీపం వెలిగిస్తే లక్ష్మీ దేవి అనుగ్రహం లభిస్తుందని నమ్మకం. ఈ పూజా విధానం ఇంటికి సంపద, ధాన్యసమృద్ధి తీసుకువస్తుందని ప్రజలు విశ్వసిస్తారు.
వంటగదిలో దీపం…
వంటగదిలో దీపం వెలిగించడం కూడా నవరాత్రి సమయంలో తప్పనిసరి అనుసరించే ఆచారాలలో ఒకటి. అన్నపూర్ణ దేవి వంటగదిలో నివసిస్తుందని హిందూ నమ్మకం. అందువల్ల వంటగదిలో దీపం వెలిగిస్తే ఇంట్లో ఆహార కొరత ఉండదని విశ్వసిస్తారు. ఇది కుటుంబ సభ్యుల ఆరోగ్యానికి కూడా శుభప్రదంగా పరిగణిస్తారు.
రావి చెట్టు కింద దీపం..
నవరాత్రి సందర్భంలో రావి చెట్టు కింద దీపం వెలిగించడం కూడా ఒక పవిత్ర ఆచారంగా చెప్పుకుంటారు. ఇంటి సమీపంలో రావి చెట్టు ఉంటే అక్కడ దీపం వెలిగించడం ద్వారా పితృ దోషం తొలగుతుందని అంటారు. రావి చెట్టులో త్రిమూర్తులతో పాటు అనేక దేవతలు నివసిస్తారని విశ్వాసం. అందువల్ల రావి చెట్టు కింద వెలిగించిన దీపం ఆధ్యాత్మిక ఫలితాలను ఇస్తుందని నమ్మకం.
దీపం వెలిగించేటప్పుడు కొన్ని ముఖ్యమైన నియమాలు పాటించాలి. నెయ్యి దీపాన్ని దేవత విగ్రహం కుడివైపున, నూనె దీపాన్ని ఎడమ వైపున ఉంచడం శాస్త్రసమ్మతం. దీపం వెలిగించడానికి స్వచ్ఛమైన నెయ్యి లేదా నువ్వుల నూనె వాడటం మంచిదని పండితులు సూచిస్తారు. దీపం వెలిగించే సమయంలో భక్తులు “ఓం దుం దుర్గాయై నమః” అనే మంత్రాన్ని జపించడం ద్వారా మరింత శుభఫలాలు కలుగుతాయని నమ్మకం.
