Pitru Paksha Rules: హిందూ సంప్రదాయంలో పితృపక్షం ఒక ప్రత్యేక ఆధ్యాత్మిక కాలంగా పరిగణిస్తారు. ఈ కాలాన్ని శ్రాద్ధ పక్షం అని కూడా పిలుస్తారు. పురాణాల ప్రకారం, ఈ పదిహేను రోజుల్లో పితృదేవతల ఆత్మలు భూమిపైకి వచ్చి తమ సంతానుల నుంచి నీరు, ఆహారం, దానం స్వీకరించి సంతృప్తి చెందుతారని విశ్వాసం ఉంది. ఈసారి పితృపక్షం సెప్టెంబర్ 7 నుంచి ప్రారంభమై సెప్టెంబర్ 21 వరకు కొనసాగుతుంది. ఈ రెండు వారాలు పితృదేవతల శాంతి కోసం శ్రాద్ధకార్యాలు, పిండప్రదానం, తర్పణం వంటి కార్యక్రమాలు నిర్వహించడం ఆచారంగా ఉంది.
మాంసాహారం …
పితృపక్షంలో వ్యక్తులు తమ ప్రవర్తనలో, ఆహారంలో నియమాలను పాటించటం ముఖ్యంగా చెప్పబడింది. సాత్విక జీవనశైలిని అనుసరించడం ద్వారా పూర్వీకులు సంతోషిస్తారని నమ్మకం. ఈ సమయంలో కొన్ని ఆహార పదార్థాలు తినకూడదని శాస్త్రాలు పేర్కొంటున్నాయి. అందులో మొదటగా మాంసాహారం చెప్పవచ్చు. మాంసం, చేపలు, గుడ్లు తామసిక స్వభావాన్ని కలిగిస్తాయి. ఇవి పితృదేవతల ఆత్మలకు ఇష్టంకావని పండితులు అంటున్నారు. పితృపక్షంలో వీటిని తినటం వలన పితృదోషం కలగొచ్చని సూచన ఉంది.
ఉల్లిపాయ, వెల్లుల్లి…
అలాగే ఉల్లిపాయ, వెల్లుల్లి వంటి పదార్థాలు కూడా ఈ కాలంలో మానుకోవాలని పెద్దలు చెబుతారు. వీటిని శ్రాద్ధం లేదా పూజల్లో ఉపయోగించడం శుభప్రదం కాదని సంప్రదాయం చెబుతోంది. ఉల్లిపాయ, వెల్లుల్లి రుచిని పెంచినా, పవిత్రతను తగ్గిస్తాయని నమ్మకం ఉంది. అందుకే పితృపక్షంలో ఇవి ఆహారంలో ఉండకూడదు.
పప్పులు, మసాలా పదార్థాలు…
ఇక పప్పులు, మసాలా పదార్థాలు కూడా జాగ్రత్తగా వాడాలని సూచన ఉంది. ముఖ్యంగా మినుము, కందిపప్పు వంటివి తామసిక గుణంలోకి వస్తాయని చెప్పబడింది. అధిక మసాలాలతో చేసిన వంటలు కూడా ఈ పవిత్ర సమయంలో తప్పుకోవాలని పండితులు వివరిస్తున్నారు. ఈ పదార్థాలు తినటం వలన పితృపక్షంలో ఆచరణలో ఉన్న పవిత్రత తగ్గుతుందని భావన ఉంది.
ధూమపానం వంటి అలవాట్లకు ..
పితృపక్షంలో కేవలం ఆహారం మీద మాత్రమే కాక, మొత్తం జీవనశైలిపై దృష్టి పెట్టాలి. మద్యపానం, ధూమపానం వంటి అలవాట్లకు దూరంగా ఉండటం అవసరం. ఈ కాలంలో బ్రహ్మచర్యం పాటించడం అత్యంత శ్రేష్టమని శాస్త్రాలు చెబుతున్నాయి. ప్రతి ఉదయం సూర్యుడికి ఆర్జ్యం సమర్పించడం, బ్రాహ్మణులకు లేదా అవసరమున్న వారికి దానం చేయడం ఆచరణలో భాగం. పేదలకు అన్నదానం చేయడం, పూజలలో పాల్గొనడం వంటివి పితృదేవతల ప్రసన్నతకు దారితీస్తాయని విశ్వాసం ఉంది.
పవిత్రత అవసరమని…
పితృపక్షం అనేది కేవలం శ్రాద్ధకార్యాలు చేయడం మాత్రమే కాకుండా, మన జీవనంలో నియమాలు పాటించడానికి ఒక అవగాహన సమయం. పూర్వీకుల ఆశీస్సులు పొందేందుకు మనం చేసే ప్రతి చర్యలో పవిత్రత అవసరమని ఈ కాలం గుర్తు చేస్తుంది. సాత్విక ఆహారం తీసుకోవడం, ఆధ్యాత్మికతను పెంపొందించడం, దానం చేయడం ద్వారా పితృదేవతలు ఆనందించి మన కుటుంబానికి శ్రేయస్సు కలిగిస్తారని పురాణాలు చెబుతున్నాయి.
