Puja Room-Vastu:హిందూ సంప్రదాయంలో ప్రతి ఇంట్లో పూజ గది అనేది ఆధ్యాత్మిక శక్తికి కేంద్రబిందువుగా భావిస్తారు. ఇంటిలోని చిన్న స్థలమైనా, పెద్దగదైనా అక్కడ దేవుని ప్రతిమలు, ఫోటోలు ఉంచి ప్రతిరోజూ పూజలు చేయడం సాధారణ పద్ధతి. అయితే పండితులు చెబుతున్నట్లుగా, పూజ గదిని ఏర్పాటు చేసే విధానం, అక్కడ ఉంచే ఫోటోలు, విగ్రహాలు, వాటి అమరిక వంటి అంశాలు చాలా ప్రాధాన్యత కలిగినవి. సరిగా పాటించకపోతే ఆధ్యాత్మిక ప్రభావం తగ్గిపోతుందని నమ్మకం ఉంది.
నవగ్రహాల పటం..
పూజ గదిలో మొదట ప్రస్తావనకు వచ్చే విషయం నవగ్రహాల పటం. చాలా మంది భక్తులు ఇంట్లోనే నవగ్రహాల పటాన్ని ఉంచి పూజిస్తే శుభం కలుగుతుందని భావిస్తారు. కానీ నిపుణుల అభిప్రాయం ప్రకారం ఇది సరైన పద్ధతి కాదు. నవగ్రహాల పటాన్ని ఇంటి పూజ గదిలో ఉంచకూడదని వారు స్పష్టంగా చెబుతున్నారు. దీని వెనుక కారణం, గ్రహాలకు సంబంధించిన పూజలు ప్రత్యేకంగా, నిర్ణీత పద్ధతుల్లో గుడిలో జరపాలని శాస్త్రాలు సూచిస్తున్నాయి. అందుకే ఇంట్లో వాటి పటాలు పెట్టకూడదని పండితులు హెచ్చరిస్తున్నారు.
తైలాభిషేకం..
ఇక శని భగవానుని ఫోటో లేదా విగ్రహాన్ని పూజ గదిలో ఉంచరాదు. శని అనేది కఠినమైన గ్రహ ప్రభావాన్ని కలిగించే దేవుడిగా పరిగణిస్తారు. ఆయనకు సంబంధించిన పూజలు కూడా గుడిలో మాత్రమే జరగాలని పెద్దలు చెబుతారు. ఇంట్లో శని స్వామికి తైలాభిషేకం చేయకూడదు. శనేశ్వరుడి ఆరాధన ప్రత్యేకమైన నియమాలతో జరగాల్సి ఉంటుంది. అందుకే శని స్వామి ఫోటో లేదా విగ్రహం పూజ గదిలో ఉంచకూడదని నిపుణులు సూచిస్తున్నారు.
పంచముఖ ఆంజనేయస్వామి విగ్రహం…
పంచముఖ ఆంజనేయస్వామి విగ్రహం లేదా ఫోటో విషయంలో కూడా కొన్ని నియమాలు ఉన్నాయి. దేవుడికి ప్రత్యేకమైన గది ఇంట్లో ఉంటే మాత్రమే పంచముఖ ఆంజనేయ స్వామిని ఉంచవచ్చు. కానీ ఆ గది లేకుండా హాల్‌లో లేదా వంటగదిలో పూజ స్థలం ఏర్పాటు చేసి ఉంటే ఆ ఫోటో పెట్టకూడదని చెబుతున్నారు. కారణం, పంచముఖ ఆంజనేయ స్వామి శక్తివంతమైన రూపం కావడంతో ప్రత్యేక స్థలం అవసరం అవుతుంది. కాబట్టి సరిగ్గా వేరుగా ఉన్న గది ఉంటేనే ఆ విగ్రహం లేదా ఫోటో పెట్టడం శ్రేయస్కరం.
తూర్పు లేదా పడమర వైపు…
ఇంకా పూజ గదిలో విగ్రహాలను ఏ దిశలో ఉంచాలి అనే విషయానికి వస్తే, తూర్పు లేదా పడమర వైపు అమర్చడం ఉత్తమంగా పరిగణించబడుతుంది. ఆ దిశల్లో పూజ చేస్తే శుభప్రభావం ఎక్కువగా ఉంటుందని పెద్దలు చెబుతారు. విగ్రహాలను గోడకు పూర్తిగా ఆనించి ఉంచడం కూడా మంచిది కాదని నిపుణులు అంటున్నారు. కొద్దిగా దూరం వదిలి అమర్చితే ధూపం, దీపాల సువాసన బాగా వ్యాపించి ఆ గదిలో ఆధ్యాత్మికత పెరుగుతుంది.
అలాగే విగ్రహాలు ఒకదానికొకటి ఎదురెదురుగా ఉండేలా పెట్టకూడదు. అలా చేస్తే పూజ గది వాతావరణంలో సమన్వయం తగ్గుతుందని నమ్మకం ఉంది. అందుకే దేవుళ్ల విగ్రహాలు, ఫోటోలు ఒకే దిశగా చూస్తూ ఉండేలా అమర్చడం శ్రేయస్కరం.
Also Read: https://teluguprabha.net/devotional-news/vastu-importance-of-northeast-direction-in-home/
పూజ గది శుభ్రత కూడా అత్యంత ముఖ్యమైన అంశం. ప్రతిరోజూ దీపం వెలిగించే ముందు గదిని శుభ్రం చేయడం అవసరం. గదిలో దుమ్ము, చెత్త ఉండకూడదు. పూజ సమయంలో ఉపయోగించే పూలు, పండ్లు, ప్రసాదం తాజాగా ఉండేలా చూసుకోవాలి. ఇలా చేస్తే ఆ గది ఆధ్యాత్మిక శక్తిని కలిగించే పవిత్రస్థలంగా మారుతుంది.
