Sabarimala Makarajyothi Darshan:శబరిమల అయ్యప్ప స్వామి క్షేత్రం ఈ సమయంలో భక్తుల జయజయధ్వానాలతో మారుమోగుతోంది. దేశంలోని వివిధ ప్రాంతాల నుంచి వచ్చిన లక్షలాది మంది అయ్యప్ప భక్తులు మాలధారణతో, ఇరుముడితో శబరిమల కొండకు చేరుకున్నారు. ప్రతి ఏడాది మకర సంక్రాంతి సందర్భంగా నిర్వహించే మకరజ్యోతి దర్శనానికి సంబంధించిన ఏర్పాట్లు పూర్తయ్యాయి. ఈ పవిత్ర ఘట్టాన్ని ప్రత్యక్షంగా వీక్షించేందుకు భక్తులు ఎంతో ఆత్రుతతో ఎదురుచూస్తున్నారు.

మకరజ్యోతి రూపంలో అయ్యప్ప..

బుధవారం సాయంత్రం పొన్నంబలమేడు కొండపై వెలిగే మకరజ్యోతి రూపంలో అయ్యప్ప స్వామి భక్తులకు దర్శనమివ్వనున్నారు. ఈ దివ్య క్షణాన్ని చూసేందుకు దేశవ్యాప్తంగా భక్తులు శబరిమలకు పోటెత్తారు. భద్రతా కారణాలు మరియు ఆలయ పరిధిలో ఉన్న ఆంక్షల నేపథ్యంలో శబరిమల కొండపైకి రోజుకు 40 వేల మందికి మాత్రమే అనుమతి ఇచ్చారు.

Also Read:https://teluguprabha.net/devotional-news/why-makar-sankranti-date-may-shift-from-january-14-to-15/

మకర సంక్రాంతి పుణ్యకాలం బుధవారం మధ్యాహ్నం 3 గంటల 13 నిమిషాలకు ప్రారంభం కానుంది. ఈ సమయంలో అయ్యప్ప స్వామికి ప్రత్యేక పూజలు, అభిషేకాలు నిర్వహించేందుకు ఆలయ అధికారులు ఏర్పాట్లు చేశారు. మేల్ శాంతులు, తంత్రులు స్వామివారికి సంప్రదాయ ప్రకారం విధులు నిర్వహించనున్నారు.

మహాదీపారాధన..

జనవరి 12న పందళం రాజప్రాసాదం నుంచి బయలుదేరిన అయ్యప్ప స్వామి పవిత్ర ఆభరణాలు బుధవారం సాయంత్రం 4 గంటల 30 నిమిషాల నుంచి 5 గంటల 20 నిమిషాల మధ్య సన్నిధానానికి చేరుకోనున్నాయి. ఈ ఆభరణాలను స్వామివారికి అలంకరించిన తర్వాత మహాదీపారాధన నిర్వహిస్తారు. దీపారాధన ముగిసిన అనంతరం పొన్నంబలమేడు కొండపై మకరజ్యోతి మూడు సార్లు దర్శనమివ్వనుంది.

సాయంత్రం 6 గంటల 30 నిమిషాల నుంచి 6 గంటల 45 నిమిషాల మధ్య మకరజ్యోతి దర్శనం అత్యంత స్పష్టంగా కనిపించే అవకాశం ఉంటుంది. ఈ సమయంలో సన్నిధానం, పంబ, శబరిమల కొండ, నీలిమల ప్రాంతాలు భక్తులతో నిండిపోయాయి. ఆలయంలో ఏర్పడిన రద్దీ కారణంగా బుధవారం ఉదయం 10 గంటల తర్వాత పంబ నుంచి సన్నిధానానికి భక్తుల ప్రవేశాన్ని తాత్కాలికంగా నిలిపివేశారు.

పొన్నంబలమేడు ప్రాంతంలో..

ప్రతి సంవత్సరం మకర సంక్రాంతి రోజున శబరిమల కొండలకు ఎదురుగా ఉన్న పొన్నంబలమేడు ప్రాంతంలో మకరజ్యోతి వెలుగుతుంది. ఈ దివ్య కాంతిని చూడాలనే ఆకాంక్షతో భక్తులు దీక్ష పూర్తి చేసుకుని శబరిమలకు వస్తారు. మకరవిలక్కు పర్వదినం రోజున అయ్యప్ప స్వామి జ్యోతి రూపంలో దర్శనమిస్తారని భక్తుల విశ్వాసం.

నీలిమల, కరిమల, శబరిమల, అప్పాచిమేడు..

నీలిమల, కరిమల, శబరిమల, అప్పాచిమేడు, అలుదామేడు వంటి పంచగిరుల ప్రాంతాలతో పాటు మొత్తం తొమ్మిది ప్రాంతాల నుంచి మకరజ్యోతి దర్శనం స్పష్టంగా కనిపిస్తుంది. అలాగే అయ్యప్ప సన్నిధానం, పాండితావళం, మాలికాపురం అట్టతోడు, నీలిమల హిల్‌టాప్, పులిమేడు, శరణ్ గుత్తి, మరకూట్టం, పంబ, శబరిమల ఎంట్రీ పాయింట్ల వద్ద నుంచి కూడా జ్యోతి వెలుగును చూడవచ్చు. అయినప్పటికీ ఎక్కువ మంది భక్తులు సన్నిధానం నుంచే మకరజ్యోతిని దర్శించేందుకు ప్రయత్నిస్తుంటారు.

తిరువాభరణ ఊరేగింపు..

తిరువాభరణ ఊరేగింపు శబరిమల ఉత్సవాల్లో అత్యంత ప్రాధాన్యత కలిగిన ఘట్టంగా భావిస్తారు. జనవరి 12న పందళం రాజప్రాసాదం నుంచి ప్రారంభమైన ఈ ఊరేగింపు జనవరి 14న సన్నిధానానికి చేరుకుంటుంది. ఈ నేపథ్యంలో నిలక్కల్ నుంచి పంబ వరకు, అలాగే పంబ నుంచి సన్నిధానం వరకు భక్తుల రాకపోకలపై కొన్ని సమయాల్లో ఆంక్షలు విధించారు.

జనవరి 12 ఉదయం నుంచి జనవరి 15 మధ్యాహ్నం వరకు హిల్‌టాప్ ప్రాంతంలో ప్రైవేట్ వాహనాల పార్కింగ్‌ను పూర్తిగా నిషేధించారు. భక్తులు తమ వాహనాలను నిలక్కల్ వద్దే నిలిపివేయాల్సి ఉంటుంది. ఎరుమేలి అటవీ మార్గంలో కూడా జనవరి 13 సాయంత్రం నుంచి రాకపోకలపై పరిమితులు విధించారు.

పందళం రాజవంశం..

అయ్యప్ప స్వామి ప్రత్యేక అభరణాల అలంకరణకు ఎంతో చరిత్ర ఉంది. పందళం రాజవంశం ఇచ్చిన మాట ప్రకారం ఈ అభరణాలకు ప్రత్యేక పూజలు నిర్వహిస్తారు. అనంతరం రాజవంశీయుల చేతుల మీదుగా తిరువాభరణ ఊరేగింపు ప్రారంభమవుతుంది.

ఈ ఏడాది తిరువాభరణ ఊరేగింపుకు దేవస్వం బోర్డు మొత్తం 30 మందితో కూడిన ప్రత్యేక బృందాన్ని నియమించింది. జనవరి 12న మధ్యాహ్నం 1 గంటకు పందళం రాజప్రాసాదం నుంచి ఊరేగింపు ప్రారంభమైంది. నారాయణ స్వామిరాజు నేతృత్వంలో, మారుతమాన శివనుట్టి గురుస్వామితో పాటు వేలాది మంది భక్తులు ఈ యాత్రలో పాల్గొన్నారు.

Also Read: https://teluguprabha.net/devotional-news/why-makar-sankranti-date-may-shift-from-january-14-to-15/

అటవీ మార్గంలో 50 కిలోమీటర్లకు పైగా నడుచుకుంటూ, కొండలు, రాళ్లు, లోయలు దాటుతూ మూడు రోజుల పాటు ఈ ఊరేగింపు సాగింది. మార్గమధ్యంలోని గ్రామాల్లో భక్తులు ఘన స్వాగతం పలికారు. బుధవారం మధ్యాహ్నానికి ఈ యాత్ర శబరిమల చేరుకుంటుంది.

మకరజ్యోతి ..

ఆభరణాలతో స్వామివారిని అలంకరించిన వెంటనే హారతి నిర్వహిస్తారు. ఆ తర్వాత పొన్నంబలమేడు మీద మకరజ్యోతి వెలుగుతుంది. ఈ జ్యోతి దర్శనంతో అయ్యప్ప దీక్ష పూర్తవుతుందని భక్తులు విశ్వసిస్తారు