Shukra Pradosh Vrat 2026: హిందూ ధర్మంలో ప్రదోష వ్రతానికి చాలా ప్రాముఖ్యత ఉంది. శివారాధనకు అత్యంత ప్రీతికరమైన ఈ వ్రతం.. 2026 జనవరి నెలలో ఆఖరిసారిగా జనవరి 30, శుక్రవారం నాడు వస్తోంది. శుక్రవారం నాడు వచ్చే ఈ ప్రదోషాన్ని ‘శుక్ర ప్రదోషం’ లేదా ‘భృగువార ప్రదోషం’ అని పిలుస్తారు. ఈ వ్రతం కేవలం శివానుగ్రహమే కాకుండా, లక్ష్మీదేవి కృపను కూడా ప్రసాదిస్తుందని పండితులు చెబుతున్నారు.

ప్రదోష వ్రతం తిథి మరియు సమయాలు
వైదిక పంచాంగం ప్రకారం, మాఘ మాస శుక్ల పక్ష త్రయోదశి తిథి జనవరి 30, 2026 శుక్రవారం ఉదయం 11:09 గంటలకు ప్రారంభమై.. జనవరి 31, 2026 శనివారం ఉదయం 08:25 గంటలకు వరకు ఉంటుంది. సాయంత్రం 05:59 నుండి రాత్రి 08:37 వరకు ప్రదోష కాల పూజ ముహూర్తం ఉంటుంది. పూజా సమయం సుమారు 2 గంటల 38 నిమిషాలుపాటు ఉంటుంది.

ముఖ్యమైన సమయాలు (జనవరి 30):
బ్రహ్మ ముహూర్తం: ఉదయం 05:25 నుండి 06:18 వరకు.

అభిజిత్ ముహూర్తం: మధ్యాహ్నం 12:13 నుండి 12:56 వరకు.

రాహుకాలం: ఉదయం 11:14 నుండి మధ్యాహ్నం 12:35 వరకు. ఈ సమయంలో ఎటువంటి శుభ కార్యాలు ప్రారంభించకూడదు.

లక్ష్మీదేవి అనుగ్రహం కలగాలంటే..
సాధారణంగా ప్రదోష వ్రతం శివ-పార్వతుల ఆరాధనకు ఉద్దేశించినది. అయితే ఈసారి ఇది శుక్రవారం రావడంతో దీనికి ఆధ్యాత్మికంగా రెట్టింపు ప్రాధాన్యత లభించింది. శుక్రవారం శుక్రుడికి అంకితం చేయబడింది. జాతకంలో శుక్ర దోషాలు ఉన్నవారు ఈ రోజున శివుడిని పూజించడం వల్ల శుక్ర గ్రహ దోషాలు తొలగి, భోగభాగ్యాలు కలుగుతాయి. శుక్రవారం లక్ష్మీదేవికి అత్యంత ప్రీతికరమైన రోజు. ఈ రోజున ప్రదోష కాలంలో పరమశివుడిని ఆరాధించడం వల్ల ఐశ్వర్యం, సంపద మరియు ఆర్థిక స్థిరత్వం లభిస్తాయని నమ్మకం. అందుకే దీనిని “లక్ష్మీ కృపను పొందే వ్రతం” అని పిలుస్తున్నారు. శుక్ర ప్రదోషం ఆచరించడం వల్ల భార్యాభర్తల మధ్య సఖ్యత పెరిగి, కుటుంబంలో శాంతి లభిస్తుంది.

Also Read: Mars Transit 2026 -హోలీ వేళ ఈ రాశుల వారిపై కుజుడి కనకాభిషేకం.. మీది ఉందా?

పూజా విధానం
ఈ రోజున భక్తులు రోజంతా ఉపవాసం ఉండి, సాయంత్రం ప్రదోష కాలంలో శివలింగానికి పాలు, గంగాజలం, బిల్వపత్రాలు, ధూపం, దీపాలతో అభిషేకం చేస్తారు. “ఓం నమః శివాయ” మంత్రాన్ని 108 సార్లు జపించాలి. అప్పుల బాధల నుండి విముక్తి, ఆరోగ్య ప్రాప్తి మరియు కోరిన కోరికలు నెరవేరుతాయని స్కంద పురాణం చెబుతోంది.