Solar Eclipse VS Pregnant Women:ఈ ఏడాది చివరి సూర్యగ్రహణం సెప్టెంబర్ 21న ఏర్పడనుంది. అయితే ఈ గ్రహణం భారతదేశంలో కనిపించకపోవడంతో మన దేశంలో దీనికి సంబంధించిన సూతక కాలం ఉండదు. అయినప్పటికీ, సూర్యగ్రహణం సందర్భాల్లో గర్భిణీలు తీసుకోవాల్సిన జాగ్రత్తల గురించి తరచూ చర్చ జరుగుతూ ఉంటుంది. పెద్దలు చెబుతున్న కొన్ని నియమాలు, శాస్త్రసంబంధ కారణాలు, అలాగే మన సంస్కృతిలో ఉన్న ఆచారాలు ఈ సందర్భంలో ప్రత్యేకంగా గుర్తు చేస్తున్నారు.
గర్భిణీలు పాటించాల్సిన నియమాలు..
సూర్యగ్రహణం కాలంలో గర్భిణీలు పాటించాల్సిన నియమాలు చాలా కఠినంగా చెబుతారు. ముఖ్యంగా ఈ సమయంలో మధ్యాహ్నం ఆహారం తీసుకోవడం మంచిది కాదని పండితులు సూచిస్తున్నారు. వంటగదిలో ఎక్కువసేపు ఉండటం, వంట పనులు చేయడం, కత్తులు లేదా సూదులు వంటి పదునైన వస్తువులను వాడటం దూరంగా ఉంచాలని సూచనలు ఉన్నాయి. ఎందుకంటే ఇవన్నీ గర్భంలో ఉన్న శిశువుపై ప్రతికూల ప్రభావం చూపుతాయని నమ్మకం ఉంది.
అలాగే సూర్యగ్రహణాన్ని నేరుగా కళ్లతో చూడకూడదని ప్రత్యేకంగా చెబుతారు. సూర్య కాంతి ఆ సమయంలో బలంగా ఉంటుందని, అది కళ్లకు హానికరంగా మారవచ్చని వైద్యులు కూడా హెచ్చరిస్తున్నారు. గర్భిణీలు మాత్రమే కాకుండా సాధారణంగా ఎవరికైనా సూర్యగ్రహణాన్ని నేరుగా చూడటం ప్రమాదకరమని చెబుతారు. గర్భిణీలు అయితే మరింత జాగ్రత్తలు తీసుకోవాలి. అందుకే ఆ సమయం ఇంట్లోనే ప్రశాంతంగా గడపడం, కిటికీలు తలుపులు మూసుకోవడం, శరీరానికి విశ్రాంతి ఇవ్వడం అవసరమని సూచిస్తున్నారు.
దహన సంస్కారాలు..
సూర్యగ్రహణం కాలంలో బయటకు వెళ్లకూడదనే నిబంధన కూడా ఉంది. ముఖ్యంగా దహన సంస్కారాలు జరుగుతున్న ప్రదేశాలకు వెళ్లకూడదని పెద్దలు చెబుతారు. ఇది శిశువుపై ప్రతికూల ప్రభావం చూపుతుందని భావిస్తారు. అలాగే జుట్టు కత్తిరించుకోవడం, గోర్లు తీయడం, పొడవైన ప్రయాణాలు చేయడం ఈ సమయంలో పూర్తిగా నివారించాలి. ఎందుకంటే ఇవన్నీ శరీరానికి ప్రతికూలతను కలిగించే అవకాశముందని అంటారు.
తులసి మొక్క..
భారతీయ సంస్కృతిలో తులసి మొక్కకు ఎంతో ప్రాధాన్యం ఉంటుంది. అయితే సూర్యగ్రహణం సమయంలో తులసిని తాకడం, నీరు పోయడం, ఆకులు కోయడం చాలా అశుభకరమని అంటారు. గర్భిణీలు ప్రత్యేకంగా ఈ నియమాన్ని పాటించాలని పండితులు సూచిస్తున్నారు. ఆహారంలో తులసి ఆకులు వాడాలనుకుంటే అవి ఒక రోజు ముందు కోసుకోవడం మంచిదని చెబుతున్నారు.
ఈ నియమాలు శాస్త్రీయంగా నిర్ధారించబడినవి కావనే విమర్శలు ఉన్నా, మన సమాజంలో తరతరాలుగా పాటిస్తున్న విశ్వాసాల కారణంగా చాలా కుటుంబాలు ఇంకా ఈ ఆచారాలను పాటిస్తూనే ఉన్నాయి. ముఖ్యంగా గర్భిణీల విషయంలో పెద్దలు మరింత జాగ్రత్తగా ఉండమని చెప్పడం వల్ల వారు కూడా ఆ సూచనలను పాటించడానికి ప్రయత్నిస్తారు.
