Vastu Shastra- Daily Rules:వాస్తు శాస్త్రం భారతీయ సంస్కృతిలో ప్రాచీన కాలం నుంచీ ఎంతో ప్రాముఖ్యత ఉన్న శాస్త్రం అన్న విషయం తెలిసిందే. ఇది కేవలం గృహ నిర్మాణానికి మాత్రమే కాకుండా, మన దైనందిన జీవితానికి కూడా మార్గదర్శకంగా ఉంటుంది. వారంలో ప్రతి రోజుకు సంబంధించి కొన్ని ప్రత్యేక నియమాలు వాస్తు శాస్త్రంలో చెప్పిన విషయాన్ని పండితులు వివరిస్తున్నారు. వీటిని పాటిస్తే జీవనంలో శాంతి, ఐశ్వర్యం కలుగుతాయని నమ్మకం ఉంది. ఈ నియమాలు కేవలం ఆధ్యాత్మిక దృక్పథం మాత్రమే కాకుండా, మన ఆలోచనలలో, పనులలో సమతుల్యత తీసుకువస్తాయని వాస్తు పండితులు చెబుతున్నారు.

సోమవారం

వాస్తు శాస్త్రం ప్రకారం సోమవారం రోజు నల్లరంగు దుస్తులు ధరించడం శుభంగా ఉండదని వాస్తు నిపుణులు , పండితులు చెబుతారు. ఈ రోజు చంద్రునికి అనుకూలంగా ఉండే తెలుపు లేదా లేత రంగులు ధరించడం ఉత్తమమని నమ్ముతారు. నల్లరంగు నెగెటివ్ ఎనర్జీని ఆకర్షిస్తుందని, అది మన మనసుపై ప్రభావం చూపుతుందని నమ్మకం. కాబట్టి ఈ రోజు లేత లేదా శాంతి సూచించే రంగులు ధరించడం మనసుకు ప్రశాంతతను ఇస్తుంది.

Also Read:https://teluguprabha.net/devotional-news/vastu-tips-for-wealth-and-peace-through-north-direction/

మంగళవారం

మంగళవారం నాడు అగ్నిదేవుడికి సంబంధించిన రోజు. ఈ రోజు కోపం, తడబాటు వంటి లక్షణాలు అధికంగా ఉండే అవకాశం ఉంటుందని వాస్తు శాస్త్రం చెబుతుంది. అందుకే ఈ రోజు చట్టపరమైన లేదా వివాదాస్పద విషయాలపై నిర్ణయాలు తీసుకోవడం మంచిదికాదని సూచిస్తారు. కోర్టు కేసులు, ఆర్థిక వాదనలు, వివాదాస్పద చర్చలు వంటి వాటిని ఈ రోజు ప్రారంభించడం నివారించాలి.

బుధవారం

బుధవారం రోజు బుద్ధుని ప్రాధాన్యత కలిగి ఉంటుంది. ఈ రోజు వాస్తు ప్రకారం ఎవరి దగ్గర నుంచైనా అప్పు తీసుకోవడం లేదా ఆర్థిక సహాయం కోరడం అనుకూలం కాదని చెప్పబడింది. ఈ రోజు స్వయంగా పనులు చేయడం, కొత్త పనుల ప్రణాళికలు సిద్ధం చేయడం శుభప్రదమని నమ్మకం. ఇతరులపై ఆధారపడకుండా, స్వయంగా నిర్ణయాలు తీసుకోవడం ఈ రోజున విజయాన్ని తెస్తుందని వాస్తు పండితులు అంటారు.

గురువారం

గురువారం గురుదేవుని రోజుగా పండితులు చెబుతారు. ఈ రోజు గోర్లు, వెంట్రుకలు కత్తిరించడం వాస్తు నియామల ప్రకారం అనుకూలం కాదని వివరిస్తారు. గురువు శక్తిని గౌరవించే రోజు కావున, శరీర మార్పులు లేదా శుభ్రత పనులు ఈ రోజు చేయకూడదని వాస్తు నియమాలు సూచిస్తాయి. ఈ రోజు జ్ఞాన సాధన, దానం, పూజలు చేయడం శ్రేయస్కరం.

శుక్రవారం

శుక్రవారం రోజు లక్ష్మీదేవికి సంబంధించిన రోజు. ఈ రోజు బంగారం, వెండి వంటి విలువైన వస్తువులను దేవాలయాలలో దానం చేయడం వాస్తు ప్రకారం సిఫార్సు చేయరాదు. శుక్రుని ప్రభావం ఉన్న ఈ రోజున దానం కంటే పూజ, భక్తి కార్యక్రమాలు చేయడం మేలని భావిస్తారు. సంపద నిలవాలంటే ఈ రోజు ధన సంబంధిత వ్యయాల్లో జాగ్రత్త అవసరం.

శనివారం

శనివారం శనిదేవునికి అంకితమైన రోజుగా పండితులు వివరిస్తుంటారు. ఈ రోజు ఇనుముతో సంబంధం ఉన్న వస్తువులు, పరికరాలు, కత్తెలు, కత్తెరలు లేదా ఇనుప వస్తువులు కొనకూడదని వాస్తు శాస్త్రం సూచిస్తుంది. శని గ్రహం ఇనుముతో అనుసంధానమై ఉండటంతో, ఆ వస్తువులు కొనడం దురదృష్టం తెస్తుందనే నమ్మకం ఉంది. ఈ రోజు సేవా కార్యక్రమాలు చేయడం, పేదలకు సహాయం చేయడం శుభప్రదమని పండితులు సూచిస్తారు.

ఆదివారం

ఆదివారం సూర్యదేవునికి విశేషమైన రోజుగా చెబుతుంటారు. ఈ రోజు సూర్యుని ఆరాధన శక్తి, ఆరోగ్యం అందిస్తుందని చెబుతారు. అయితే వాస్తు శాస్త్రం ప్రకారం ఈ రోజు తులసి పూజ చేయకూడదు. సూర్యుని వేడి ప్రభావం ఎక్కువగా ఉండే ఈ రోజున తులసి మొక్క విశ్రాంతి అవసరం అవుతుందని భావిస్తారు. అందుకే ఆదివారం తులసి మొక్కను తాకకూడదు, పూజ చేయకూడదు. సోమవారం తులసి పూజ చేయడం శుభప్రదంగా భావిస్తారు.

Also Read:https://teluguprabha.net/devotional-news/karthika-masam-satyanarayana-vratham-importance-explained/

ఈ నియమాలు కేవలం మూఢనమ్మకాలు కాదని, వాటి వెనుక ప్రాకృతిక, ఆధ్యాత్మిక సూత్రాలు ఉన్నాయని పండితులు చెబుతున్నారు. ప్రతి రోజు ఒక ప్రత్యేక శక్తిని కలిగి ఉంటుంది. ఆ శక్తి ప్రకారం మన చర్యలను నియంత్రించడం వల్ల మన జీవితంలో సమతుల్యత వస్తుంది. ఉదాహరణకు, సోమవారం చంద్రుని రోజు కాబట్టి మనసు శాంతిగా ఉండే రంగులు ధరించడం మంచిది. అదే విధంగా శనివారం శనిదేవుని ప్రభావం ఉన్నందున శాంతియుత పనులు చేయడం శ్రేయస్కరం.

ఆచరణలో వాస్తు ప్రాముఖ్యత

నేటి ఆధునిక జీవనశైలిలో ఈ నియమాలను పూర్తిగా పాటించడం సాధ్యంకాకపోయినా, వాటి సూత్రాన్ని గుర్తుంచుకోవడం మంచిది. వాస్తు శాస్త్రం మనలో సమతుల్య ఆలోచనలను పెంపొందిస్తుంది. కొన్ని నియమాలు శారీరక ఆరోగ్యానికి, మరికొన్ని మానసిక శాంతికి దోహదం చేస్తాయి.