Janaki Jayanti 2026: హిందూ ధర్మంలో మాతా సీతాదేవికి ప్రత్యేక స్థానం ఉంది. ప్రేమ, సహనం, త్యాగం మరియు మర్యాదకు ఆమె నిలువుటద్దం. మిథిలా నగర రాజైన జనక మహారాజు కుమార్తె, శ్రీరామ చంద్రుని ధర్మపత్ని అయిన సీతమ్మ జన్మదినాన్ని మనం ‘జానకీ జయంతి’ లేదా ‘సీతా అష్టమి’గా జరుపుకుంటాం. 2026లో ఈ పర్వదినం ఎప్పుడు వచ్చింది? ఆ రోజున అనుసరించాల్సిన పూజా విధానం ఏంటో ఇప్పుడు తెలుసుకుందాం.

తేదీ మరియు ముహూర్తం
పంచాంగం ప్రకారం ప్రతి ఏటా ఫాల్గుణ మాసం, కృష్ణ పక్ష అష్టమి తిథి నాడు జానకీ జయంతిని జరుపుకుంటారు. అష్టమి తిథి 9 ఫిబ్రవరి 2026, సోమవారం తెల్లవారుజామున 05:01 గంటలకు ప్రారంభమై.. 10 ఫిబ్రవరి 2026, మంగళవారం ఉదయం 07:27 గంటలకు ముగుస్తుంది. ఉదయ తిథి ప్రకారం 9 ఫిబ్రవరి 2026, సోమవారం నాడు జానకీ జయంతి వ్రతాన్ని ఆచరించాలి. ఈ రోజున భక్తిశ్రద్ధలతో సీతారాములను పూజిస్తే సకల శుభాలు కలుగుతాయని భక్తుల నమ్మకం.

పూజా విధానం
ఈ పవిత్రమైన రోజున బ్రహ్మ ముహూర్తంలో నిద్రలేచి, స్నానాది కార్యక్రమాలు ముగించుకుని పూజా మందిరాన్ని శుభ్రం చేసుకోవాలి. ఒక పీటపై ఎర్రటి వస్త్రాన్ని పరిచి సీతారాముల ప్రతిమను లేదా పటాన్ని ఉంచాలి. మాతా సీతమ్మకు ఎర్రటి చున్నీ (వస్త్రం) సమర్పించాలి. గాజులు, బొట్టు, సింధూరం వంటి 16 రకాల వస్తువులతో షోడశోపచార పూజ చేయాలి. సాత్వికమైన పిండివంటలు, పండ్లు నైవేద్యంగా పెట్టాలి. ధూప దీప నైవేద్యాల అనంతరం సీతారాముల అష్టోత్తరాలు చదువుతూ హారతి ఇవ్వాలి. పూజ ముగిసిన తర్వాత సుమంగళి స్త్రీలకు పసుపు, కుంకుమ, గాజులు దానం చేయడం వల్ల అఖండ సౌభాగ్యం కలుగుతుంది.

Also Read: Bhanu Saptami 2026 – భాను సప్తమి ఎప్పుడు? దాని విశిష్టత ఏంటి?

జానకీ జయంతి విశిష్టత
ఈ వ్రతాన్ని ఆచరించే మహిళల వైవాహిక జీవితం సుఖమయంగా ఉంటుంది. భర్తకు దీర్ఘాయుష్షు లభిస్తుంది. వివాహం కాని యువతులు ఈ వ్రతాన్ని పాటిస్తే సీతమ్మ తల్లి ఆశీస్సులతో మంచి గుణవంతుడైన భర్త లభిస్తాడని నమ్మకం. మాతా జానకిని పూజించడం వల్ల ఇంట్లో సుఖశాంతులు వెల్లివిరుస్తాయి.