Skanda Shashti 2026 Date: ధైర్యం, జ్ఞానం మరియు విజయానికి అధిదేవత అయిన కుమారస్వామి (మురుగన్)కు అంకితం చేయబడిన పవిత్రమైన రోజు స్కంద షష్ఠి. ప్రతి నెలలో వచ్చే షష్ఠి తిథి మురుగన్ భక్తులకు ఎంతో ముఖ్యమైనది. ముఖ్యంగా 2026 జనవరిలో వచ్చే మాఘ మాస శుక్ల పక్ష షష్ఠికి ఆధ్యాత్మికంగా విశేష ప్రాధాన్యత ఉంది. ఇది ఏ తేదీన వచ్చిందో తెలుసుకుందాం.
తిథి వివరాలు:
స్కంద షష్ఠి తేదీ: జనవరి 24, 2026 (శనివారం)
షష్ఠి తిథి ప్రారంభం: జనవరి 24, తెల్లవారుజామున 01:46 గంటలకు
షష్ఠి తిథి ముగింపు: జనవరి 25, తెల్లవారుజామున 12:39 గంటలకు
స్కంద షష్ఠి నాడు ఏం చేయాలి?
మురుగన్ అనుగ్రహం పొందడానికి భక్తులు సూర్యోదయానికి ముందే నిద్రలేచి, తలస్నానం చేసి శుభ్రమైన దుస్తులు (ముఖ్యంగా తెలుపు లేదా లేత రంగు వస్త్రాలు) ధరించాలి. రోజంతా ఉపవాసం ఉండాలి. వీలుకాని పక్షంలో పాలు, పండ్లు లేదా సాత్విక ఆహారాన్ని ఒకపూట తీసుకోండి. “ఓం శరవణ భవ” మంత్రాన్ని 108 సార్లు జపించాలి. సుబ్రహ్మణ్య అష్టకం లేదా స్తోత్రాలను పఠించడం వల్ల మనశ్శాంతి కలుగుతుంది. వీలైతే సుబ్రహ్మణ్య స్వామి దేవాలయాన్ని సందర్శించి అభిషేకం చేయించుకోవాలి. పేదలకు ఆహారం లేదా వస్త్రాలను దానం చేయడం వల్ల స్వామి వారి ఆశీస్సులు లభిస్తాయి.
ఏం చేయకూడదు?
ఈరోజున తామసిక ఆహారం ముట్టకూడదు. ముఖ్యంగా మాంసాహారం, ఉల్లి, వెల్లుల్లి వంటివి తినకూడదు. మద్యపానానికి దూరంగా ఉండాలి. అబద్ధాలు ఆడటం, ఇతరులను దూషించడం వంటివి చేయకూడదు. మాటపై నియంత్రణ కలిగి ఉండాలి. కఠినమైన పనులు లేదా అనవసరమైన విలాసాలకు దూరంగా ఉండి, రోజంతా ఆధ్యాత్మిక చింతనలో గడపాలి.
Also Read: Ganesh Chaturthi 2026 -గౌరీ గణేశ చతుర్థి నేడే.. పూజా విధానం తెలుసా?
స్కంద షష్ఠి వ్రత ఫలితాలు
స్కంద షష్ఠి వ్రతాన్ని భక్తితో ఆచరించడం వల్ల మీ మానసిక స్థైర్యం పెరిగి, భయం, ఆందోళనలను తొలగిపోతాయి. అంతేకాకుండా కుజ గ్రహ దోషాల ప్రభావం తగ్గుతుంది.విద్య, ఉద్యోగాల్లో ఎదురయ్యే ఆటంకాలు తొలగి విజయం లభిస్తుంది. దీని వల్ల మనలోని అజ్ఞానాన్ని తొలగించి సరైన మార్గంలో నడిపిస్తుంది.