Rangoli- Vastu Shastra:భారతీయ సంస్కృతిలో ముగ్గు ఎంతో ముఖ్యమైన భాగమో అందరికీ తెలిసిందే. ఉదయాన్నే ఎంతో మంది తమ ఇళ్ల ముందు అందమైన ముగ్గులు తీర్చిదిద్దుతుండడం మనం ఏదోక సందర్భంలో చూస్తూనే ఉంటాం. కేవలం రంగులతో చేసే అలంకారమే కాదు, ఇల్లు మొత్తం సానుకూల శక్తులతో నింపే ఒక వాస్తు చిహ్నం అని నమ్మకం ఉంది. మన పూర్వీకులు ప్రతి ఉదయం ఇంటి ముందు ముగ్గు వేయడం శుభప్రదమని భావించేవారు. ఎందుకంటే, ఈ చర్య ఇంటి వద్దకు లక్ష్మీదేవిని ఆహ్వానించడమే కాకుండా, దుష్టశక్తులను బయటకు పంపివేస్తుందనే నమ్మకం ఉంది.
ఇంటి ప్రధాన ద్వారం…
వాస్తు శాస్త్రం, జ్యోతిషశాస్త్రం కూడా ఈ భావనను బలపరుస్తాయి. ఇంటి ప్రధాన ద్వారం వాస్తు ప్రకారం శక్తుల ప్రవేశ ద్వారం అని చెబుతారు. అందుకే ప్రతి ఉదయం ఇంటి ముందు శుభరంగులతో ముగ్గు వేయడం సాంప్రదాయంగా మారింది. కానీ చాలామంది ఇంటి లోపల గదులలో లేదా బెడ్‌రూమ్ దగ్గర కూడా ముగ్గులు వేయడం సరైనదని భావిస్తారు. వాస్తు శాస్త్రం ప్రకారం ఇది మంచిది కాదని స్పష్టంగా పెద్దలు ,పండితులు చెబుతుంటారు.
ఇంటి లోపల ముగ్గు..
ఇంటి లోపల ముగ్గు వేయకూడదని చెప్పడానికి ప్రధాన కారణం శక్తి సమతుల్యత. ప్రతి ఇంటిలో శక్తి ప్రవాహం సమతుల్యంగా ఉండాలి. ప్రధాన ద్వారం వద్ద ముగ్గు వేయడం ద్వారా బయట నుండి వచ్చే ప్రతికూల శక్తి తటస్థమవుతుంది. కానీ అదే ముగ్గును గదుల మధ్య లేదా మంచం దగ్గర ఉంచితే, ఆ ప్రదేశంలోని శాంతి మరియు స్థిరత్వం దెబ్బతింటాయని వాస్తు నిపుణులు చెబుతున్నారు.
ముగ్గు ఎక్కడ వేయాలో…
ముగ్గు ఎక్కడ వేయాలో, ఏ రంగులు ఉపయోగించాలో కూడా వాస్తు శాస్త్రంలో స్పష్టమైన సూచనలు ఉన్నాయి. ఇంటి ఉత్తర, తూర్పు లేదా ఈశాన్య దిశల్లో ముగ్గు వేయడం శుభప్రదం. ఈ దిశలు సానుకూల శక్తులు ప్రవేశించే మార్గాలుగా పరిగణిస్తారు. ఈ ప్రాంతాల్లో పసుపు, ఆకుపచ్చ లేదా నీలం రంగులు ఉపయోగిస్తే ఇల్లు ఆధ్యాత్మికంగా, ఆర్థికంగా అభివృద్ధి చెందుతుందని చెబుతారు. అదే దక్షిణం లేదా నైరుతి దిశల్లో ముగ్గు వేయడం వాస్తు ప్రకారం శుభకరం కాదని హెచ్చరిస్తారు.
శుభశక్తులను అవమానించినట్లు..
ఇంటి లోపల ముగ్గు వేయకూడదని చెప్పడానికి మరో కారణం కూడా ఉంది. ఇంటి సభ్యులు లేదా అతిథులు గదులలో తిరుగుతారు, అందువల్ల వారు తప్పుగా ముగ్గుపై కాలు వేయవచ్చు. ఇది శుభశక్తులను అవమానించినట్లుగా పండితులు వివరిస్తున్నారు. వాస్తు ప్రకారం, ఈ చర్య లక్ష్మీదేవి ఆశీర్వాదాలను దూరం చేస్తుందని నమ్మకం ఉంది. అందుకే ముగ్గును ఎల్లప్పుడూ ఇంటి ముందుభాగంలో లేదా పూజ గది వెలుపల వేయడం మంచిదని సూచిస్తారు.
సౌందర్యంతో పాటు శాంతి..
ప్రతి ఉదయం ముగ్గు వేయడం వలన ఇంటి వాతావరణం సౌందర్యంతో పాటు శాంతితో నిండి ఉంటుంది. పసుపు, చక్కెర, పిండి వంటి సహజ పదార్థాలతో వేసే ముగ్గులు పాజిటివ్ ఎనర్జీని పెంచుతాయి. ఆ రంగుల ప్రకాశం మనసుకు సాంత్వన కలిగిస్తూ, ఆధ్యాత్మికంగా మనసును సేదతీరుస్తుంది. ఇంటి సభ్యులు ఆ ముగ్గును చూసినప్పుడు మానసికంగా శుభాభిప్రాయం కలుగుతుంది.
ఈశాన్య దిశను…
వాస్తు ప్రకారం ముగ్గు వేయడానికి ఈశాన్య దిశను అత్యంత శుభప్రదంగా పరిగణిస్తారు. ఈ దిశ దేవతా శక్తులు, నీటి శక్తులు ప్రసరిస్తున్న ప్రదేశంగా భావిస్తారు. అందుకే ఈ ప్రాంతంలో ముగ్గు వేస్తే ఆ ఇంటి ఆర్థిక స్థిరత్వం, కుటుంబ సౌఖ్యం పెరుగుతాయని నమ్మకం ఉంది. తులసి మఠం ముందు ముగ్గు వేయడం కూడా లక్ష్మీ కటాక్షం కోసం చేయదగిన అత్యుత్తమ పద్ధతి అని వాస్తు శాస్త్రం సూచిస్తుంది.
శుభశక్తులు వేగంగా ఇంట్లోకి..
వాస్తు నిపుణులు చెబుతున్న మరో అంశం ఏమిటంటే, ముగ్గు గీసే సమయం కూడా శుభంగా ఉండాలి. ఉదయం సూర్యోదయానికి ముందే లేదా ఆ సమయంలో ముగ్గు వేస్తే శుభశక్తులు వేగంగా ఇంట్లోకి ప్రవేశిస్తాయని చెబుతారు. సాయంత్రం సమయంలో కూడా దీపాల సమయానికి ముగ్గు వేయడం మంచిదే, ఎందుకంటే ఆ సమయంలో సానుకూల శక్తులు సక్రియమవుతాయి.
ముగ్గులో గీయబడే చిహ్నాలు కూడా వాస్తు ప్రకారం ప్రత్యేక అర్థాలను కలిగి ఉంటాయి. ‘ఓం’, ‘స్వస్తిక్’, ‘పాదాలు’, ‘పుష్పాలు’ వంటి ఆకృతులు శుభప్రతీకాలుగా పరిగణిస్తారు. ఇవి సానుకూల శక్తులను ఆకర్షిస్తాయి. కానీ ఇంటి లోపల ఈ చిహ్నాలను వేయడం వల్ల ఆ శక్తులు అడ్డంకులు ఎదుర్కొనే అవకాశం ఉందని చెబుతారు. అందుకే వీటిని కేవలం ప్రధాన ద్వారం వద్ద లేదా పూజ గది వెలుపల వేయడమే సరైనది.
