మన ఆరోగ్యం మనం తీసుకునే ఆహారం పై ఆధారపడి ఉంటుంది. ఆరోగ్యంగా ఉండాలంటే డైట్ లో పండ్లు, తాజా కూరగాయలను చేర్చుకోవాలి. అయితే పండ్లలో భాగంగా బ్లూ బెర్రీస్ తింటే ఆరోగ్యానికి ఎన్నో ప్రయోజనాలు కలుగుతాయి. వీటిని సూపర్ ఫుడ్ అని పిలవడంలో ఆశ్చర్యం లేదు. ఈ నీలిరంగు పండ్లు కేవలం రుచిగా ఉండడమే కాకుండా శరీరానికి కావాల్సిన పోషకాలను, ముఖ్యంగా యాంటీ ఆక్సిడెంట్లను అందిస్తుంది. అయితే క్రమం తప్పకుండా బ్లూ బెర్రీస్ ను తినడం ద్వారా కలిగే ఆరోగ్య ప్రయోజనాల గురించి ఇప్పుడు తెలుసుకుందాం.
బ్లూబెర్రీస్‌లో యాంతోసైనిన్స్ అనే ఫ్లవనాయిడ్స్ ఉంటాయి. ఇవి మన శరీరంలోని ఫ్రీ రాడికల్స్ వల్ల కలిగే ఆక్సీకరణ ఒత్తిడిని తగ్గిస్తాయి. ఫలితంగా కణాలు దెబ్బతినకుండా కాపాడి, వృద్ధాప్యాన్ని ఆలస్యం చేస్తాయి. అంతేకాకుండా ఇవి గుండె జబ్బులు, క్యాన్సర్ వంటి వ్యాధుల ప్రమాదాన్ని దూరం చేస్తుంది.
బ్లూబెర్రీస్‌లో ఉండే యాంటీ ఆక్సిడెంట్లు మెదడు ఆరోగ్యాన్ని కాపాడుతుంది. ఇవి మెదడులోని నరాల మధ్య కమ్యూనికేషన్‌ను మెరుగుపరచి జ్ఞాపకశక్తిని, ఏకాగ్రతను పెంచుతాయి.
బ్లూబెర్రీస్‌లో ఉండే ఫైబర్, పొటాషియం, ఫోలేట్ , యాంటీఆక్సిడెంట్లు రక్తపోటును నియంత్రిస్తుంది. ఇవి మంచి కొలెస్ట్రాల్ స్థాయిలను పెంచుతాయి. తద్వారా గుండెపోటు, స్ట్రోక్ వంటి సమస్యలు దూరంగా ఉంటాయి.
బ్లూబెర్రీస్ తక్కువ గ్లైసెమిక్ ఇండెక్స్ కలిగి ఉంటాయి. ఇవి రక్తంలో చక్కెర స్థాయిలను వేగంగా పెంచవు. ఈ పండ్లలో ఉండే యాంతోసైనిన్స్ ఇన్సులిన్ సెన్సిటివిటీని మెరుగుపరుస్తాయి. తద్వారా టైప్ 2 మధుమేహాన్ని నియంత్రించడంలో సహాయపడతాయి.
బ్లూబెర్రీస్‌లో పీచుపదార్థం అధికంగా ఉంటుంది. ఇది జీర్ణక్రియను మెరుగుపరుస్తుంది. మలబద్ధకాన్ని నివారిస్తుంది.అంతేకాకుండా ఈ పండ్లు క్రమమైన పేగు కదలికలకు సహాయపడి ఆరోగ్యకరమైన జీర్ణవ్యవస్థకు తోడ్పడుతుంది.
