Ashwagandha Benefits:  ఆయుర్వేదం అనగానే గుర్తొచ్చే ముఖ్యమైన ఔషధ మూలికలలో అశ్వగంధ ఒకటి. శతాబ్దాలుగా వైద్యపద్ధతుల్లో దీన్ని వాడుతున్నారు. శరీరానికి శక్తి ఇవ్వడం, రోగనిరోధక శక్తిని పెంచడం, మానసిక ఒత్తిడిని తగ్గించడం వంటి అనేక ప్రయోజనాలు ఈ మూలిక ద్వారా లభిస్తాయని వైద్య గ్రంథాల్లో పేర్కొన్నారు. ప్రత్యేకంగా దీని వేర్ల నుండి వచ్చే ప్రత్యేక వాసన కారణంగానే దీనికి “అశ్వగంధ” అనే పేరు వచ్చిందని అంటారు.

సహజ శక్తివర్థకంగా…

అశ్వగంధను సహజంగా శక్తివర్థకంగా వర్ణిస్తారు. ఇది శరీరంలోని ఇన్ఫ్లమేషన్ తగ్గించడంలో, హానికరమైన ఫ్రీ రాడికల్స్‌ నుండి రక్షణ కల్పించడంలో, బ్యాక్టీరియల్‌ ఇన్ఫెక్షన్లను ఎదుర్కొనడంలో సహాయపడుతుంది. దీని వల్లే దీన్ని చాలా మంది “మహౌషధం”గా భావిస్తారు. కానీ ఏ ఔషధానికైనా రెండు వైపులుంటాయి అన్నట్టుగానే, అశ్వగంధ కూడా ప్రతి ఒక్కరికీ సురక్షితమని చెప్పలేం. కొన్ని పరిస్థితుల్లో దీని వాడకం పెద్ద సమస్యలకు దారితీస్తుందని వైద్య నిపుణులు హెచ్చరిస్తున్నారు.

Also Read: https://teluguprabha.net/health-fitness/pink-salt-vs-table-salt-which-is-better-for-health/

తక్కువ రక్తపోటుతో బాధపడుతున్న వారు అశ్వగంధ తీసుకోవడం అత్యంత ప్రమాదకరం. ఎందుకంటే ఈ మూలిక రక్తపోటును ఇంకా తగ్గించే అవకాశం ఉంది. ఇలాంటి పరిస్థితుల్లో మూర్ఛలు, బలహీనత, తలనొప్పి వంటి సమస్యలు తలెత్తే అవకాశం ఉందని నిపుణులు చెబుతున్నారు. అలాగే గర్భిణీ స్త్రీలు దీన్ని వాడకూడదని స్పష్టంగా చెబుతున్నారు. అశ్వగంధలో ఉండే ప్రభావాలు గర్భధారణ సమయంలో హానికరంగా మారే అవకాశం ఉండటంతో, ఈ సమయంలో వాడకాన్ని పూర్తిగా నివారించమని వైద్యులు సూచిస్తున్నారు.

పాలిచ్చే తల్లులకు..

అదే విధంగా పాలిచ్చే తల్లులకు కూడా అశ్వగంధ సురక్షితమని తేలిపోలేదు. శిశువుపై దాని ప్రభావం ఎలా ఉంటుందో ఇంకా పూర్తిగా అర్థం కాలేదు. అందువల్ల తల్లులు, శిశువు ఆరోగ్యం దృష్ట్యా ఈ మూలిక వాడకాన్ని నివారించడం మంచిదని నేషనల్ ఇనిస్టిట్యూట్ ఆఫ్ హెల్త్ పరిశోధకులు స్పష్టం చేశారు.

థైరాయిడ్‌..

అశ్వగంధ థైరాయిడ్‌పై కూడా ప్రభావం చూపుతుందని చెబుతున్నారు. ముఖ్యంగా హైపర్ థైరాయిడ్ ఉన్నవారు దీన్ని తీసుకుంటే హార్మోన్ల అసమతుల్యత మరింత పెరిగే అవకాశం ఉంది. థైరాయిడ్ సమస్యలతో ఉన్నవారు డాక్టర్ సలహా లేకుండా ఈ మూలికను తీసుకోవడం చాలా ప్రమాదకరమని నిపుణులు సూచిస్తున్నారు.

Also Read: https://teluguprabha.net/gallery/tulsi-water-health-benefits-and-immunity-boosting-properties/

నిద్ర సమస్యలతో బాధపడేవారికి అశ్వగంధ ఒక సహాయక మూలికగా భావించబడుతుంది. ఇది శాంతినిచ్చి నిద్రకు తోడ్పడుతుంది. కానీ ఇప్పటికే నిద్ర మాత్రలు తీసుకుంటున్నవారు జాగ్రత్తగా ఉండాలి. అశ్వగంధ, ఆ మందుల ప్రభావాన్ని మరింత పెంచుతుంది. దీని ఫలితంగా అధిక నిద్ర, మత్తు, శరీర సమన్వయ లోపం వంటి సమస్యలు తలెత్తవచ్చు.

ఇంకా ఒక ముఖ్యమైన విషయం ఏమిటంటే, ఎక్కువ మొత్తంలో అశ్వగంధను తీసుకోవడం కడుపుకు ఇబ్బంది కలిగిస్తుంది. గ్యాస్ట్రిక్ సమస్యలు, విరేచనాలు, వాంతులు వంటి సమస్యలు రావచ్చు. దీనిని ఒక సహజ ఔషధం కాబట్టి ఎలాంటి సమస్య ఉండదని భావించి అధికంగా తీసుకోవడం చాలా పెద్ద తప్పు అవుతుందని వైద్యులు హెచ్చరిస్తున్నారు.

అద్భుతమైన ఔషధంలా..

అశ్వగంధను సరైన మోతాదులో, వైద్యుల సూచనలతో మాత్రమే వాడితే ఇది నిజంగా అద్భుతమైన ఔషధంలా పనిచేస్తుంది. రోగనిరోధక శక్తి పెరుగుతుంది, శక్తి స్థాయులు మెరుగుపడతాయి, ఒత్తిడి తగ్గుతుంది. కానీ నిర్దిష్ట పరిస్థితుల్లో ఉన్న వారు దీన్ని వాడకూడదని నిపుణులు మళ్లీ మళ్లీ చెబుతున్నారు.

అందువల్ల అశ్వగంధ వాడకానికి ముందు వ్యక్తిగత ఆరోగ్య పరిస్థితిని పరిగణలోకి తీసుకోవాలి. వైద్యుల సలహా లేకుండా ఈ మూలికను ఉపయోగించడం అనర్థాలకు దారితీస్తుంది. ముఖ్యంగా గర్భిణీ స్త్రీలు, పాలిచ్చే తల్లులు, రక్తపోటు సమస్యలున్నవారు, థైరాయిడ్ సమస్యలతో బాధపడేవారు దీన్ని తీసుకోవడం పూర్తిగా నివారించాలి.