Avoid these White food in your regular diet: నేటి ఉరుకులు పరుగుల జీవనశైలిలో ఫాస్ట్‌ఫుడ్‌, ప్రాసెస్ చేసిన ఆహారాల వినియోగం బాగా పెరిగింది. రుచిగా ఉంటుందని, ఆకర్షనీయంగా కనిపిస్తుందని వీటని లొట్టలేసుకుంటూ తింటుంటారు చాలా మంది. అయితే, తెల్లగా ఆకర్షనీయంగా కనిపించే కొన్ని ఆహారాలు ఆరోగ్యానికి చాలా ప్రమాదకరమని నిపుణులు చెబుతున్నారు. రిఫైన్డ్ చక్కెర, తెల్ల బియ్యం, మైదా, ఉప్పు వంటి పదార్థాలు చర్మ సమస్యల నుంచి గుండె జబ్బులు, డయాబెటిస్, ఊబకాయం, క్యాన్సర్‌కు కూడా దోహదం చేయగలవని హెచ్చరిస్తున్నారు. డైటీషియన్ల అభిప్రాయం ప్రకారం.. తెల్లని ఆహారాలను ఎక్కువగా తీసుకోవడం వల్ల జీవితకాలం 10 సంవత్సరాల వరకు తగ్గే అవకాశం ఉందంటున్నారు. ఈ తెల్లటి ఆహారాలు శరీరానికి విషంగా మారుతాయని చెబుతున్నారు. ఏ ఏ ఆహారాలకు దూరంగా ఉండాలో తెలుసుకుందాం.

ఈ తెల్లని ఆహారాల జోలికి పోవద్దు..

తెల్ల చక్కెర

చక్కెరలో ఎటువంటి పోషకాలు ఉండవు. దీనిని ఎంప్టీ కేలరీస్ అంటారు. విపరీతంగా చక్కరను ఉపయోగించడం వల్ల డయాబెటిస్, కొవ్వు కాలేయం, ఇన్సులిన్ నిరోధకత, దంత సమస్యల వస్తాయి. అందుకే, తెల్లటి చక్కెరకు బదులు బెల్లం, తేనె, కొబ్బరి చక్కెర వండితే ఆరోగ్యానికి మంచిది.

తెల్ల బియ్యం

బియ్యం శుద్ధి ప్రక్రియలో పీచుపదార్థం ఖనిజాలు తొలగిపోతాయి. ఇది టైప్ 2 డయాబెటిస్, ఊబకాయం ప్రమాదాన్ని పెంచుతుంది. దీనికి బదులు బ్రౌన్ రైస్, రెడ్ రైస్, చిరుధాన్యాలు ఆరోగ్యానికి బెస్ట్‌ ఆప్షన్‌గా చెబుతున్నారు.

తెల్ల ఉప్పు

అధిక ఉప్పు వినియోగం అధిక రక్తపోటు, ఎముకల బలహీనత, కడుపు పూతల ప్రమాదాన్ని పెంచుతుంది. ప్రపంచ ఆరోగ్య సంస్థ (డబ్ల్యూహెచ్‌ఓ) అభిప్రాయం ప్రకారం.. రోజుకు గరిష్టంగా 5 గ్రాముల ఉప్పు మాత్రమే తీసుకోవాలి. తెల్ల ఉప్పు కంటే కళ్ల ఉప్పు, హిమాలయన్ పింక్ సాల్ట్ వాడుకుంటే మంచిది.

రిఫైన్డ్ మైదా

మైదాలో పీచుపదార్థాలు, విటమిన్లు, ఖనిజాలు ఉండవు. ఇది ట్రైగ్లిజరైడ్సును పెంచి, మంచి కొలెస్ట్రాల్‌ను తగ్గిస్తుంది. అయితే, గోధుమ పిండి, మల్టీగ్రెయిన్ పిండి, ఓట్స్ పిండి తినటం ఆరోగ్యానికి మంచిది.

తెల్ల ఆలుగడ్డలు

ఆలు గడ్డలను డీప్ ఫ్రై చేసినా లేదా క్రీమ్/వెన్నతో కలిపి తీసుకున్నా హానికరం. ఇది రక్తంలో చక్కెర స్థాయిలను వేగంగా పెంచుతుంది. చిలగడదుంపలు, పరిమితంగా ఉడికించిన ఆలు గడ్డలు తింటే మంచిదని నిపుణులు చెబుతున్నారు. ఈ తెల్లని ఆహారాలలో పోషకాలు లోపించి అధిక గ్లైసెమిక్ ఇండెక్స్ ఉంటుంది. వీటిని తగ్గించడం ద్వారా జీవనశైలి సంబంధిత వ్యాధుల నుంచి బయటపడొచ్చు.