Best time to check blood pressure : రక్తపోటు (BP).. ఆధునిక జీవనశైలి మనకు అంటించిన ఓ ‘నిశ్శబ్ద హంతకి’. ఎలాంటి లక్షణాలు లేకుండానే, మన ఆరోగ్యాన్ని గుట్టుచప్పుడు కాకుండా దెబ్బతీస్తుంది. అందుకే, దీనిని క్రమం తప్పకుండా పర్యవేక్షించుకోవడం అత్యవసరం. అయితే, బీపీని ఎప్పుడు పడితే అప్పుడు కొలిస్తే, రీడింగులలో తేడాలు వచ్చి, అనవసర ఆందోళనకు దారితీస్తుంది. కచ్చితమైన ఫలితం కోసం, ఏ సమయంలో బీపీ చెక్ చేసుకోవాలి..? ఎలాంటి జాగ్రత్తలు తీసుకోవాలి..? నిపుణులు ఏం చెబుతున్నారో తెలుసుకుందాం.
ఉదయమే.. ఉత్తమ సమయం : చాలా మందికి, రక్తపోటును తనిఖీ చేసుకోవడానికి ఉదయమే అత్యంత సరైన సమయమని మేయోక్లినిక్ (Mayo Clinic) వంటి సంస్థల అధ్యయనాలు చెబుతున్నాయి.
ఎందుకంటే: రాత్రి నిద్రలో మన బీపీ తక్కువగా ఉండి, ఉదయం మేల్కొన్న తర్వాత క్రమంగా పెరుగుతుంది. ఉదయం తీసుకునే ఈ ‘బేస్‌లైన్ రీడింగ్’, మన గుండె ఆరోగ్యం గురించి వైద్యులకు అత్యంత విలువైన సమాచారాన్ని అందిస్తుంది.
జాగ్రత్తలు: అయితే, అత్యంత కచ్చితమైన రీడింగ్ కోసం, ఉదయం లేవగానే, ఎలాంటి ఆహారం, టీ, కాఫీ, మందులు తీసుకోకముందే బీపీని చెక్ చేసుకోవాలి. మూత్రాశయం ఖాళీగా ఉండేలా చూసుకోవడం కూడా ముఖ్యం.
మధ్యాహ్నం, సాయంత్రం కూడా : ఉదయం రీడింగ్‌తో పాటు, రోజులో వేర్వేరు సమయాల్లో కూడా బీపీని కొలవడం వల్ల, మన గుండె ఆరోగ్యంపై మరింత సమగ్రమైన అవగాహన వస్తుంది.
మధ్యాహ్నం: భోజనం చేసిన కనీసం రెండు గంటల తర్వాత బీపీని చెక్ చేసుకోవాలి. దీనివల్ల, జీర్ణక్రియ వల్ల వచ్చే తాత్కాలిక హెచ్చుతగ్గులను నివారించవచ్చు.
సాయంత్రం: నిద్రకు ముందు బీపీని కొలవడం వల్ల, రోజంతా మనం ఎదుర్కొన్న ఒత్తిడికి మన శరీరం ఎలా స్పందిస్తుందో, విశ్రాంతి సమయంలో అది ఎలా సర్దుబాటు అవుతుందో తెలుస్తుంది.
స్థిరత్వం ముఖ్యం.. ఈ నియమాలు తప్పనిసరి : బీపీని ఏ సమయంలో కొలిచినా, కొన్ని నియమాలను తప్పనిసరిగా పాటించాలని సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) స్పష్టం చేస్తోంది.
స్థిరత్వం: ప్రతిరోజూ దాదాపు ఒకే సమయానికి బీపీని కొలవడం చాలా ముఖ్యం.
30 నిమిషాల ముందు: పరీక్షకు 30 నిమిషాల ముందు కాఫీ, టీ తాగడం, పొగత్రాగడం, వ్యాయామం చేయడం వంటివి చేయకూడదు.
ప్రశాంతంగా కూర్చోండి: పరీక్షకు ముందు ఐదు నిమిషాలు నిశ్శబ్దంగా, ప్రశాంతంగా కుర్చీలో కూర్చోవాలి. పాదాలు నేలపై ఆనించి, మోచేతికి సపోర్ట్ ఇస్తూ, గుండె స్థాయిలోనే చేతిని ఉంచాలి.
మాట్లాడొద్దు: రీడింగ్ తీసుకుంటున్నప్పుడు మాట్లాడకూడదు.
రెండుసార్లు కొలవండి: ఒకటి, రెండు నిమిషాల వ్యవధిలో రెండుసార్లు రీడింగ్ తీసుకుని, వాటి సగటును నమోదు చేసుకోవాలి. ఈ చిన్న చిన్న జాగ్రత్తలు పాటించడం ద్వారా, మీ రక్తపోటును మీరు కచ్చితంగా పర్యవేక్షించుకుని, ఆరోగ్యంగా జీవించవచ్చు.
