Daily chia seeds benefits : ఆధునిక జీవనశైలిలో ‘సూపర్‌ఫుడ్స్’ హవా నడుస్తోంది. చిన్నగా ఉండి, అనంతమైన పోషకాలను అందించే ఈ ఆహార పదార్థాలపై అందరూ ఆసక్తి చూపుతున్నారు. ఈ జాబితాలో అగ్రస్థానంలో నిలుస్తున్నాయి ‘చియా విత్తనాలు’. చూడటానికి సబ్జా గింజల్లా ఉండే వీటిని రోజూ మన ఆహారంలో భాగం చేసుకుంటే ఏమవుతుంది? ముఖ్యంగా నెల రోజుల పాటు క్రమం తప్పకుండా తీసుకుంటే మన శరీరంలో ఎలాంటి అద్భుత మార్పులు చోటుచేసుకుంటాయి? నిపుణులు ఏమంటున్నారు? ఈ చిరుగింజల వెనుక ఉన్న ఆరోగ్య రహస్యాలేంటో తెలుసుకుందాం పదండి.
జీర్ణవ్యవస్థకు జీవం : చియా విత్తనాలను నెల రోజుల పాటు క్రమం తప్పకుండా తీసుకోవడం వల్ల జీర్ణవ్యవస్థ పనితీరు గణనీయంగా మెరుగుపడుతుందని పోషకాహార నిపుణులు పేర్కొంటున్నారు. వీటిలో ఉండే కరిగే ఫైబర్ (soluble fibre) మలబద్ధకం వంటి సమస్యలను నివారించి, జీర్ణక్రియ సాఫీగా జరిగేలా దోహదపడుతుంది. ఇది ప్రేగుల కదలికలను సులభతరం చేసి, ఉదర సంబంధిత సమస్యల నుంచి ఉపశమనం కలిగిస్తుంది.
బరువు తగ్గడానికి బ్రహ్మాస్త్రం : బరువు తగ్గాలనుకునే వారికి చియా విత్తనాలు ఒక వరం లాంటివి. వీటిలో సమృద్ధిగా ఉండే ఫైబర్, ఆరోగ్యకరమైన కొవ్వులు (good fats) కడుపు నిండిన అనుభూతిని కలిగిస్తాయి. దీనివల్ల భోజనాల మధ్యలో చిరుతిళ్లు తినాలనే కోరిక తగ్గుతుంది. ఫలితంగా, కేలరీల వినియోగం తగ్గి, బరువు నియంత్రణలో ఉంటుంది.
మెరిసే చర్మం.. ఒత్తైన జుట్టు : చియా విత్తనాల్లోని పోషకాలు కేవలం అంతర్గత ఆరోగ్యానికే కాదు, బాహ్య సౌందర్యానికి కూడా మేలు చేస్తాయి. వీటిని క్రమం తప్పకుండా తీసుకోవడం వల్ల చర్మం, జుట్టు ఆరోగ్యం మెరుగుపడుతుంది. చర్మానికి అవసరమైన తేమను అందించి, కాంతివంతంగా మార్చడంలో, జుట్టు కుదుళ్లను బలపరిచి, ఒత్తుగా పెరిగేలా చేయడంలో ఇవి సహాయపడతాయి.
హెచ్చరిక.. వీరు జాగ్రత్త : చియా విత్తనాలతో ఎన్ని ప్రయోజనాలు ఉన్నప్పటికీ, కొందరు వీటిని తీసుకునే విషయంలో జాగ్రత్త వహించాలని నిపుణులు హెచ్చరిస్తున్నారు. ముఖ్యంగా, జీర్ణ సంబంధిత సమస్యలు (digestive issues), కిడ్నీ వ్యాధులు (kidney issues) ఉన్నవారు వీటిని తీసుకునే ముందు వైద్యులను లేదా పోషకాహార నిపుణులను సంప్రదించడం తప్పనిసరి.
