Dry Fruits Controls Hairfall: ఓవైపు పెరుగుతున్న కాలుష్యం, మరోవైపు చెడు ఆహారపు అలవాట్లు, ఒత్తిడి కారణంగా జుట్టు రాలే సమస్య అందరినీ వేధిస్తోంది. యువకుల్లోనూ ఈ సమస్య అధికమవుతోంది. ఈ సమస్య నుంచి బయటపడేందుకు రకరకాల చికిత్సలు చేయించుకుంటారు. లక్షలు వెచ్చిస్తారు. అయినా, ఫలితాలు లేక ఇబ్బంది పడుతుంటారు. అయితే, మన రోజూవారి ఆహారంలో చిన్నపాటి మార్పులు చేసుకోవడం ద్వారా జుట్టు ఆరోగ్యాన్ని మెరుగుపరచుకోవచ్చని నిపుణులు సూచిస్తున్నారు. దీనికి డ్రై ఫ్రూట్స్ ఒక సులభమైన పరిష్కార మార్గమని చెబుతున్నారు. కొన్ని డ్రై ఫ్యూట్స్‌ తినడం వల్ల జుట్టు ఒత్తుగా పెరుగుతుందని సలహా ఇస్తున్నారు. డ్రై ఫ్రూట్స్‌లో ఐరన్, ఆరోగ్యకరమైన కొవ్వులు, ప్రొటీన్, విటమిన్లు పుష్కలంగా ఉంటాయి. ఇవి జుట్టు కుదుళ్లను బలోపేతం చేసి జుట్టు రాలడాన్ని తగ్గించి, మెరిసే ఆరోగ్యకరమైన జుట్టును అందిస్తాయి. జుట్టు ఆరోగ్యాన్ని కాపాడే కొన్ని ముఖ్యమైన డ్రై ఫ్రూట్స్ గురించి ఇప్పుడు తెలుసుకుందాం.

బాదం
రోజూ క్రమం తప్పకుండా బాదం తీసుకోవడం వల్ల జుట్టు ఒత్తుగా తయారవుతుంది. బాదంలో విటమిన్ ఈ అధికంగా లభిస్తుంది. ఇది తల భాగంలోని చర్మంలో రక్త ప్రసరణను పెంచుతుంది. దీని ద్వారా జుట్టు మూలాలకు సరైన పోషకాలు, ఆక్సిజన్ అంది జుట్టు బలంగా, పొడవుగా తయారవుతుంది. రాత్రంతా నానబెట్టిన బాదంను ఉదయం తినాలని నిపుణులు చెబుతున్నారు.

జీడిపప్పు

ఐరన్, జింక్ జీడిపప్పులో ఎక్కువగా ఉంటాయి. ఐరన్ ఆక్సిజన్‌ను స్కాల్ప్‌కు చేర్చగా, జింక్ జుట్టు మూలాలను బలోపేతం చేసి జుట్టు చిట్లిపోకుండా నిరోధిస్తుంది. జుట్టు పల్చబడడం లేదా రాలడం ఉన్నవారికి ఇది చాలా మంచి చేస్తుంది.

వాల్‌నట్స్

ఒమేగా-3 ఫ్యాటీ యాసిడ్స్, బయోటిన్, విటమిన్ ఈ పుష్కలంగా ఉండే వాల్‌నట్స్ జుట్టును మృదువుగా, మెరిసేలా చేస్తాయి. ఇవి స్కాల్ప్ వాపును తగ్గించి.. వెంట్రుకల కుదుళ్లు సరిగ్గా పనిచేయడానికి తోడ్పడతాయి. వీటిని స్నాక్స్‌గా, పెరుగులో కలుపుకుని తినవచ్చు.

ఖర్జూరాలు

ఖర్జూరాల్లోని ఐరన్, ఫైబర్, సహజ చక్కెరలు జుట్టు మూలాలకు శక్తిని అందిస్తాయి. ఇవి జుట్టు పల్చబడకుండా నిరోధిస్తాయి. జుట్టు దృఢంగా తయారవుతుంది.

ఎండు ద్రాక్ష

ఎండుద్రాక్షలో ఐరన్, యాంటీ ఆక్సిడెంట్లు పుష్కలంగా లభిస్తాయి. ఇవి ఒత్తిడి, కాలుష్యం వల్ల కలిగే నష్టం నుంచి జుట్టును రక్షిస్తాయి. వీటిని కూడా నానబెట్టి తింటే ఎక్కువ ప్రయోజనం ఉంటుంది.

పిస్తా

పిస్తాలో ప్రొటీన్, ఆరోగ్యకరమైన కొవ్వులు, విటమిన్ బి6 ఉంటాయి. ఇవి స్కాల్ప్‌ను పోషించి, జుట్టును హైడ్రేటెడ్‌గా ఉంచుతాయి. పొడిగా, నిర్జీవంగా ఉండే జుట్టు ఉన్నవారు స్నాక్స్‌ రూపంలో వీటిని తీసుకోవచ్చు. ఆరోగ్యకరమైన జీవనశైలి, సమతుల్య ఆహారంతో పాటు ఈ ఎండు పండ్లను తీసుకోవడం ద్వారా జుట్టు రాలడం సమస్యను తగ్గించుకోవచ్చని నిపుణులు చెబుతున్నారు.