Early signs of fatty liver : బీపీ, షుగర్ లాగే ఇప్పుడు ‘ఫ్యాటీ లివర్’ అనే మాట కూడా సర్వసాధారణంగా వినిపిస్తోంది. ఇది కాలేయంలో కొవ్వు అధికంగా పేరుకుపోయే ఓ నిశ్శబ్ద హంతకి. కదలికలేని జీవనశైలి, తప్పుడు ఆహారపు అలవాట్ల కారణంగా, నేడు యువతలో కూడా ఈ సమస్య విపరీతంగా పెరుగుతోంది. ప్రపంచవ్యాప్తంగా ప్రతి నలుగురిలో ఒకరు ఈ వ్యాధితో బాధపడుతున్నారంటే దీని తీవ్రతను అర్థం చేసుకోవచ్చు. అసలు ఈ వ్యాధిని తొలిదశలోనే ఎలా గుర్తించాలి…? ఏ లక్షణాలు కనిపిస్తే వెంటనే అప్రమత్తం కావాలి..?

ఏమిటీ ఫ్యాటీ లివర్.. ఎందుకొస్తుంది : కాలేయంలో కొవ్వు కణాలు అధికంగా పేరుకుపోవడాన్నే ఫ్యాటీ లివర్ అంటారు. ఇది ప్రధానంగా రెండు రకాలు: ఆల్కహాలిక్ (మద్యం సేవించడం వల్ల వచ్చేది), నాన్-ఆల్కహాలిక్ (మద్యంతో సంబంధం లేకుండా వచ్చేది). ముఖ్యంగా, నాన్-ఆల్కహాలిక్ ఫ్యాటీ లివర్ డిసీజ్ (NAFLD) ఎలాంటి లక్షణాలు లేకుండానే, నిశ్శబ్దంగా ఆరోగ్యాన్ని దెబ్బతీస్తుంది. ఊబకాయం, మధుమేహం, అధిక కొలెస్ట్రాల్ దీనికి ప్రధాన కారణాలు.

ఈ హెచ్చరిక సంకేతాలను విస్మరించవద్దు : ఈ వ్యాధిని ముందుగా గుర్తిస్తే, జీవనశైలి మార్పులతో దీనిని నివారించవచ్చు. మీలో ఈ లక్షణాలు కనిపిస్తే వెంటనే వైద్యుడిని సంప్రదించండి.

పొత్తికడుపులో నొప్పి, వాపు: కాలేయం ఉన్న ప్రదేశంలో, అంటే పొట్ట పైభాగాన కుడివైపు, తరచుగా నొప్పి లేదా వాపుగా అనిపిస్తే అది ఫ్యాటీ లివర్‌కు ముఖ్య సంకేతం. కాలేయంలో కొవ్వు చేరడం వల్ల వచ్చే వాపు కారణంగా ఈ నొప్పి వస్తుంది.

చర్మం, కళ్లు పసుపు రంగులోకి మారడం (కామెర్లు): ఇది అత్యంత స్పష్టమైన లక్షణం. శరీరంలో ‘బిలిరుబిన్’ అనే పదార్థం పేరుకుపోవడం వల్ల చర్మం, కళ్లు పసుపు పచ్చగా మారతాయని హాప్‌కిన్స్ మెడిసిన్ (hopkinsmedicine) అధ్యయనాలు చెబుతున్నాయి. ఇది కాలేయ పనితీరు దెబ్బతింటోందనడానికి సంకేతం.

ముదురు రంగు మూత్రం: మూత్రం ముదురు పసుపు లేదా తేనె రంగులో, మలం పాలిపోయినట్లుగా ఉంటే, అది కాలేయ సమస్యను సూచిస్తుంది. పైత్యరసం ఉత్పత్తిలో లోపం వల్ల ఇలా జరుగుతుంది.

అధిక కొలెస్ట్రాల్, షుగర్ స్థాయిలు: రక్త పరీక్షల్లో కొలెస్ట్రాల్, ట్రైగ్లిజరైడ్స్, షుగర్ లెవల్స్ అధికంగా ఉన్నట్లు తేలితే, వెంటనే కాలేయ పనితీరును కూడా తనిఖీ చేసుకోవడం మంచిదని ‘మెడ్‌లైన్‌ప్లస్’ (MedlinePlus) సూచిస్తోంది. ఫ్యాటీ లివర్‌కు, ఈ సమస్యలకు దగ్గరి సంబంధం ఉంది.

కారణం లేకుండా గాయాలు: చిన్న దెబ్బలకే చర్మంపై గాయాలు (నల్లగా కమలడం) అవడం, ముక్కు నుంచి తరచుగా రక్తం కారడం వంటివి కూడా ఫ్యాటీ లివర్‌కు సంకేతాలే. రక్తం గడ్డకట్టడానికి అవసరమైన ప్రొటీన్లను కాలేయం ఉత్పత్తి చేయలేకపోవడం వల్లే ఇలా జరుగుతుంది.

ఈ వ్యాధిని నిర్లక్ష్యం చేస్తే, అది కాలక్రమేణా ‘సిర్రోసిస్’గా మారి, కాలేయం పూర్తిగా దెబ్బతినే ప్రమాదం ఉంది. కొన్నిసార్లు, లివర్ ట్రాన్స్‌ప్లాంట్ కూడా అవసరం కావచ్చు. కాబట్టి, పైన చెప్పిన లక్షణాలు కనిపిస్తే, ఏమాత్రం ఆలస్యం చేయకుండా వైద్యుడిని సంప్రదించి, సరైన చికిత్స తీసుకోవడం శ్రేయస్కరం.