Foods Harmful For Brain:మెదడు పదునుగా పనిచేస్తూ, జ్ఞాపకశక్తి చురుగ్గా ఉండాలంటే పౌష్టికాహారం ఎంత ముఖ్యమో, దానికి హాని చేసే తిండికి దూరంగా ఉండటం కూడా అంతే అవసరం. మనం రోజూ ఎంతో ఇష్టంగా తినే కొన్ని పదార్థాలు తెలియకుండా మన ఆలోచనా శక్తిని, నాడీ వ్యవస్థను దెబ్బతీస్తుంటాయి. ఆరోగ్యంపై శ్రద్ధ చూపే ప్రతి ఒక్కరూ నిత్యం తీసుకునే ఆహారం విషయంలో అప్రమత్తంగా ఉండటం చాలా కీలకం. చిన్న చిన్న పద్ధతులు మార్చుకోవడం ద్వారా మెదడును నిరంతరం ఉత్సాహంగా, చురుగ్గా ఉంచుకోవచ్చు.
మన శరీరంలో ఉండే ప్రతీ అవయవానికీ తగిన పోషణ ఎంత అవసరమో, మెదడుకు కూడా ప్రత్యేకమైన పోషకాలు అంత కంటే ఎక్కువ అవసరం. అయితే మనం రోజూ తినే కొన్ని రకాల ఆహార పదార్థాలు మెదడు చురుకుదనాన్ని తగ్గించి, దాని పనితీరును నెమ్మదించేలా చేస్తాయని ఆరోగ్య నిపుణులు హెచ్చరిస్తున్నారు. అసలు మన ఆహార అలవాట్లలో ఎలాంటి పదార్థాల పట్ల జాగ్రత్తగా ఉండాలో ఇక్కడ వివరంగా తెలుసుకుందాం.
ఉప్పు మితిమీరితే రక్తప్రసరణకు గండి!
ఆహారంలో ఉప్పు పరిమాణం ఎక్కువైతే బీపీ పెరుగుతుంది. బీపీ పెరగడం వల్ల మెదడుకు సరిపడా రక్తప్రసరణ జరగదు. రక్త ప్రసరణ తగ్గినప్పుడు మెదడు కణాలకు ఆక్సిజన్ అందించే వ్యవస్థ దెబ్బతిని, మెదడు పనితీరు క్రమంగా మందగిస్తుంది.
ఆర్టిఫిషియల్ స్వీటనర్ల తీపి కష్టాలు
చక్కెరను తగ్గించుకోవాలనే ఆలోచనతో చాలామంది ఆర్టిఫిషియల్ స్వీటనర్లు వాడే అలవాటు పెంచుకుంటారు. కానీ వీటిని సుదీర్ఘకాలం పాటు వాడటం వల్ల మెదడు ఆరోగ్యం తీవ్రంగా దెబ్బతినే ప్రమాదం ఉందని పరిశోధనలు చెబుతున్నాయి.
ప్రాసెస్ చేసిన ఆహారాల ఉచ్చు
టిన్నుల్లో, ప్యాకెట్లలో దొరికే ప్రాసెస్ చేసిన ఆహారంలో ప్రిజర్వేటివ్స్, అనారోగ్యకరమైన కొవ్వులు నిండి ఉంటాయి. వీటి ప్రభావం ఒక్కొక్కరి ఆరోగ్యం మీద ఒక్కో విధంగా ఉంటూ మెదడు ఆరోగ్యాన్ని దెబ్బతీస్తుంది.
ఆల్కహాల్ తో జ్ఞాపకశక్తికి గండి
మద్యపానం అలవాటు మెదడు ఆకృతిని, దాని సమగ్ర పనితీరును మార్చేస్తుంది. రకరకాల అభీజ్ఞ సమస్యలు, అంటే జ్ఞాపకశక్తి, ఆలోచనా శక్తి తగ్గడానికి ఆల్కహాల్ ప్రధాన కారణం కావచ్చు.
సోడాలు, స్వీట్ డ్రింక్స్ తో ముప్పు
సోడా, అదనపు చక్కెరలు కలిపిన పానీయాలు రోజూ తీసుకోవడం వల్ల క్రమంగా మెదడు పనితీరు మందగిస్తుంది. నాడీ వ్యవస్థ మెల్లగా బలహీనపడుతుంది.
వేపుళ్లు, ట్రాన్స్ ఫ్యాట్స్ దెబ్బ
నూనెలో ముంచి తీసే వేపుళ్లలో ట్రాన్స్ ఫ్యాట్ పరిమాణం చాలా ఎక్కువ. వీటిని అధిక ఉష్ణోగ్రత వద్ద వండే సమయంలో శరీరానికి హాని చేసే ఫ్రీరాడికల్స్ విడుదలవుతాయి. పైగా, ట్రాన్స్ ఫ్యాట్స్ ఉన్న ఆహారం తీసుకోవడం వల్ల రక్తంలో చెడు కొలెస్ట్రాల్ పెరిగి గుండె, మెదడు రక్తనాళాలపై తీవ్ర ప్రభావం పడుతుంది.
ప్రాసెస్ చేసిన మాంసాహారంతో ఇన్ఫ్లమేషన్
ప్రాసెస్ చేసిన మాంసాహారాన్ని ఎక్కువగా తీసుకుంటే శరీరంలో ఇన్ఫ్లమేషన్ (వాపు/తాపజనక చర్యలు) పెరుగుతుంది. దీనివల్ల క్రమంగా మెదడు పనితీరు నెమ్మదించి మానసిక చురుకుదనం తగ్గిపోతుంది.
మెదడును చురుగ్గా, ఆరోగ్యంగా ఉంచుకోవాలంటే ప్రాసెస్ చేసిన ఆహారాలు, ఆర్టిఫిషియల్ స్వీటనర్లు, అధిక ఉప్పు, ఆల్కహాల్ లాంటి వాటి నుంచి దూరంగా ఉండటం ఎంతో మేలు. మన ఆహార ఎంపికల్లో తగినంత శ్రద్ధ వహిస్తేనే మెదడు సురక్షితంగా పనిచేస్తుంది!