Health Vs Brinjal:వంకాయను కూరగాయలలో ప్రత్యేకమైన స్థానంలో ఉంచుతారు. ఈ కూరలో కేలరీలు, కార్బోహైడ్రేట్లు, ఫైబర్, ప్రోటీన్, మాంగనీస్, ఫోలేట్, పొటాషియం, విటమిన్ కె, విటమిన్ సి వంటి ఎన్నో పోషకాలు ఉంటాయి. అంతేకాదు తక్కువ స్థాయిలో నియాసిన్, మెగ్నీషియం, రాగి కూడా ఇందులో లభిస్తాయి. ఈ కారణంగా వంకాయను అనేక రకాల వంటకాలలో వాడుతారు. పకోడీలు, బిర్యానీలు, స్టఫ్డ్ వంకాయ, వంకాయ కూరలు, రైస్ ఐటమ్స్ ఇలా అనేక వంటకాలు వంకాయ లేకుండా పూర్తి కావు.

రుచికరమైన ఈ కూర చాలా మందికి ఇష్టమైనా, ప్రతి ఒక్కరికి ఇది సురక్షితం కాదని వైద్య నిపుణులు చెబుతున్నారు. ఆయుర్వేద శాస్త్రంలో వంకాయ శరీరంలో కఫం, పిత్తాన్ని పెంచుతుందని వివరించారు. అంటే ఇప్పటికే కొన్ని వ్యాధులతో ఇబ్బందులు పడుతున్నవారికి వంకాయ మరింత సమస్యలను కలిగించే అవకాశం ఉంటుంది. వంకాయను ఎక్కువగా ఇష్టపడే వారు ఈ విషయాలు తెలుసుకోవడం అవసరం.

కీళ్ల నొప్పులు పెరగడం

వంకాయలో సహజంగా సోలనైన్ అనే పదార్థం ఉంటుంది. ఇది శరీరంలో ఇన్‌ఫ్లమేషన్‌ను పెంచే స్వభావం కలిగి ఉంటుంది. కీళ్ల నొప్పులు లేదా వాతం సమస్యలున్నవారు వంకాయ తింటే నొప్పులు మరింత పెరిగే ప్రమాదం ఉంది. దీని వలన జాయింట్లలో మంట కూడా అధికమవుతుంది. ఈ కారణంగా ఆర్థరైటిస్ సమస్యలతో బాధపడేవారు వంకాయకు దూరంగా ఉండడం మంచిదిగా చెప్పబడింది.

పైల్స్ సమస్యలపై ప్రభావం

పైల్స్ సమస్య ఉన్నవారికి వంకాయ తినడం హానికరం. వంకాయ వేడి స్వభావం కలిగిన కూరగాయ. ఇది శరీరంలో మంటను పెంచే విధంగా పనిచేస్తుంది. ఫలితంగా పైల్స్ బాధ మరింతగా పెరగడమే కాక, దురద, నొప్పి, రక్తస్రావం వంటి ఇబ్బందులు తీవ్రమవుతాయి. అందువల్ల హీమరాయిడ్స్ సమస్యలున్న వారు వంకాయను తప్పించడం ఉత్తమం.

కిడ్నీ రాళ్లు తీవ్రతరం కావడం

కిడ్నీ రాళ్లు ఉన్నవారు వంకాయ తింటే సమస్య మరింత పెరగవచ్చు. వంకాయలో ఆక్సలేట్ అనే పదార్థం ఉంటుంది. ఇది శరీరంలో కాల్షియంతో కలిసినప్పుడు రాళ్ల పరిమాణాన్ని పెంచుతుంది. అందువల్ల ఇప్పటికే కిడ్నీ స్టోన్స్ ఉన్నవారు వంకాయ వాడకం తగ్గించడం లేదా పూర్తిగా మానేయడం సురక్షితం.

అలెర్జీ సమస్యలు

కొంతమందికి వంకాయ వల్ల అలెర్జీ సమస్యలు వస్తాయి. వంకాయ తిన్న తర్వాత చర్మంపై ఎరుపు, మంట, దురద, దద్దుర్లు వంటి లక్షణాలు కనబడితే అది వంకాయ అలెర్జీ అని అర్థం. ఇలాంటి పరిస్థితి ఎదురైతే వెంటనే వంకాయ వాడకాన్ని ఆపాలి. లేకపోతే సమస్య మరింత తీవ్రమవుతుంది.

గ్యాస్ట్రిక్, అసిడిటీ

జీర్ణ సంబంధ సమస్యలున్నవారు వంకాయ తింటే ఇబ్బంది ఎదురవుతుంది. వంకాయ స్వభావం బరువుగా ఉండటం వల్ల జీర్ణం కావడానికి ఎక్కువ సమయం పడుతుంది. దీని వలన కడుపులో ఉబ్బరం, గ్యాస్, అసిడిటీ వంటి సమస్యలు మరింతగా పెరుగుతాయి. ఇప్పటికే గ్యాస్ట్రిక్ సమస్యలతో ఇబ్బంది పడేవారు వంకాయను దూరంగా ఉంచుకోవాలి.

వంకాయ వాడకంలో జాగ్రత్తలు

ప్రతీ ఒక్కరికీ వంకాయ హానికరం కాదు. కానీ పైగా చెప్పిన ఆరోగ్య సమస్యలున్నవారు తప్పనిసరిగా జాగ్రత్తలు తీసుకోవాలి. సాధారణంగా ఆరోగ్యవంతులైనవారికి వంకాయలోని పోషకాలు శరీరానికి ఉపయోగకరంగా ఉంటాయి. కానీ కీళ్ల నొప్పులు, పైల్స్, కిడ్నీ రాళ్లు, అలెర్జీలు, జీర్ణ సమస్యలతో బాధపడుతున్నవారు వంకాయ తినకపోవడం ద్వారా అనవసరమైన సమస్యలను నివారించవచ్చు.

Also Read: https://teluguprabha.net/lifestyle/vastu-tips-on-bath-mistakes-that-bring-negativity/