Infant oral health risks from saliva transmission : వెండి గిన్నెలో వెచ్చని పాల బువ్వ… “ఉఫ్ ఉఫ్” అని చల్లార్చి బుజ్జి పాపాయికి గోరుముద్దలు తినిపించడం… ఈ దృశ్యం చూడటానికి ఎంత ఆహ్లాదకరంగా ఉంటుందో కదా! ఆ ప్రేమ వెనుక కొన్ని ప్రమాదాలు దాగి ఉన్నాయని మీకు తెలుసా? మీరు అమితమైన ప్రేమతో చేసే కొన్ని పనులే మీ చిన్నారి ఆరోగ్యాన్ని, ముఖ్యంగా వారి నోటి ఆరోగ్యాన్ని దెబ్బతీస్తాయని నిపుణులు హెచ్చరిస్తున్నారు. కేవలం అన్నం ఊదడమే కాదు, ఎడాపెడా ముద్దులు పెట్టడం, పాలసీసాల వాడకంలో అజాగ్రత్త వంటివి కూడా చిన్నారుల పాలిట శాపంగా మారుతున్నాయట. ఇంతకీ ఆందోళన కలిగించే ఆ నిజాలేమిటి..? మనం తెలియకుండా చేస్తున్న పొరపాట్లేంటి.? 

ప్రేమ వెనుక దాగి ఉన్న ప్రమాదాలు : తల్లిదండ్రులుగా పిల్లల పట్ల మనకున్న ప్రేమ అనంతమైనది. ఆ ప్రేమతో చేసే కొన్ని సాధారణ పనులే వారి ఆరోగ్యానికి హాని కలిగిస్తాయని తెలిస్తే ఆశ్చర్యం కలగక మానదు. భారత్, యూకే, అమెరికా వంటి దేశాల్లో జరిగిన పలు అధ్యయనాలు ఈ చేదు నిజాన్ని నిర్ధారించాయి. దంతక్షయం అనేది అంటువ్యాధి కానప్పటికీ, దానికి కారణమయ్యే సూక్ష్మజీవులు లాలాజలం ద్వారా ఒకరి నుంచి మరొకరికి సులభంగా వ్యాపిస్తాయి.

“ఉఫ్ ఉఫ్” మంత్రం: నోటి బ్యాక్టీరియాకు ఆహ్వానం : వేడిగా ఉన్న ఆహారాన్ని చల్లార్చడానికి మనం నోటితో “ఉఫ్ ఉఫ్” అని ఊదినప్పుడు, మనకు తెలియకుండానే లాలాజల తుంపరలు ఆహారంపై పడతాయి. ఈ తుంపరలలో “స్ట్రెప్టోకాకస్ మ్యూటన్స్” (Streptococcus mutans) అనే బ్యాక్టీరియా ఉంటుంది. ఇది దంతక్షయానికి ప్రధాన కారణం. పిల్లల నోటిలోకి ఈ బ్యాక్టీరియా ప్రవేశిస్తే, అది వారి మృదువైన ఎనామెల్‌పై దాడి చేసి, పుచ్చు పళ్లకు దారితీస్తుంది.

ముద్దుల వెనుక ముప్పు : నవజాత శిశువులను, చిన్న పిల్లలను ముద్దు పెట్టుకోవడం ద్వారా కూడా ప్రమాదకరమైన వైరస్‌లు, బ్యాక్టీరియాలు వ్యాపిస్తాయి. ముఖ్యంగా ఇన్ఫ్లుఎంజా, రెస్పిరేటరీ సిన్సిటియల్ వైరస్ (RSV), స్ట్రెప్టోకోకస్ న్యుమోనియా వంటి శ్వాసకోశ ఇన్ఫెక్షన్లు సోకే ప్రమాదం ఉందని “సౌత్ సూడాన్ మెడికల్ జర్నల్” ప్రచురించిన నివేదిక హెచ్చరిస్తోంది. బుగ్గలపై ముద్దు పెట్టినప్పుడు అంటిన లాలాజలాన్ని పిల్లలు చేత్తో తుడుచుకుని, ఆ చేతిని నోట్లో పెట్టుకోవడం ద్వారా కూడా సూక్ష్మక్రిములు శరీరంలోకి చేరతాయి.

తెలియకుండా చేసే మరిన్ని పొరపాట్లు..

పాత్రల మార్పిడి: పెద్దలు తిన్న ప్లేట్లోనే పిల్లలకు తినిపించడం, వారు వాడిన గ్లాసులు, చెంచాలను పిల్లలకు ఇవ్వడం ద్వారా కూడా లాలాజల మార్పిడి జరిగి బ్యాక్టీరియా వ్యాపిస్తుంది.

పాల సీసా వాడకం: పాలు తాగిన తర్వాత కూడా పాల సీసాను పిల్లల నోటిలో అలాగే ఉంచడం వల్ల, నోటిలో నిలిచిపోయిన పాలలో సూక్ష్మజీవులు వేగంగా వృద్ధి చెందుతాయి. ఇది “బేబీ బాటిల్ టూత్ డికే”కి కారణమవుతుంది.

దంత వైద్య నిపుణుల మాట:  “ఒక్కసారి ‘స్ట్రెప్టోకాకస్ మ్యూటన్స్’ బ్యాక్టీరియా శరీరంలోకి చేరితే, దాన్ని పూర్తిగా నాశనం చేయడం కష్టం. యాంటీబయాటిక్స్ ద్వారా ఇన్ఫెక్షన్‌ను నియంత్రించవచ్చు కానీ, సూక్ష్మక్రిములు శరీరంలోనే ఉంటాయి. అందుకే నివారణే ఉత్తమ మార్గం,” అని దంత వైద్య నిపుణులు  సూచిస్తున్నారు. “రాత్రి పడుకునే ముందు పళ్లు శుభ్రం చేసుకోవడం దంత ఆరోగ్యానికి అత్యంత ముఖ్యం. పెద్దలు ఈ అలవాటును పాటిస్తే, పిల్లలు కూడా వారిని చూసి నేర్చుకుంటారు,” అని ఆయన తెలిపారు.

తల్లిదండ్రులు తీసుకోవాల్సిన జాగ్రత్తలు: మీ నోటి ఆరోగ్యం ముఖ్యం: ముందుగా తల్లిదండ్రులు తమ నోటి ఆరోగ్యాన్ని కాపాడుకోవాలి. ఇది పిల్లలకు బ్యాక్టీరియా సంక్రమణను తగ్గిస్తుంది.

పంచుకోవద్దు: పిల్లల చెంచాలు, గరిటెలు, టూత్ బ్రష్‌లను ఇతరులతో పంచుకోకుండా చూడండి.

చక్కెరకు దూరం: చక్కెర అధికంగా ఉండే ఆహారాలు, పానీయాలు బ్యాక్టీరియా పెరుగుదలకు దోహదం చేస్తాయి. వాటిని పిల్లలకు దూరంగా ఉంచాలి.

వైద్య పరీక్షలు: ఆరు నెలల వయసులో పిల్లలకు దంతాలు రావడం మొదలవుతుంది. అప్పటి నుంచి ప్రతీ ఆరు నెలలకు ఒకసారి దంత వైద్యునితో పరీక్షలు చేయించడం చాలా అవసరం. పాల పళ్లపై నల్లటి మచ్చలు కనిపిస్తే అశ్రద్ధ చేయవద్దు, అవి శాశ్వత దంతాలపై ప్రభావం చూపుతాయి.

గమనిక: ఈ కథనంలో అందించిన సమాచారం కేవలం మీ అవగాహన కోసం మాత్రమే. శాస్త్రీయ పరిశోధనలు, నిపుణుల సూచనల ఆధారంగా ఇది రూపొందించబడింది. మీ పిల్లల ఆరోగ్యానికి సంబంధించి ఏవైనా నిర్ణయాలు తీసుకునే ముందు తప్పనిసరిగా మీ వ్యక్తిగత వైద్యులను సంప్రదించగలరు.