Natural remedies for uric acid : “నిలబడినా, కూర్చున్నా కీళ్లలో చెప్పలేని నొప్పి… వేళ్లు, మడమల్లో భరించలేని వాపు… చిన్న వయసులోనే కదల్లేని దీనస్థితి.” నేటి ఆధునిక జీవనశైలిలో చాలామందిని వేధిస్తున్న సమస్య ఇది. దీనికి ప్రధాన కారణం శరీరంలో పేరుకుపోయిన యూరిక్ యాసిడ్ కావచ్చు. ఆహారపు అలవాట్లు, శారీరక శ్రమ లేకపోవడం వంటి కారణాల వల్ల శరీరంలో యూరిక్ యాసిడ్ స్థాయులు పెరిగి, అది స్ఫటికాలుగా మారి కీళ్లలో చేరినప్పుడు ‘గౌట్’ వంటి తీవ్రమైన వ్యాధులకు దారితీస్తుంది. అయితే, ఈ సమస్యకు మన వంటింట్లోనే సులభమైన పరిష్కారాలున్నాయని మీకు తెలుసా..? ఖరీదైన మందులతో పనిలేకుండా, సహజంగా యూరిక్ యాసిడ్‌ను ఎలా నియంత్రించుకోవాలి..? 

శరీరంలో ప్యూరిన్లు అనే రసాయనాలు విచ్ఛిన్నమైనప్పుడు యూరిక్ యాసిడ్ ఉత్పత్తి అవుతుంది. సాధారణంగా ఇది మూత్రం ద్వారా బయటకు వెళ్లిపోతుంది. అయితే, శరీరం అధికంగా యూరిక్ యాసిడ్‌ను ఉత్పత్తి చేసినా లేదా మూత్రపిండాలు దానిని సరిగ్గా ఫిల్టర్ చేయలేకపోయినా, రక్తంలో దీని స్థాయులు పెరిగిపోతాయి. ఇది కీళ్లలో సూదుల్లాంటి స్ఫటికాలుగా ఏర్పడి తీవ్రమైన నొప్పి, వాపు, ఎరుపుదనాన్ని కలిగిస్తుంది. దీనిని నివారించాలంటే జీవనశైలిలో మార్పులు చేసుకోవడం, ముఖ్యంగా కొన్ని రకాల ఆహార పానీయాలను దినచర్యలో చేర్చుకోవడం ఎంతో అవసరం.

ఆరోగ్య నిపుణులు సూచిస్తున్న కొన్ని సులభమైన, ప్రభావవంతమైన ఇంటి చిట్కాలు ఇక్కడ ఉన్నాయి:

కీళ్ల నొప్పులకు ‘చౌ చౌ’ పానీయం : సాధారణంగా కూరలలో వాడే చౌ చౌ (బెంగుళూరు వంకాయ) యూరిక్ యాసిడ్‌ను తగ్గించడంలో అద్భుతంగా పనిచేస్తుంది.

కావాల్సిన పదార్థాలు: సగం కప్పు పచ్చి చౌ చౌ ముక్కలు, పావు చెంచా జీలకర్ర పొడి, పావు చెంచా సోంపు పొడి.
తయారీ విధానం: మొదటగా, తాజా చౌ చౌ కాయను తీసుకొని, నీటితో శుభ్రంగా కడగాలి. ఆ తర్వాత, దానిపై ఉండే పల్చని పొట్టును జాగ్రత్తగా తొలగించి, కూర కోసం చిన్న చిన్న ముక్కలుగా కోసుకోవాలి. ఈ ముక్కలకు కొద్దిగా పసుపు రాసి మళ్లీ శుభ్రంగా కడగాలి. ఇప్పుడు ఈ ముక్కలను మిక్సీ జార్‌లో వేసి, కొద్దిగా నీళ్లు పోసి మెత్తని రసంలా చేసుకోవాలి. ఈ రసాన్ని ఒక గ్లాసులోకి వడకట్టుకుని, అందులో జీలకర్ర పొడి, సోంపు పొడి కలుపుకుని తాగాలి.

ప్రయోజనం: ఈ రసం శరీరంలోని వ్యర్థాలను, అదనపు యూరిక్ యాసిడ్‌ను బయటకు పంపడంలో సమర్థవంతంగా సహాయపడుతుంది.

యాపిల్ సైడర్ వెనిగర్‌తో అద్భుతం : యూరిక్ యాసిడ్ సమస్యకు యాపిల్ సైడర్ వెనిగర్ ఒక చక్కటి పరిష్కార మార్గం.

తయారీ విధానం: ఒక గ్లాసు గోరువెచ్చని నీటిలో ఒక టీస్పూన్ ఆర్గానిక్ యాపిల్ సైడర్ వెనిగర్‌ను కలపాలి.

ఎప్పుడు తాగాలి: ఈ పానీయాన్ని రోజూ ఉదయం ఖాళీ కడుపుతో తాగడం వల్ల ఉత్తమ ఫలితాలు ఉంటాయి.

ప్రయోజనం: యాపిల్ సైడర్ వెనిగర్ శరీరంలో ఆల్కలైన్ వాతావరణాన్ని సృష్టించి, యూరిక్ యాసిడ్‌ను విచ్ఛిన్నం చేయడానికి సహాయపడుతుంది. ఇది కీళ్ల పనితీరును మెరుగుపరచి, నొప్పుల నుంచి ఉపశమనం కలిగిస్తుంది.

ముఖ్య గమనిక: ఈ చిట్కాలు కేవలం అవగాహన కోసం మాత్రమే. ఏదైనా కొత్త పద్ధతిని పాటించే ముందు, ముఖ్యంగా దీర్ఘకాలిక ఆరోగ్య సమస్యలు ఉన్నవారు, తప్పనిసరిగా వైద్య నిపుణులను సంప్రదించడం శ్రేయస్కరం. నీరు ఎక్కువగా తాగడం కూడా యూరిక్ యాసిడ్‌ను తగ్గించడంలో కీలక పాత్ర పోషిస్తుందని గుర్తుంచుకోవాలి.