ICMR Shoking Report on Side effects of Antibiotics Usage: విచ్చలవిడిగా యాంటీ బయాటిక్స్‌ను వాడేస్తున్న వారికి షాకింగ్ న్యూస్. ఇండియన్ కౌన్సిల్ ఆఫ్ మెడికల్ రీసెర్చ్ (ICMR) విడుదల చేసిన 2024 వార్షిక నివేదిక ఒక తీవ్రమైన ప్రజారోగ్య హెచ్చరిక జారీ చేసింది. సాధారణంగా వాడే మందులు కూడా ఇకపై ఇన్‌ఫెక్షన్లపై పనిచేయడం లేదని ఈ నివేదిక స్పష్టం చేసింది. చికిత్స సులభంగా అయ్యే వ్యాధులు కూడా ఇప్పుడు చాలా కష్టతరంగా మారుతున్నాయని నిపుణులు చెబుతున్నారు. దేశంలోని అతిపెద్ద ఆసుపత్రుల నుంచి దాదాపు లక్ష ల్యాబ్-పరీక్షించిన పాజిటివ్ నమూనాల విశ్లేషణ ఆధారంగా ఈ ఆందోళనకర విషయాలను వెల్లడించారు.

యాంటీ బయాటిక్స్ విఫలం

కార్బాపెనమ్స్, పైపెరాసిలిన్-టాజోబాక్టమ్ , ఫ్లోరోక్వినోలోన్స్, మూడో తరం సెఫాలోస్పోరిన్స్ వంటి సాధారణంగా ఆసుపత్రుల్లో ఉపయోగించే మందులు కూడా ఇప్పుడు అత్యంత సాధారణ బ్యాక్టీరియాపై ప్రభావం చూపడం లేదు. డ్రగ్-రెసిస్టెంట్ గ్రామ్-నెగటివ్ బ్యాక్టీరియా ప్రధానంగా ఆసుపత్రుల్లో తీవ్రమైన ఇన్‌ఫెక్షన్లకు కారణమవుతున్నాయి. ఈ బ్యాక్టీరియా మెరోపెనెమ్కు ఏకంగా 91% నిరోధకతను ప్రదర్శించింది. ఇది వైద్యులను మరింత క్లిష్టమైన లేదా విషపూరితమైన ఔషధాల వైపు మళ్ళేలా చేస్తోంది. దీనిలో కూడా నిరోధకత క్రమంగా పెరుగుతోంది. టైఫాయిడ్ జ్వరానికి కారణమయ్యే ఈ బ్యాక్టీరియాలో 95 శాతం కంటే ఎక్కువ నమూనాలు ఫ్లోరోక్వినోలోన్స్‌కు నిరోధకతను చూపుతాయని చెబుతున్నారు. ఇన్‌ఫెక్షన్లలో 72% డ్రగ్-రెసిస్టెంట్ గ్రామ్-నెగటివ్ బ్యాక్టీరియా వల్లే వస్తున్నాయని నివేదిక తెలిపింది. వెంటిలేటర్-అనుబంధ న్యుమోనియా (VAP) ప్రధానంగా యాసినెటోబాక్టర్, క్లెబ్సియెల్లా, స్యూడోమోనాస్ జాతుల ద్వారా సంభవిస్తోంది.. వీటికి చాలా శక్తివంతమైన యాంటీ బయాటిక్స్ కూడా పనిచేయడం లేదు. వైద్యుల అభిప్రాయం ప్రకారం ఒకప్పుడు సులభంగా నయం చేయగలిగిన ఇన్‌ఫెక్షన్లకు కూడా ఇప్పుడు బలమైన యాంటీ బయాటిక్స్ సానుకూల ప్రభావాన్ని చూపడం లేదు. ఇది తక్షణమే చర్యలు తీసుకోవాల్సిన అత్యవసర ప్రజారోగ్య సవాలని హెచ్చరిస్తున్నారు.

తక్షణ చర్యలు ఏం తీసుకోవాలి?

ఈ సంక్షోభాన్ని ఎదుర్కోవడానికి ప్రతి పౌరుడు, ఆరోగ్య సంరక్షణ వ్యవస్థ ఈ మార్పులు చేయాలి. వైద్యుని సలహా, స్పష్టమైన ప్రిస్క్రిప్షన్ లేకుండా యాంటీబయాటిక్స్‌ను ఎప్పుడూ తీసుకోకూడదు. ముఖ్యంగా జలుబు లేదా ఫ్లూ వంటి వైరల్ జబ్బులకు డాక్టర్ సూచించిన విధంగా మందుల కోర్సును పూర్తిగా ముగించాలి. మధ్యలో ఆపకూడదు. అంతేకాకుండా ఆసుపత్రులు, వైద్యులు యాంటీ బయాటిక్స్ వాడకంపై కఠినమైన నియమాలను పాటించాలి. అవసరమైన చోట మాత్రమే వాడాలి. తరచుగా చేతులు కడుక్కోవడం, టీకాలు వేయించుకోవడం ద్వారా ఇన్‌ఫెక్షన్లు రాకుండా జాగ్రత్త పడాలని ఆరోగ్య నిపుణులు చెబుతున్నారు.