Insulin Plant Benefits:మన ఇళ్లలో మొక్కలు పెంచుకోవడం అలవాటు చేసుకున్నవారికి ఇది మరింత ఉపయోగకరమైన సమాచారం. సాధారణంగా చాలామంది మొక్కలను అందంగా కనిపించేందుకు లేదా ఇంటి వాతావరణాన్ని పాజిటివ్‌గా ఉంచేందుకు పెంచుతారు. కానీ కొందరు మొక్కలు కేవలం ఆహ్లాదం కోసమే కాదు, ఆరోగ్యానికి సహజ వైద్యంలా పనిచేస్తాయి. అటువంటి ప్రత్యేక మొక్కలలో ఒకటి ఇన్సులిన్ ప్లాంట్. ఈ మొక్కను సరిగ్గా వాడితే రక్తంలో చక్కెర స్థాయిలను నియంత్రించుకోవచ్చు అని వైద్య పరిశోధనలు చెబుతున్నాయి.
డయాబెటిస్ సమస్యతో..
ఇన్సులిన్ ప్లాంట్‌కు శాస్త్రీయ నామం Costus igneus. ఇది ప్రకృతి వైద్యంలో ముఖ్యమైన స్థానాన్ని సంపాదించింది. ముఖ్యంగా డయాబెటిస్ సమస్యతో బాధపడేవారికి ఇది ఒక సహజ పరిష్కారం అవుతుంది. ఈ మొక్కలో ఉన్న ప్రత్యేక గుణాలు గ్లూకోజ్ మెటబాలిజాన్ని మెరుగుపరచడమే కాకుండా ఇన్సులిన్ సెన్సిటివిటీని కూడా పెంచుతాయి. అందుకే దీనికి “ఇన్సులిన్ ప్లాంట్” అనే పేరు వచ్చింది.
జీర్ణశక్తి …
ఆయుర్వేదంలో ఈ మొక్కకు ఉన్న ప్రాధాన్యం చాలా ఎక్కువ. దీన్ని రెగ్యులర్‌గా వాడితే జీర్ణశక్తి పెరుగుతుంది, శరీరానికి కావలసిన శక్తి సమతుల్యం అవుతుంది. డయాబెటిస్ మందులు వాడుతున్నప్పటికీ, వీటికి తోడ్పడే సహజ మార్గంగా ఇన్సులిన్ ప్లాంట్ పనిచేస్తుంది.
గ్లూకోజ్‌ను..
ఈ మొక్కలో ఉండే ముఖ్యమైన పదార్థం కారోసాలిక్ యాసిడ్. ఇది శరీర కణాల్లో గ్లూకోజ్‌ను సరైన మార్గంలో తరలించేందుకు సహాయపడుతుంది. ఫలితంగా గ్లూకోజ్ రక్తంలో పేరుకుపోకుండా కండరాలకు చేరి శక్తిగా మారుతుంది. ఈ ప్రక్రియ వల్ల రక్తంలో షుగర్ లెవెల్స్ నియంత్రణలో ఉంటాయి. భోజనం చేసిన తర్వాత చక్కెర స్థాయిలు ఎక్కువ అవకుండా కూడా ఇది సహాయపడుతుంది.
యాంటీ ఇన్‌ఫ్లమేటరీ, యాంటీ ఆక్సిడెంట్..
డయాబెటిస్‌కి చెక్ పెట్టడమే కాకుండా ఈ మొక్కలో యాంటీ ఇన్‌ఫ్లమేటరీ, యాంటీ ఆక్సిడెంట్ గుణాలు అధికంగా ఉంటాయి. ఫ్లేవనాయిడ్స్ కారణంగా శరీరంలో ఏర్పడే ఆక్సిడేటివ్ స్ట్రెస్ తగ్గిపోతుంది. ఈ స్ట్రెస్ తగ్గడం వల్ల డయాబెటిస్ మరింత పెరగకుండా అడ్డుకట్ట వేయవచ్చు. టైప్ 1 మాత్రమే కాకుండా టైప్ 2 డయాబెటిస్ నియంత్రణలో కూడా ఈ మొక్క తోడ్పడుతుంది.
గ్లూకోజ్ స్థాయిలు..
పరిశోధనలు చెబుతున్నట్టుగా, ఈ మొక్క ఆకులను క్రమం తప్పకుండా తింటే రక్తంలో గ్లూకోజ్ స్థాయిలు తగ్గుతాయి. ఇన్సులిన్ సెన్సిటివిటీ పెరుగుతుంది. క్రమంగా శరీరంలో షుగర్ పేరుకుపోకుండా నియంత్రణలో ఉంచుతుంది. అదేవిధంగా టైప్ 2 డయాబెటిస్ వచ్చే అవకాశం కూడా తగ్గుతుంది.
చెడు కొలెస్ట్రాల్‌ను తగ్గించి..
ఈ మొక్క ఆరోగ్యానికి ఇస్తున్న లాభాలు డయాబెటిస్ వరకు మాత్రమే కాదు. శరీరంలో అధిక కేలరీలు కరిగిపోవడంలో కూడా ఇది సహాయపడుతుంది. చక్కెర నియంత్రణలో ఉండడం వల్ల ఆకలి అదుపులో ఉంటుంది. ఫలితంగా శరీరంలో కొవ్వు పేరుకుపోకుండా ఉంటుంది. అదనంగా కొలెస్ట్రాల్ స్థాయిలను తగ్గిస్తుంది. చెడు కొలెస్ట్రాల్‌ను తగ్గించి మంచి కొలెస్ట్రాల్ పెంచడంలోనూ ఇది సహాయపడుతుంది. దీనివల్ల గుండె సంబంధిత సమస్యల ముప్పు తగ్గుతుంది.
ప్రీబయోటిక్స్‌గా..
జీర్ణక్రియను మెరుగుపరచడంలో కూడా ఈ మొక్క ఉపయోగపడుతుంది. ఆకుల్లో ఉండే సహజ గుణాలు శరీరానికి ప్రీబయోటిక్స్‌గా పనిచేస్తాయి. దీని వల్ల జీర్ణక్రియకు అవసరమైన బాక్టీరియా పెరుగుతుంది. ఫలితంగా ఆహారం సులభంగా జీర్ణమవుతుంది, మలబద్ధకం సమస్యలు తగ్గిపోతాయి.
పరగడుపున..
ఇన్సులిన్ ప్లాంట్‌ను వాడే విధానాలు కూడా సులభమే. ఇంట్లో పెంచుకుంటే ప్రతిరోజూ ఉదయం పరగడుపున ఒకటి లేదా రెండు తాజా ఆకులను నమిలి తినడం మంచిది. ఇలా చేస్తే గ్లూకోజ్ మెటబాలిజం మెరుగుపడుతుంది. అంతేకాకుండా ఆకులను ఎండబెట్టి పొడిగా తయారుచేసి, దానిని వేడి నీటిలో కలిపి తాగవచ్చు. ఈ పద్ధతి కూడా సమర్థవంతంగా పనిచేస్తుంది. ప్రస్తుతం మార్కెట్లో ఇన్సులిన్ ప్లాంట్ సప్లిమెంట్స్ కూడా లభిస్తున్నాయి. అయితే వీటిని ఉపయోగించే ముందు వైద్యుల సలహా తీసుకోవడం ఉత్తమం.
