Liver Detox: మన శరీరంలో అతి ముఖ్యమైన అవయవాలలో లివర్ ఒకటి. రక్తాన్ని శుద్ధి చేయడానికి, విషాన్ని తొలగించడానికి కీలకం. మంచి ఆరోగ్యానికి సరైన కాలేయ పనితీరు చాలా అవసరం. అయితే, అనారోగ్యకరమైన జీవనశైలి, తప్పుడు ఆహారపు అలవాట్లు, శారీరక శ్రమ లేకపోవడం, ఆల్కహాల్ తెసుసుకోవడం కాలేయంపై ఒత్తిడిని కలిగిస్తాయి. ఫలితంగా, లివర్ సిర్రోసిస్, ఫ్యాటీ లివర్ వంటి సమస్యలుకు దారితీస్తుంది.

కావున కాలేయాన్ని ఆరోగ్యంగా ఉంచుకోవాలనుకుంటే, కొన్ని సహజ పానీయాలు తీసుకోవాల్సిందేనని ఆరోగ్య నిపుణులు చెబుతున్నారు. ఈ డ్రింక్స్ కాలేయాన్ని డిటాక్స్ చేయడమే కాకుండా జీర్ణక్రియ, చర్మం, మొత్తం ఆరోగ్యానికి కూడా ప్రయోజనకరంగా ఉంటాయి. అవేంటో ఈ ఆర్టికల్ ద్వారా తెలుసుకుందాం.

నిమ్మకాయ నీరు: ఉదయం ఖాళీ కడుపుతో నిమ్మకాయ నీరు తాగడం కాలేయ డిటాక్స్ కు చాలా ప్రయోజనకరంగా ఉంటుంది. నిమ్మకాయ నీటిలో ఉండే విటమిన్ సి, యాంటీఆక్సిడెంట్లు లివర్ నుండి విషాన్ని బయటకు పంపడంలో సహాయపడతాయి. ఇది జీవక్రియను కూడా పెంచుతుంది. అంతేకాదు, కొవ్వును కరిగించడంలో సహాయపడుతుంది. రోజూ ఒక గ్లాసు గోరువెచ్చని నిమ్మకాయ నీరు తాగడం వల్ల లివర్ ఆరోగ్యానికి ఎంతో మంచిది.

గ్రీన్ టీ: గ్రీన్ టీలో కాటెచిన్లు ఉంటాయి. ఇవి ఫ్రీ రాడికల్స్ వల్ల కలిగే నష్టం నుండి కాలేయాన్ని రక్షిస్తాయి. ఇవి కొవ్వు జీవక్రియకు మద్దతు ఇస్తాయి. కాలేయ కణాలను పునరుత్పత్తి చేయడంలో సహాయపడతాయి. రోజూ ఒకటి లేదా రెండు కప్పుల గ్రీన్ టీ తాగడం వల్ల కాలేయ పనితీరు మెరుగుపడుతుంది. శరీరం లోపలి నుండి విషాన్ని తొలగిస్తుంది.

క్యారెట్ జ్యూస్: క్యారెట్ జ్యూస్‌లో బీటా-కెరోటిన్, విటమిన్ ఎ పుష్కలంగా ఉంటాయి. ఇది కాలేయాన్ని శుభ్రపరచడంలో సహాయపడుతుంది. ఈ రసం కాలేయంలో పేరుకుపోయిన విషాన్ని బయటకు పంపడంలో సహాయపడుతుంది. చర్మ ఆరోగ్యాన్ని మెరుగుపరుస్తుంది. ప్రతి ఉదయం తాజా క్యారెట్ జ్యూస్ తాగడం కాలేయాన్ని క్లీన్ చేయడానికి సహజమైన, ప్రభావవంతమైన మార్గం.

ఆపిల్ వెనిగర్: ఆపిల్ సైడర్ వెనిగర్ కాలేయాన్ని శుభ్రపరచడంలో సహాయకారిగా పరిగణిస్తారు. ఇది జీర్ణక్రియను మెరుగుపరుస్తుంది. రక్తంలో చక్కెర స్థాయిలను కూడా నియంత్రిస్తుంది. ఒక గ్లాసు గోరువెచ్చని నీటిలో ఒక టీస్పూన్ ఆపిల్ సైడర్ వెనిగర్ కలిపి ఉదయం ఖాళీ కడుపుతో తాగడం వల్ల కాలేయం నుండి విషాన్ని బయటకు పంపి శరీరానికి శక్తినిస్తుంది.

కలబంద జ్యూస్: కలబంద జ్యూస్‌లో యాంటీ ఇన్ఫ్లమేటరీ, యాంటీఆక్సిడెంట్ లక్షణాలు ఉంటాయి. ఇవి ఆరోగ్యకరమైన కాలేయాన్ని నిర్వహిస్తాయి. ఈ రసం శరీరం నుండి హానికరమైన పదార్థాలను తొలగించడం ద్వారా కాలేయ కణాలను మరమ్మతు చేయడంలో సహాయపడుతుంది. ప్రతిరోజూ ఉదయం కొద్దిగా కలబంద జ్యూస్ తాగడం జీర్ణక్రియను మెరుగుపరుస్తుంది.

నోట్ : ఇందులోని అంశాలు కేవలం అవగాహన కోసం మాత్రమే. అమలు చేసే ముందు సంబంధిత నిపుణులను సంప్రదించడం మంచిది.