Health benefits of walking in nature : ఉరుకుల పరుగుల జీవితం.. పని ఒత్తిడి.. మానసిక ఆందోళన.. ఆధునిక జీవనశైలి మనకు అందిస్తున్న ‘కానుక’లివి. ఈ ఒత్తిడి నుంచి బయటపడేందుకు జిమ్‌లు, యోగా సెంటర్ల చుట్టూ తిరుగుతున్నారా..? అయితే, మీ పెరట్లోనే ఓ అద్భుతమైన ఔషధం ఉందని మీకు తెలుసా..? అదే ‘ప్రకృతి’. రోజూ కేవలం 20 నిమిషాలు పచ్చని చెట్ల మధ్య నడిస్తే చాలు, మీ ఒత్తిడి మాయమై, మనసు తేలికవుతుందని, శారీరకంగానూ ఎన్నో ప్రయోజనాలు ఉన్నాయని శాస్త్రీయ అధ్యయనాలు ఘోషిస్తున్నాయి. అసలు ప్రకృతికి, మన ఆరోగ్యానికి ఉన్న ఈ విడదీయరాని బంధం ఏమిటి..?

ప్రకృతి చేసే మేలు.. శాస్త్రీయ ఆధారాలు : పార్క్, తోట, అడవి.. ఇలా పచ్చని ప్రదేశాల్లో నడవడం కేవలం కాలక్షేపం కాదు, అదొక థెరపీ అని నిపుణులు చెబుతున్నారు.
ఒత్తిడి హార్మోన్లకు చెక్: కేవలం 20 నిమిషాలు ప్రకృతిలో గడిపితే, ఒత్తిడికి కారణమయ్యే ‘కార్టిసాల్’ అనే హార్మోన్ స్థాయిలు గణనీయంగా తగ్గుతాయని ‘ఫ్రాంటియర్స్ ఇన్ సైకాలజీ’ (Frontiers in Psychology) పత్రికలో ప్రచురితమైన అధ్యయనం స్పష్టం చేస్తోంది. ముఖ్యంగా, ఫోన్ వంటివి పక్కనపెట్టి నడిచినప్పుడు ఫలితాలు మరింత మెరుగ్గా ఉన్నట్లు గమనించారు.

‘సాఫ్ట్ ఫాసినేషన్’తో మెదడుకు విశ్రాంతి: పక్షుల కిలకిలారావాలు, ఆకుల గలగలలు, నీటి ప్రవాహం వంటివి మన మెదడుకు ‘సాఫ్ట్ ఫాసినేషన్’ (సున్నితమైన ఆకర్షణ)ను అందిస్తాయి. ఇది మన ఏకాగ్రతను బలవంతంగా కాకుండా, సహజంగా ఆకర్షించి, మానసిక అలసటను తగ్గిస్తుంది.

శారీరక ఆరోగ్యానికీ భరోసా : ప్రకృతిలో నడక కేవలం మనసుకే కాదు, శరీరానికీ ఎంతో మేలు చేస్తుంది.

గుండెకు మేలు: పచ్చని వాతావరణంలో కేవలం 15 నిమిషాల నడక కూడా రక్తపోటు (BP), హృదయ స్పందన రేటును (Heart Rate) తగ్గించి, గుండె ఆరోగ్యానికి తోడ్పడుతుందని హార్వర్డ్ హెల్త్ పబ్లిషింగ్ (Harvard Health Publishing) అధ్యయనాలు చెబుతున్నాయి.

ఓపిక, శక్తి: ప్రకృతిలో నడవడం వల్ల శారీరక ఓపిక పెరిగి, వ్యాయామం సులభతరం అవుతుంది.

సృజనకు స్ఫూర్తి.. సంతోషానికి చిరునామా : ప్రకృతి ఒడిలో గడపడం వల్ల మీలో సృజనాత్మకత పెరిగి, కొత్త ఆలోచనలు పుడతాయి. పచ్చదనం, సూర్యరశ్మి మన శరీరంలో ‘సంతోషపు హార్మోన్’ అయిన ‘సెరోటోనిన్’ స్థాయిలను పెంచుతాయి. దీనివల్ల మన మానసిక స్థితి, శక్తి రెండూ మెరుగుపడతాయి. యూనివర్సిటీ ఆఫ్ అలబామా ఎట్ బర్మింగ్‌హామ్ (The University of Alabama at Birmingham) చేసిన అధ్యయనంలో, పార్కులో 20 నిమిషాలు గడిపిన వారు, వ్యాయామం చేసినా చేయకపోయినా, ఎంతో సంతోషంగా ఉన్నట్లు తేలింది. వయసుతో, ఫిట్‌నెస్‌తో సంబంధం లేకుండా, ఎవరైనా సులభంగా అలవర్చుకోగలిగే ఈ చిన్న అలవాటు, మన మానసిక, శారీరక ఆరోగ్యంపై చూపే ప్రభావం మాత్రం చాలా పెద్దది. కాబట్టి, రేపటి నుంచి మీ రోజులో ఓ 20 నిమిషాలను ప్రకృతికి కేటాయించండి.. అద్భుతమైన మార్పును మీరే గమనిస్తారు.