Over Drinking of Tea Not Good For Health: ఉదయం లేవగానే టీ తాగే అలవాటు అందరికీ ఉంటుంది. టీతోనే చాలా మంది తమ రోజును ప్రారంభిస్తారు. అయితే, వేడి మీద ఉన్న టీ పక్కన పెట్టి ఇతర పనుల్లో బిజీ అవుతుంటారు. ఈలోగా ఆ టీ చల్లబడిపోతుంది. దీంతో మళ్లీ వేడి చేసి తాగడం ప్రారంభిస్తారు. అయితే, ఇది సాధారణ విషయంగా అనిపించినా ఈ అలవాటు ఆరోగ్యానికి హానికరమని నిపుణులు చెబుతున్నారు. పాలు కలిపిన టీని ఎక్కువసేపు నిల్వ చేయడం చాలా ప్రమాదకరమని గుర్తు చేస్తున్నారు. వేసవిలో ఇది కేవలం 2 నుంచి 3 గంటల్లోనే పాడవుతుందని, నిల్వ ఉంచిన టీని తిరిగి వేడి చేయడం వల్ల కలిగే అనర్థాలు, అది ఎంత త్వరగా పాడవుతుందనే విషయాలపై ఓలుక్కేద్దాం.
ఎక్కువసేపు నిల్వ ఉంచితే..
సాధారణ గది ఉష్ణోగ్రత వద్ద బ్యాక్టీరియా వేగంగా పెరిగి టీలోని పోషకాలను నాశనం చేస్తాయి. మళ్లీ వేడి చేస్తే అంతా సరిపోతుంది అనుకోవడం సరికాదు. పదేపదే వేడి చేయడం వల్ల టీలోని టానిన్లు ఆమ్లంగా మారి ఎసిడిటీ, గ్యాస్, జీర్ణ సమస్యలకు దారితీస్తాయి. అయితే, బ్లాక్ టీ, గ్రీన్ టీ కొంచెం ఎక్కువసేపు నిల్వ ఉండవచ్చు. వీటిని రిఫ్రిజిరేటర్‌లో ఉంచితే 6-8 గంటల వరకు చెడిపోకుండా ఉంటాయి. అయితే ఎంత ఎక్కువసేపు నిల్వ ఉంచితే వాటి రుచి, యాంటీ ఆక్సిడెంట్ గుణాలు అంత త్వరగా తగ్గిపోతాయని నిపుణులు చెబుతున్నారు. ఎక్కువ సార్లు వేడి చేసి పాడైన టీని సింపుల్‌గా గుర్తించవచ్చు. పుల్లటి లేదా చేదు రుచి, వింత వాసన లేదా టీపై ఒక పొర ఏర్పడటం, రంగు మారడం లేదా నురుగు రావడం, తాగిన తర్వాత గొంతులో మంటగా అనిపించడం వంటి ఈ లక్షణాలలో ఏది కనిపించినా ఆ టీని వెంటనే పారవేయాలి. ఇలాంటి టీ తాగితే జీర్ణవ్యవస్థపై ప్రభావం పడుతుంది. కొన్ని సందర్భాల్లో ఎసిడిటీ, గ్యాస్, మలబద్ధకం లేదా ఫుడ్ పాయిజనింగ్ కూడా సంభవించవచ్చు. అంతేకాకుండా పోషకాల నష్టంతో పాటు యాంటీ ఆక్సిడెంట్లు తగ్గిపోతాయి, పోషకాలు నాశనమవుతాయి. తిరిగి వేడి చేసిన టీ పేగుల్లోని మంచి బ్యాక్టీరియాను బలహీనపరుస్తుంది. టీని తాజాగా తయారు చేసుకుని, వెంటనే తాగేయడం ఉత్తమమైన పద్ధతిగా నిపుణులు చెబుతున్నారు. ఒకవేళ, టీ మిగిలితే 1-2 గంటల్లోపు తాగేయాలని సలహా ఇస్తున్నారు. టీని పదేపదే వేడి చేయడం పూర్తిగా మానుకోవాలని హెచ్చరిస్తున్నారు. టీ తాజాగా ఉంటేనే ఆరోగ్యానికి, రుచికి మంచిదని నిపుణులు చెబుతున్నారు.
చర్మంపై మొటిమలకు అవకాశం..
మరోవైపు, నిపుణుల అభిప్రాయం ప్రకారం, హెర్బల్ టీని పదేపదే వేడి చేయడం వల్ల దాని పోషకాలు పూర్తిగా నాశనం అవుతాయి. పదే పదే వేడి చేసిన టీ తాగడం వల్ల కడుపు నొప్పి, పొత్తికడుపు వాపు వంటి అనేక సమస్యలు రావొచ్చు. అంతేకాదు, టీని ఎక్కువగా తీసుకోవడం వల్ల మీ చర్మంపై మొటిమలు ఏర్పడతాయి. టీని సరైన సమయంలో పరిమిత మోతాదులో తీసుకోవడం వల్ల ఎలాంటి సమస్యా ఉండదు. కానీ, అదుపు లేకుండా టీ తీసుకోవడం ద్వారా పరోక్షంగా నిద్రలేమి సమస్యకు దారితీస్తుంది.
