Benefits of probiotic drinks : నేటి ఆధునిక జీవనశైలిలో చాలామందిని వేధిస్తున్న ప్రధాన సమస్య అజీర్తి, కడుపు ఉబ్బరం. తిన్నది సరిగా అరగక, తీసుకున్న ఆహారంలోని పోషకాలు శరీరానికి అందక నీరసించిపోతుంటారు. ఈ సమస్యలకు పరిష్కారంగా ఇప్పుడు ఆరోగ్య ప్రపంచంలో “ప్రోబయోటిక్స్”, “ప్రీబయోటిక్స్” అనే పదాలు మారుమోగిపోతున్నాయి. ప్రతి ఫిట్‌నెస్ నిపుణుడి నోట, ప్రతి ఆరోగ్యకరమైన ఆహార పదార్థం ప్యాకెట్ మీద ఇవే కనిపిస్తున్నాయి. అసలు ఈ ప్రోబయోటిక్స్ అంటే ఏమిటి? మన శరీరానికి అవి చేసే మేలు ఎంత? ఏ పానీయాలు తాగడం వల్ల మన జీర్ణవ్యవస్థ ఒక ఆరోగ్యకరమైన స్నేహితుడిని పొందినట్లుగా మారుతుంది? ఎంత మోతాదులో వీటిని తీసుకోవాలి? 

శరీర బరువును అదుపులో ఉంచుకోవాలనుకునే ప్రతి ఒక్కరి పదజాలంలో ప్రోబయోటిక్స్, ప్రీబయోటిక్స్ అనేవి సాధారణ పదాలుగా మారిపోయాయి. ఈ రెండింటి మధ్య తేడాను, వాటి ప్రయోజనాలను అర్థం చేసుకుంటే సంపూర్ణ ఆరోగ్యం మన సొంతమవుతుంది.

ప్రోబయోటిక్స్, ప్రీబయోటిక్స్.. అసలు తేడా ఏంటి?
ప్రోబయోటిక్స్ (Probiotics): వీటిని మన జీర్ణవ్యవస్థకు మేలు చేసే ‘మంచి స్నేహితులు’గా చెప్పవచ్చు. ఇవి మన పేగులలో నివసించే సజీవమైన మంచి బ్యాక్టీరియా. ఇవి హానికరమైన బ్యాక్టీరియాను నియంత్రిస్తూ, జీర్ణవ్యవస్థ సమతుల్యంగా పనిచేయడానికి సహాయపడతాయి. పులియబెట్టిన ఆహార పదార్థాలలో, పానీయాలలో ఇవి పుష్కలంగా ఉంటాయి.

ప్రీబయోటిక్స్ (Prebiotics): ఇవి మన పేగులలో ఉన్న మంచి బ్యాక్టీరియాకు (ప్రోబయోటిక్స్‌కు) కావలసిన ఆహారం. టెక్సాస్ విశ్వవిద్యాలయానికి చెందిన ‘ఎండీ అండర్సన్ క్యాన్సర్ సెంటర్’ పరిశోధనల ప్రకారం, ప్రీబయోటిక్స్ అనేవి మొక్కల నుంచి లభించే పీచు పదార్థాలు (ఫైబర్). ఇవి జీర్ణం కాకుండా నేరుగా పేగులలోకి చేరి, అక్కడున్న మంచి బ్యాక్టీరియా వృద్ధి చెందడానికి దోహదపడతాయి.

అద్భుత ప్రయోజనాలెన్నో!
ఈ ప్రోబయోటిక్, ప్రీబయోటిక్ అంశాలు కలిగిన ఆహారం తీసుకోవడం వల్ల మన జీర్ణవ్యవస్థకు అపారమైన ప్రయోజనాలు కలుగుతాయి. అవి:
జీర్ణక్రియ మెరుగుదల: ఆహారం సులభంగా జీర్ణం కావడానికి, మలబద్ధకం, గ్యాస్, కడుపు ఉబ్బరం వంటి సమస్యలు తగ్గడానికి ఇవి ఎంతగానో తోడ్పడతాయి.
పోషకాల శోషణ: మనం తీసుకున్న ఆహారంలోని విటమిన్లు, ఖనిజాలు వంటి పోషకాలను శరీరం సమర్థంగా గ్రహించేలా చేస్తాయి.
రోగనిరోధక శక్తి: పేగులలోని మంచి బ్యాక్టీరియా మన రోగనిరోధక వ్యవస్థలో కీలక పాత్ర పోషిస్తుంది. హానికరమైన సూక్ష్మక్రిములతో పోరాడే శక్తిని పెంచుతుంది.
వాపు నివారణ: శరీరంలో అంతర్గతంగా ఏర్పడే వాపును (ఇన్‌ఫ్లమేషన్) తగ్గించడంలో ఇవి కీలక పాత్ర పోషిస్తాయి.

ఎంత మోతాదులో తీసుకోవాలి : ఒక వ్యక్తి రోజుకు ఎంత మొత్తంలో ప్రోబయోటిక్స్ లేదా ప్రీబయోటిక్స్ తీసుకోవాలనే దానిపై అధికారికంగా నిర్దిష్టమైన సిఫార్సులు ఏవీ లేవు. అయినప్పటికీ, రోజుకు 3 నుంచి 5 గ్రాముల వరకు తీసుకోవడం వల్ల ప్రయోజనం ఉంటుందని ఆరోగ్య నిపుణులు సూచిస్తున్నారు.

సులభంగా లభించే మేటి పానీయాలు
అదృష్టవశాత్తూ, ఈ అద్భుత ప్రయోజనాలను అందించే పానీయాలు మనకు సులభంగా అందుబాటులో ఉన్నాయి. వాటిలో కొన్ని:
కొంబుచా (Kombucha): ఇది పులియబెట్టిన టీ. దీనిలో ప్రోబయోటిక్స్ పుష్కలంగా ఉంటాయి. జీర్ణక్రియకు ఇది ఎంతగానో మేలు చేస్తుంది.
మజ్జిగ (Buttermilk): మనందరికీ సుపరిచితమైన మజ్జిగ ఒక అద్భుతమైన, సహజసిద్ధమైన ప్రోబయోటిక్ పానీయం. ఇది శరీరాన్ని చల్లబరచడమే కాకుండా, జీర్ణవ్యవస్థను ఆరోగ్యంగా ఉంచుతుంది.
లస్సీ (Lassi): పెరుగుతో చేసే లస్సీ కూడా ప్రోబయోటిక్స్‌కు మంచి ఉదాహరణ.
గంజి (Fermented Rice Water): అన్నం వండిన తర్వాత మిగిలే గంజిని పులియబెట్టి తాగడం వల్ల కూడా మన శరీరానికి మేలు చేసే బ్యాక్టీరియా అందుతుంది.