Benefits of reverse walking: వాకింగ్ ఆరోగ్యానికి ఎంత మంచిదో అందరికీ తెలుసు. కానీ, మీరు ఎప్పుడైనా వెనక్కి నడిచారా..? అదేంటి వింతగా అనుకుంటున్నారా..? అయితే, ఈ ‘రివర్స్ వాకింగ్’తో సాధారణ నడక కంటే అద్భుతమైన ప్రయోజనాలు ఉన్నాయని, ఇదో సరికొత్త ఫిట్‌నెస్ మంత్రమని ఆరోగ్య నిపుణులు తేల్చిచెబుతున్నారు. బరువు తగ్గడం నుంచి కీళ్ల నొప్పుల నివారణ వరకు, ఈ వినూత్న వ్యాయామం చేసే మేలు అంతా ఇంతా కాదు. అసలు ఏమిటీ రివర్స్ వాకింగ్..? దీనివల్ల కలిగే ఆ ప్రత్యేక ప్రయోజనాలేంటి..?

ఏమిటీ ‘రివర్స్ వాకింగ్’ : పేరుకు తగ్గట్టే, ముందుకు కాకుండా వెనక్కి అడుగులు వేయడమే రివర్స్ వాకింగ్. సాధారణ నడకలో మనం అడుగు ముందుకేసినప్పుడు మొదట మడమ నేలను తాకి, ఆ తర్వాత పాదం మొత్తం ఆనుతుంది. కానీ, రివర్స్ వాకింగ్‌లో దీనికి పూర్తి భిన్నంగా, వెనక్కి అడుగు వేసేటప్పుడు ముందుగా కాలి వేళ్లు, ఆ తర్వాత పాదం నేలను తాకుతుంది. ఈ చిన్న మార్పే శరీర కండరాలపై, కీళ్లపై సరికొత్త ప్రభావాన్ని చూపుతుంది.

ప్రయోజనాలే ప్రయోజనాలు : నేషనల్ ఇన్‌స్టిట్యూట్ ఆఫ్ హెల్త్ (NIH), అమెరికన్ కాలేజ్ ఆఫ్ స్పోర్ట్స్ మెడిసిన్ వంటి సంస్థల అధ్యయనాలు ఈ వ్యాయామం వల్ల కలిగే ప్రయోజనాలను స్పష్టం చేస్తున్నాయి.

క్యాలరీలు వేగంగా ఖర్చు: సాధారణ నడకతో పోలిస్తే రివర్స్ వాకింగ్‌లో 40% ఎక్కువ క్యాలరీలు ఖర్చవుతాయని నిపుణులు చెబుతున్నారు. వేగంగా నడిస్తే నిమిషానికి బర్న్ అయ్యే క్యాలరీల కన్నా, నెమ్మదిగా వెనక్కి నడిచినా ఎక్కువ ప్రయోజనం ఉంటుందట. బరువు తగ్గాలనుకునే వారికి ఇదొక చక్కటి మార్గం.

కీళ్ల నొప్పులకు చెక్: ఆస్టియో ఆర్థరైటిస్ వంటి సమస్యలతో బాధపడేవారికి రివర్స్ వాకింగ్ ఓ వరం. ముందుకు నడిచేటప్పుడు మోకాళ్లపై ఎక్కువ ఒత్తిడి పడుతుంది. కానీ, వెనక్కి నడవడం వల్ల ఆ ఒత్తిడి తగ్గి, మోకాళ్లు, నడుము నొప్పి నుంచి ఉపశమనం లభిస్తుంది.

శరీరానికి స్థిరత్వం: ఈ వ్యాయామం ముఖ్యంగా తొడ వెనుక భాగంలోని కండరాలను (హామ్‌స్ట్రింగ్స్) బలోపేతం చేస్తుంది. ఇది శరీరానికి మంచి స్థిరత్వాన్ని, కండరాల మధ్య సమన్వయాన్ని మెరుగుపరుస్తుంది. ఫలితంగా, ముఖ్యంగా వృద్ధుల్లో కిందపడిపోయే ప్రమాదం తగ్గుతుంది.

వెన్నునొప్పికి ఉపశమనం: రివర్స్ వాకింగ్ వల్ల వెన్ను కండరాలు బలపడి, శరీరాకృతి (Posture) మెరుగుపడుతుంది. ఇది దీర్ఘకాలిక వెన్నునొప్పి, మెడ నొప్పుల నుంచి ఉపశమనం కలిగించడంలో సహాయపడుతుంది.

ఎలా ప్రారంభించాలి : కొత్తగా ఈ వ్యాయామం ప్రయత్నించేవారు కొన్ని జాగ్రత్తలు తీసుకోవాలి.

సురక్షిత ప్రదేశం: ఎలాంటి అడ్డంకులు లేని, మీకు బాగా తెలిసిన సమతలంగా ఉన్న ప్రదేశాన్ని ఎంచుకోండి. ట్రెడ్‌మిల్‌పై ప్రయత్నించడం ఇంకా సురక్షితం.

నెమ్మదిగా మొదలుపెట్టండి: మొదట చిన్న చిన్న అడుగులతో, నెమ్మదిగా ప్రారంభించండి.

సమయం: మీ సాధారణ వాకింగ్ పూర్తయ్యాక, చివరి ఐదు నిమిషాలు లేదా మధ్యమధ్యలో కొద్దిసేపు రివర్స్ వాకింగ్ చేయండి. ఆత్మవిశ్వాసం పెరిగాక సమయాన్ని, దూరాన్ని పెంచుకోవచ్చు.

గమనిక: ఇక్కడ అందించిన సమాచారం మీ అవగాహన కోసం మాత్రమే. ఏదైనా కొత్త వ్యాయామం ప్రారంభించే ముందు, ముఖ్యంగా కీళ్ల నొప్పులు వంటి సమస్యలు ఉన్నవారు, వైద్యులు లేదా ఫిట్‌నెస్ నిపుణుల సలహా తీసుకోవడం శ్రేయస్కరం.