Tea health risks: మన దేశంలో టీ అనేది చాలా మందికి రోజువారీ జీవితంలో భాగంగా మారిపోయింది. ఉదయం లేవగానే టీ తాగడం నుంచి మొదలుకుని పని మధ్యలో, సాయంత్రం సమయంలో కూడా టీ తాగడం చాలా మందికి అలవాటుగా ఉంటుంది. కొంతమందికి అయితే భోజనం చేసిన వెంటనే టీ తాగే అలవాటు కూడా ఉంటుంది. భోజనం చేసిన వెంటనే టీ తాగితే కడుపు తేలికగా అవుతుందని చాలామంది భావిస్తారు. కానీ ఆరోగ్య నిపుణుల ప్రకారం ఈ అలవాటు శరీరానికి మంచిది కాదు. అసలు తిన్న వెంటనే టీ తాగడం ఎందుకు మంచిది కాదో తెలుసుకోవాలి.
ఐరన్ శరీరానికి అందడం తగ్గిపోతుంది
టీ లో టానిన్స్, కాఫీన్ వంటి పదార్థాలు ఉంటాయి. ఇవి మనం తినే ఆహారంలో ఉన్న ఐరన్ శరీరానికి పూర్తిగా శోషించకుండా అడ్డుకుంటాయి. ముఖ్యంగా పచ్చి కూరగాయలు, పప్పులు వంటి ఆహారాల్లో ఉండే ఐరన్ శరీరానికి చేరకుండా తగ్గిపోతుంది. ఇలా రోజూ తిన్న వెంటనే టీ తాగే అలవాటు ఉంటే కాలక్రమంలో ఐరన్ లోపం ఏర్పడే అవకాశం ఉంటుంది. ముఖ్యంగా మహిళలు, పిల్లల్లో ఇది అనీమియా సమస్యకు కారణమవుతుంది.
జీర్ణక్రియపై ప్రభావం
భోజనం చేసిన వెంటనే టీ తాగితే జీర్ణక్రియపై కూడా ప్రభావం పడుతుంది. టీ లో ఉండే కాఫీన్ కడుపులో ఆమ్లం ఎక్కువగా తయారయ్యేలా చేస్తుంది. దాంతో కడుపులో ఉబ్బరం, గ్యాస్, అసౌకర్యం వంటి సమస్యలు రావచ్చు. సాధారణంగా భోజనం చేసిన తర్వాత జీర్ణక్రియ సహజంగా సాగాలి. కానీ వెంటనే టీ తాగితే ఆ ప్రక్రియలో అంతరాయం కలుగుతుంది.
Read Also: Sony gaming console: ప్రో గేమర్ల కోసమే.. అదిరిపోయే గ్రాఫిక్స్తో ఇండియాలో PS5 ప్రో లాంచ్
పోషకాలు పూర్తిగా అందవు
టీ వల్ల ఐరన్ మాత్రమే కాదు… జింక్, మెగ్నీషియం, కాల్షియం వంటి ముఖ్యమైన ఖనిజాల శోషణ కూడా తగ్గిపోతుంది. మనం ఎంత మంచి ఆహారం తిన్నా కూడా ఈ పోషకాలు శరీరానికి పూర్తిగా అందకపోవచ్చు. దీని వల్ల శరీరానికి అవసరమైన సంపూర్ణ పోషణ తగ్గిపోతుంది. దీర్ఘకాలంలో ఇది ఆరోగ్యంపై ప్రతికూల ప్రభావం చూపుతుంది.
మెటబాలిజంపై ప్రభావం
ఇంకా ఒక ముఖ్యమైన విషయం ఏమిటంటే భోజనం చేసిన వెంటనే టీ తాగడం శరీరంలోని మెటబాలిజం ప్రక్రియను కూడా ప్రభావితం చేస్తుంది. జీర్ణక్రియ సరిగా సాగకపోతే ఆహారం శరీరంలో సరైన విధంగా ఉపయోగపడదు. దాంతో కొందరిలో బరువు పెరగడం వంటి సమస్యలు కూడా కనిపించవచ్చు. అందుకే ఈ అలవాటును తప్పక మార్చుకోవాలని ఆరోగ్య నిపుణులు చెబుతున్నారు.
టీ తాగడానికి సరైన సమయం
అయితే టీ తాగడానికి సరైన సమయం ఏమిటి అంటే భోజనం చేసిన తర్వాత కనీసం 30 నుంచి 60 నిమిషాల తర్వాత తాగడం మంచిది. అలా చేస్తే జీర్ణక్రియకు అంతరాయం ఉండదు. భోజనం చేసిన వెంటనే టీ బదులుగా గోరువెచ్చని నీరు లేదా సోంపు నీరు తాగితే జీర్ణక్రియకు చాలా సహాయపడుతుంది. చిన్న అలవాట్లలో మార్పు చేస్తే ఆరోగ్యాన్ని చాలా వరకు కాపాడుకోవచ్చు.