Early warning signs of throat cancer : గొంతు బొంగురుగా ఉందా? జలుబు చేసి ఉంటుందిలే అని సరిపెట్టుకుంటున్నారా? అయితే, మీరు ప్రమాదంలో పడినట్లే! సాధారణ జలుబు, ఇన్ఫెక్షన్ల వల్ల వచ్చే గొంతు బొంగురు కొద్ది రోజుల్లో తగ్గిపోతుంది. కానీ, వారాల తరబడి ఈ సమస్య వేధిస్తుంటే, అది గొంతు క్యాన్సర్‌కు తొలి సంకేతం కావచ్చని వైద్య నిపుణులు తీవ్రంగా హెచ్చరిస్తున్నారు. అసలు ఈ నిశ్శబ్ద హంతకిని తొలిదశలోనే ఎలా గుర్తించాలి? ఏయే లక్షణాలు కనిపిస్తే తక్షణమే వైద్యుడిని సంప్రదించాలి?

గొంతు క్యాన్సర్ అంటే : గొంతు, స్వరపేటిక, టాన్సిల్స్ వంటి భాగాలలో క్యాన్సర్ కణాలు అసాధారణంగా పెరగడాన్నే గొంతు క్యాన్సర్ అంటారు. ధూమపానం, మద్యపానం, కొన్ని రకాల వైరల్ ఇన్ఫెక్షన్లు దీనికి ప్రధాన కారణాలు.

ఈ 9 హెచ్చరిక సంకేతాలను విస్మరించవద్దు : గొంతు క్యాన్సర్‌ను ఎంత త్వరగా గుర్తిస్తే, చికిత్స అంత సులభమవుతుంది. మీలో ఈ లక్షణాలు కనిపిస్తే ఏమాత్రం ఆలస్యం చేయవద్దు.

తగ్గని గొంతు బొంగురు: సాధారణంగా జలుబు వల్ల వచ్చే బొంగురు వారం రోజుల్లో తగ్గిపోతుంది. కానీ, మూడు, నాలుగు వారాలకు మించి గొంతు బొంగురుగా ఉన్నా, స్వరంలో మార్పు వచ్చినా అది గొంతు క్యాన్సర్‌కు ప్రధాన సంకేతమని ‘మెడ్‌లైన్‌ప్లస్’ (MedlinePlus) స్పష్టం చేస్తోంది.

మింగడంలో ఇబ్బంది (డిస్‌ఫాజియా): గొంతులో ఏదో అడ్డుపడినట్లు, ముఖ్యంగా గట్టి ఆహారం మింగేటప్పుడు నొప్పిగా లేదా ఇబ్బందిగా అనిపించడం.

తగ్గని దగ్గు: జలుబు, అలర్జీలతో సంబంధం లేకుండా, వారాల తరబడి దగ్గు వేధిస్తుంటే అనుమానించాల్సిందే.

కారణం లేని చెవి నొప్పి: ఎలాంటి ఇన్ఫెక్షన్ లేకుండా, చెవిలో నిరంతరంగా నొప్పిగా ఉండటం కూడా ఒక ముఖ్యమైన లక్షణమని ‘మేయోక్లినిక్’ (Mayo Clinic) అధ్యయనంలో తేలింది.

మెడలో గడ్డలు లేదా వాపు: మెడలోని లింఫ్ నోడ్స్ వాచి, గడ్డల్లా తగలడం. ఈ గడ్డలు సాధారణంగా నొప్పిలేకుండా ఉంటాయి.

శ్వాసలో మార్పులు: శ్వాస తీసుకోవడంలో ఇబ్బందిగా ఉండటం, శ్వాస తీసుకునేటప్పుడు శబ్దం రావడం.

కారణం లేకుండా బరువు తగ్గడం: ఎలాంటి డైటింగ్, వ్యాయామాలు చేయకుండానే హఠాత్తుగా బరువు తగ్గడం.

తగ్గని నోటి దుర్వాసన: నోటిని శుభ్రంగా ఉంచుకున్నా, దుర్వాసన తగ్గకపోవడం.

గొంతులో పుండ్లు లేదా మచ్చలు: నాలుక, గొంతులో నయం కాని తెల్లటి లేదా ఎర్రటి మచ్చలు, పుండ్లు ఏర్పడటం. ఈ లక్షణాలు కేవలం గొంతు క్యాన్సర్‌కే కాకుండా, ఇతర సాధారణ సమస్యల వల్ల కూడా రావచ్చు. అయినప్పటికీ, ఇవి రెండు, మూడు వారాలకు మించి కొనసాగితే, ఏమాత్రం నిర్లక్ష్యం చేయకుండా వెంటనే వైద్యుడిని సంప్రదించడం అత్యవసరం.