Thyroid Cancer: మన శరీరంలో గొంతు దిగువ భాగంలో ఉండే చిన్న గ్రంథి థైరాయిడ్. ఇది చిన్నదైనా శరీరానికి చాలా ముఖ్యమైన పని చేస్తుంది. థైరాయిడ్ నుంచి ఉత్పత్తి అయ్యే హార్మోన్లు శరీరంలోని మెటాబాలిజం, శక్తి వినియోగం, ఉష్ణోగ్రత నియంత్రణ వంటి అనేక ప్రక్రియల్లో ప్రధాన పాత్ర పోషిస్తాయి. చాలా మందికి థైరాయిడ్ అంటే హార్మోన్‌ సమస్యలే గుర్తుకు వస్తాయి. కానీ నిపుణుల చెబుతున్న దాని ప్రకారం, థైరాయిడ్‌తో సంబంధం ఉన్న సమస్యలు కేవలం హార్మోన్‌ అసమతుల్యత వరకే పరిమితం కావు. కొన్నిసార్లు క్యాన్సర్‌ కూడా థైరాయిడ్ గ్రంథిలో ఏర్పడుతుంది.
థైరాయిడ్‌లో క్యాన్సర్‌ ఎలా వస్తుంది
థైరాయిడ్ గ్రంథిలో కణాల పెరుగుదల సరిగా లేకపోతే చిన్న గడ్డలు తయారవుతాయి. వీటిని నిపుణులు ‘నాడ్యుల్స్‌’ అంటారు. ఈ గడ్డలలో ఎక్కువ భాగం హానికరమేమీ కాని నిర్దోషి గడ్డలే. కానీ కొన్ని గడ్డలు క్రమంగా క్యాన్సర్‌ కణాలుగా మారుతాయి. గొంతు కింది భాగంలో వాపు, ఉబ్బరం, గడ్డలా కనిపించడం, మాట్లాడేటప్పుడు లేదా మింగేటప్పుడు ఇబ్బంది కలగడం వంటి లక్షణాలు కనబడితే జాగ్రత్త వహించాలి.
సాధారణ లక్షణాలు
థైరాయిడ్ క్యాన్సర్‌ తొలి దశల్లో ఎక్కువగా స్పష్టమైన లక్షణాలు కనిపించకపోవచ్చు. అందువల్ల చాలా మంది పెద్ద సమస్య అనుకోకుండా వదిలేస్తారు. కానీ కొన్ని లక్షణాలను గమనిస్తే త్వరగా నిర్ధారణ చేసుకోవచ్చు. గొంతు కింద భాగంలో వాపు మాయం కాకపోవడం, బొంగురు గొంతు ఎక్కువ కాలం కొనసాగడం, మెడలో గట్టిపడినట్లు అనిపించడం, మింగేటప్పుడు కష్టంగా అనిపించడం, దగ్గు తగ్గకపోవడం వంటి లక్షణాలు ఉంటే వెంటనే వైద్యుని సంప్రదించడం అవసరం.
థైరాయిడ్ క్యాన్సర్‌ రకాలు
వైద్య శాస్త్రం ప్రకారం థైరాయిడ్ క్యాన్సర్‌ నాలుగు ప్రధాన రకాలుగా వర్గీకరించారు.
పాపిల్లరీ కార్సినోమా – ఇది అత్యంత సాధారణమైన రకం. మెల్లగా పెరుగుతూ చికిత్సకు బాగా స్పందిస్తుంది.
ఫాలిక్యులర్‌ కార్సినోమా – ఇది కొంచెం తక్కువగా కనిపిస్తుంటుంది కానీ సమయానికి గుర్తిస్తే నియంత్రణ సాధ్యమే.
మెడల్లరీ కార్సినోమా – ఇది జన్యుపరమైన కారణాల వల్ల వచ్చే అవకాశం ఉంటుంది.
అనాప్లాస్టిక్‌ కార్సినోమా – ఇది చాలా అరుదుగా కనిపించినా అత్యంత వేగంగా వ్యాప్తి చెందే రకం.
ఎవరికీ ఎక్కువ ప్రమాదం
థైరాయిడ్ క్యాన్సర్‌ మహిళల్లో ఎక్కువగా కనిపిస్తుంది. ముఖ్యంగా 30 నుండి 50 సంవత్సరాల మధ్య వయసున్న మహిళల్లో ప్రమాదం ఎక్కువగా ఉంటుందని పరిశోధనలు చెబుతున్నాయి. అలాగే కుటుంబంలో ఎవరికైనా థైరాయిడ్ క్యాన్సర్‌ చరిత్ర ఉంటే, లేదా అధిక రేడియేషన్‌ కు గురైనవారిలో కూడా ముప్పు ఎక్కువగా ఉంటుంది.
పరీక్షలు- నిర్ధారణ
గొంతులో గడ్డలు లేదా వాపు గమనించినప్పుడు మొదటగా వైద్యులు శారీరక పరీక్ష చేస్తారు. తర్వాత అల్ట్రాసౌండ్‌, సీటీ స్కాన్‌, ఎంఆర్ఐ వంటి స్కానింగ్‌ పద్ధతులు ఉపయోగించి గడ్డల స్వభావం తెలుసుకుంటారు. అవసరమైతే బయోప్సీ చేసి క్యాన్సర్‌ కణాలు ఉన్నాయా లేదా అనే నిర్ధారణ చేస్తారు.
చికిత్స పద్ధతులు
థైరాయిడ్ క్యాన్సర్‌ తొలిదశలో గుర్తిస్తే చికిత్స సులభం. ప్రధానంగా శస్త్రచికిత్స ద్వారా థైరాయిడ్ గ్రంథిని పూర్తిగా లేదా భాగంగా తొలగిస్తారు. తర్వాత రేడియో ఐయోడిన్‌ థెరపీ, హార్మోన్‌ రీప్లేస్‌మెంట్‌ థెరపీ వంటివి చేస్తారు. ఈ విధానం ద్వారా శరీరంలో హార్మోన్ల సమతుల్యత కాపాడబడుతుంది. కాస్త తీవ్రస్థాయికి చేరినప్పుడు కీమోథెరపీ, టార్గెటెడ్‌ థెరపీ లేదా రేడియేషన్‌ పద్ధతులు కూడా ఉపయోగిస్తారు.
ముందుగా గుర్తించడం ఎందుకు ముఖ్యం
చాలా సందర్భాల్లో థైరాయిడ్ క్యాన్సర్‌ నెమ్మదిగా పెరుగుతుంది. కాబట్టి ప్రారంభ దశలోనే నిర్ధారణ అయితే చికిత్స విజయవంతం అవుతుంది. ఆలస్యంగా తెలిసినప్పుడు ఇతర అవయవాలకు వ్యాప్తి చెందే ప్రమాదం ఉంటుంది. కాబట్టి గొంతు సమస్యలు నిర్లక్ష్యం చేయకుండా వెంటనే పరీక్షలు చేయించుకోవడం ద్వారా ప్రాణాపాయం తగ్గించుకోవచ్చు.
జీవనశైలి -జాగ్రత్తలు
థైరాయిడ్ సమస్యలు రాకుండా ఉండేందుకు ఆరోగ్యకరమైన ఆహారం తీసుకోవడం చాలా ముఖ్యం. సమతుల్యమైన ఆహారంలో అయోడిన్‌ సరిపడా ఉండేలా చూసుకోవాలి. అదనంగా క్రమం తప్పని వైద్య పరీక్షలు చేయించుకోవడం అవసరం. ముఖ్యంగా కుటుంబ చరిత్ర ఉన్నవారు ఈ విషయంలో మరింత జాగ్రత్త వహించాలి.
