నేటి ఆధునిక జీవనశైలి, ఒత్తిడితో కూడిన పరిస్థితులు, అసమతుల్య ఆహారం ఇవన్నీ మహిళల ఆరోగ్యాన్ని తీవ్రంగా దెబ్బతీస్తున్నాయి. ప్రాథమిక దశల్లో కనిపించే కొన్ని లక్షణాలను నిర్లక్ష్యం చేయడం వల్ల, చిన్న సమస్యలే పెద్ద వ్యాధులుగా మారే ప్రమాదం ఎక్కువ. తాజాగా వెలువడిన ఆరోగ్య నివేదికల ప్రకారం.. భారత మహిళల్లో కొన్ని ముఖ్యమైన వ్యాధులు వేగంగా పెరుగుతున్నాయి. ఆ వ్యాధులు ఏంటో ఈ కథనంలో తెలుసుకుందాం.
హార్ట్ డిసీజ్స్: గుండె జబ్బులు ఇక పురుషులకు మాత్రమే పరిమితం కావడం లేదు. మహిళల్లోనూ ఇవి విస్తృతంగా కనిపిస్తున్నాయి. అయితే ఇవి కాస్త భిన్నంగా ప్రదర్శన ఇస్తాయి ఛాతిలో నొప్పి కాకుండా మెడ, భుజం, దవడ, పక్క భాగాల్లో నొప్పి, శ్వాస సమస్యలు, అలసట, వాంతులు వంటి లక్షణాల రూపంలో వస్తాయి. వయస్సు పెరిగే కొద్దీ రక్తంలో చక్కెర, కొలెస్ట్రాల్ స్థాయిలు మారుతుండటంతో గుండె సంబంధిత పరీక్షలు.. ఈసీజీ, స్ట్రెస్ టెస్ట్, ఎకో తప్పనిసరి అవుతాయి.
సర్వైకల్ క్యాన్సర్: భారతదేశంలో మహిళలను ఎక్కువగా వేధించే క్యాన్సర్లలో సర్వైకల్ క్యాన్సర్ ఒకటి. పీరియడ్స్ క్రమబద్ధంగా లేకపోవడం, యోనిలో అసాధారణ రక్తస్రావం, భయంకరమైన వాసనతో కూడిన డిశ్చార్జి.. ఇవన్నీ హెచ్చరికలే. హ్యూమన్ పాపిలోమా వైరస్ (HPV) ఈ క్యాన్సర్‌కు ప్రధాన కారణం. పాప్ స్మియర్, HPV టెస్టులతో ముందే గుర్తించవచ్చు. అంతేగాక, HPV వ్యాక్సిన్ తీసుకున్నవారు కూడా నిబంధిత స్క్రీనింగ్ చేయించుకోవాలి.
పీసీవోఎస్: పాలిసిస్టిక్ ఓవరీ సిండ్రోమ్ లేదా పీసీవోఎస్ అనేది ఇప్పుడు యువతిలో పెరుగుతున్న సాధారణ ఆరోగ్య సమస్య. ఇరెగ్యులర్ పీరియడ్స్, మొటిమలు, జుట్టు పెరుగుదల, బరువు అధికం, గర్భం దాల్చడంలో ఇబ్బందులు.. ఇవి దీని సంకేతాలు. కానీ కొందరిలో స్పష్టమైన లక్షణాలు లేకపోవచ్చు. నిర్ధారణకు బ్లడ్ టెస్టులు, స్కాన్లు అవసరం. వ్యాయామం, సమతుల్యాహారం, మందులతో దీన్ని నియంత్రించవచ్చు.
ఆస్టియోపొరోసిస్: మెనోపాజ్ అనంతరం మహిళల్లో ఎముకల దృఢత్వం తగ్గిపోవడం సాధారణం. ఇది ఆస్టియోపొరోసిస్‌కు దారితీస్తుంది. ఈ వ్యాధి తొలిదశల్లో లక్షణాలేమీ కనిపించకపోవచ్చు. కానీ క్రమంగా వెన్నునొప్పి, ఎత్తు తగ్గడం, ఎముకలు తేలికగా విరిగిపోవడం జరుగుతుంది. డెక్సా స్కాన్, విటమిన్ డి పరీక్షలతో దీన్ని గుర్తించవచ్చు. కాల్షియం, ప్రొటీన్‌తో కూడిన ఆహారం, సరైన వ్యాయామంతో దీన్ని నివారించవచ్చు.
బ్రెస్ట్ క్యాన్సర్: మహిళల్లో అత్యధికంగా నమోదు అవుతున్న క్యాన్సర్లలో బ్రెస్ట్ క్యాన్సర్ అగ్రస్థానంలో ఉంది. రొమ్ములో గడ్డలు, ఆకార మార్పులు, చర్మం ముదురు కావడం, నిపుల్ నుంచి ద్రవం రావడం వంటి లక్షణాలు కనిపిస్తే అలక్ష్యం చేయరాదు. 40 ఏళ్లు దాటిన మహిళలు ప్రతి సంవత్సరం మామోగ్రఫీ చేయించుకోవాలని వైద్య నిపుణులు సూచిస్తున్నారు. అలాగే ప్రతి మహిళ నెలలో ఒక్కసారి అయినా స్వయంగా తన బ్రెస్ట్‌ను పరీక్షించుకోవాలి.
ఈ ఆరోగ్య సమస్యలు ఆరంభ దశల్లోనే గుర్తిస్తే చికిత్స సులభంగా ఉంటుంది. అందుకే మహిళలంతా తమ శరీరాన్ని గమనిస్తూ, ఏ చిన్న మార్పైనా నిర్లక్ష్యం చేయకుండా అవసరమైన పరీక్షలు చేసుకోవాలి. ఆరోగ్యం అన్నదే నిజమైన సంపద అనే విషయం మరువద్దు.
