Vitamin D deficiency causes : తరచూ అలసటగా ఉంటుందా? కండరాల నొప్పులు వేధిస్తున్నాయా? జుట్టు విపరీతంగా రాలిపోతోందా? వీటిని సాధారణ సమస్యలుగా కొట్టిపారేస్తే, మీరు తీవ్రమైన అనారోగ్యాన్ని కొనితెచ్చుకున్నట్లే! ఇవన్నీ మీ శరీరంలో ‘విటమిన్ డి’ లోపానికి సంకేతాలని నిపుణులు హెచ్చరిస్తున్నారు. దేశంలో దాదాపు 90 శాతం మహిళలు ఈ విటమిన్ లోపంతో బాధపడుతున్నారంటే పరిస్థితి తీవ్రతను అర్థం చేసుకోవచ్చు. అసలు మనకు తెలియకుండానే ఈ లోపం ఎందుకు వస్తోంది..? దీనివల్ల కలిగే తీవ్ర పరిణామాలేంటి..? ఈ సమస్య నుంచి బయటపడే మార్గాలేంటి..?

కారణాల కట్టడి.. లోపానికి మూలం ఇక్కడే : ఆధునిక జీవనశైలే ఈ సమస్యకు ప్రధాన కారణమని నిపుణులు స్పష్టం చేస్తున్నారు.

నీడపట్టున ఉద్యోగాలు: ఎక్కువ సమయం కార్యాలయాల్లో, నీడపట్టున గడపడం వల్ల చర్మానికి సూర్యరశ్మి సోకడం లేదు.

శరీరాన్ని కప్పేయడం: బయటకు వెళ్లినా, చర్మం నల్లబడుతుందనే భయంతో స్కార్ఫ్‌లు, మాస్కులతో శరీరాన్ని పూర్తిగా కప్పేసుకోవడం మరో ప్రధాన కారణం.

ఆహారపు అలవాట్లు: కార్బోహైడ్రేట్లు ఎక్కువగా తీసుకుంటూ, విటమిన్ డి లభించే చేపలు, గుడ్లు, పుట్టగొడుగులు వంటి వాటిని ఆహారంలో చేర్చుకోకపోవడం.

సమస్యల సుడిగుండం.. లక్షణాలు ఇవే : విటమిన్ డి లోపం వల్ల శరీరం క్రమంగా బలహీనపడుతుందని, అనేక ఆరోగ్య సమస్యలు తలెత్తుతాయని క్లీవ్‌ల్యాండ్ క్లినిక్ (Cleveland Clinic) అధ్యయనాలు చెబుతున్నాయి.

పిల్లలలో: తీవ్రమైన విటమిన్ డి లోపం ‘రికెట్స్’ అనే వ్యాధికి దారితీస్తుంది. దీనివల్ల ఎముకలు బలహీనపడి, కాళ్లు వంగిపోతాయి.

పెద్దవారిలో: నిరంతర అలసట, ఎముకలు, కండరాలు, కీళ్ల నొప్పులు, మానసిక స్థితిలో మార్పులు, తరచూ ఇన్ఫెక్షన్ల బారిన పడటం వంటి లక్షణాలు కనిపిస్తాయి.

సూర్యుడే.. అసలు వైద్యుడు : శరీరానికి అవసరమైన విటమిన్ డిలో అధిక భాగం సూర్యకాంతి నుంచే లభిస్తుంది.

ఎలా తయారవుతుంది : సూర్యరశ్మి చర్మంపై పడినప్పుడు, చర్మంలోని ‘7-డీ హైడ్రోకొలెస్ట్రాల్’ అనే అణువు, సూర్యుని నుంచి వచ్చే అతినీలలోహిత (UV) కిరణాల సహాయంతో విటమిన్ డి3ని తయారుచేస్తుంది. దీనిని కాలేయం, కిడ్నీలు శరీరానికి అవసరమైన విటమిన్ డిగా మారుస్తాయి.

ఎంతసేపు ఉండాలి:  ప్రపంచ ఆరోగ్య సంస్థ (WHO) సిఫార్సుల ప్రకారం, వారానికి 2 నుంచి 3 సార్లు, కనీసం 5 నుంచి 15 నిమిషాల పాటు ముఖం, చేతులకు సూర్యరశ్మి తగిలేలా చూసుకోవాలి.

ఏ ఎండ మంచిది – ఎప్పుడు మేలు : ఉదయం, సాయంత్రం వేళల్లోని లేలేత ఎండలో విటమిన్ డి పెద్దగా ఉత్పత్తి కాదు. నేషనల్ లైబ్రరీ ఆఫ్ మెడిసిన్ (National Library of Medicine) అధ్యయనం ప్రకారం, సూర్యుడు నడినెత్తిన ఉన్నప్పుడు, అంటే దాదాపు మధ్యాహ్నం వేళల్లో వచ్చే ఎండలోనే విటమిన్ డిని ఉత్పత్తి చేసే యూవీబీ కిరణాలు ఎక్కువగా ఉంటాయి.

అయితే, ఎక్కువసేపు ఎండలో ఉండటం వల్ల చర్మ క్యాన్సర్ వంటి ప్రమాదాలు పొంచి ఉన్నాయి. కాబట్టి, ఎండలోకి వెళ్లేటప్పుడు తక్కువ ఎస్పీఎఫ్ ఉన్న సన్‌స్క్రీన్, కళ్లద్దాలు, తేలికపాటి దుస్తులు ధరించడం శ్రేయస్కరం.

ఆహారంతోనూ ‘డి’ భరోసా : ఎండలో గడపడం సాధ్యం కాని వారు, ఆహారం ద్వారా ఈ లోపాన్ని అధిగమించవచ్చు.

కొవ్వు చేపలు: సాల్మన్, ట్యూనా వంటి కొవ్వు చేపల్లో విటమిన్ డి పుష్కలంగా లభిస్తుందని మెడ్‌లైన్‌ప్లస్ (MedlinePlus) అధ్యయనాలు చెబుతున్నాయి.

ఇతరాలు: గుడ్లు (పచ్చసొన), పాలు, పుట్టగొడుగులను తరచూ ఆహారంలో చేర్చుకోవాలి.
సప్లిమెంట్లు: అవసరమైతే, వైద్యుల సలహా మేరకు విటమిన్ డి సప్లిమెంట్లు కూడా తీసుకోవచ్చు.